Camela n'Uxo

2011 / 04 / 22 - Les Noticies

El grupu Camela tuvo esti día atrás nel Pabellón d’Asturies de la Feria de Muestres de Xixón. L’éxitu, como siempre que vienen a tocar n’Asturies o como cuando lo faen en cualaquier otra parte de la xeografía española, impresionante. Ye dalgo que vien ocurriendo de va enforma años.

El 15 d’avientu de 2009, depués de llevar vendíos 7 millones d’álbumes de los sos diferentes trabayos discográficos, actuaron pela vez primera nun teatru de Madrid. Fuera nel Teätro Häagen-Dazs Calderón. Aprovechando aquel fechu, EMI Music Spain y la SGAE entregáron-yos unos discos –nun sé si d’oro o de platinu- poles sos ventes acumulaes. Ye más, recuerdo que’l discu de platinu recibiéranlu poco enantes namás poles descargues dixitales de canciones como “Te prometo el universo” y “Yo por ti”.

Va cerca de quince años Camela actuó nes fiestes de San Xosé d’Uxo, nel conceyu de Mieres. L’Asociación de Festexos tenía poques perres, pero munches idees. D’aquella, les fiestes d’Uxo, pola so afluencia y el so aciertu na escueya de conciertos punteros, competía directamente con San Xuan o con la Folina na Primavera –que ñació naquellos años.

Daba la sensación que poca xente conocía a Camela. Sonaba d’ellos namás qu’una canción, “Lágrimas de amor”. Tolos díes de fiesta cubríense, como siempre, con una orquesta. Aquello yera l’actuación estelar. Les previsiones yeren tan normales que nun se llamó siquiera a los servicios de Protección Civil nin s’avisó a la Guardia Civil de Carreteres del conciertu.

Dos hores enantes del conciertu nun había nin una plaza d’aparcamientu n’Uxo, nos arcenes de l’antigua carretera xeneral N-630 y nos pueblos de los alredores. Una hora enantes, el responsable de la Guardia Civil llamóme pol teléfonu pa preguntame por qué nun se los avisara d’un conciertu d’aquella magnitú. Los accesos a Uxo dende l’autopista taben colapsaos y resultaba imposible acceder dende Mieres, Ayer o L.lena a esti pueblu nel que se crucen les carreteres de los tres conceyos.

Tovía ye’l día de güei que siguimos preguntándonos cuánta xente hubo nel conciertu d’Uxo de Camela y cuando xente más pudo haber nel casu de tener la previsión d’aquel ábanu. Nun fue, ye cierto, un casu únicu. Nos años precedentes y posteriores otros conciertos como los de Medina Zahara o Celtas Cortos, ente otros, tamién contaron con un éxitu de públicu descomanáu.

Nun se trataba d’un casu únicu nes cuenques. En Cuturrasu, na vecina Llangréu, el programa de fiestes compitía dafecho col propiu de les fiestes de San Pedro y de Santiago. El llugar ye, ensin dulda, de bastante peor accesu. L’actuación de Los Pecos tovía se recuerda. Había más xente pelos praos de los alredores –dicíase d’aquella- que nel festival de Woodstock.

Camela, a pesar de los discos vendíos, sigue siendo un grupu ensin nengún tipu de reconocimientu pola intelectualidá crítica del nuestru país. Cuando nun tá nada mal facer un siguimientu del so trabayu como modelu de cómo ser quién a facer les coses fuera de los círculos de la supuesta normalidá.

N’Asturies, en muncha menor midida, tenemos exemplos asemeyaos. Vicente Díaz representó pa la nuestra música, en determináu momentu, lo mesmo que Camela pa la xeneral d’España. La Cirigüeña pretendió lo mesmo y, por más que se quedó nun grupu d’imitaciones, consiguió lo correspondiente en cuando a ventes y afluencia a los sos conciertos.

Lo que sí ye cierto ye que un tipu de música asina ye necesario. El que nun haya grupos que lo tén intentando a partir de la nuestra música nun significa más que la falta d’idees ye xeneral. Tien d’haber de too y, cuando falta dalgo, ye que tamos más cerca de que falte de too.