Lo que me contaron de La Candanga de Tinéu
2011 / 04 / 08 - Les Noticies
Tuve fuera esti fin de selmana pasáu nel que se celebraba nel Palaciu Merás de Tinéu un alcuentru de músicos al que pagaba la pena dir y tres del que llevaben tiempu organizando Rosa Fernández Delgado, directora de la Escuela de Música de Tinéu y componente de Los Concetsones y Muyeres, y l’escritor Elías Veiga.
Dende tiempu atrás venía recibiendo información d’esi tipu de formaciones musicales orquestales de los años cuarenta a setenta, qu’enllenaron de música les fiestes d’aquellos pueblos, a través de grabaciones de Pepín de Muñalén y d’informaciones de Rafa Lorenzo. Y, agora, bien d’años más tarde, pretendíase atropalos, face-yos un homenaxe y, más que nada, animábaselos a subir otra vuelta al escenariu a recordar los vieyos tiempos .
La Orquesta Iberia, El Bandín La Armonía, la Orquesta de Sanfrichosu, la Orquesta Urbis, la Orquesta Iris, la Orquesta Horizonte, la Orquesta Maracaibo, Los Alienígenos, Los Jekes… una hestoria que podría repitise na mayor parte de los conceyos d’Asturies, la hestoria d’un tiempu al que la música del mundu naguó por cambia-y la cara.
Recibí nesta selmana varios correos contándome lo guapa que fue la hestoria y lo bien que lo pasó la xente. Pero cuido que’l más guapu de los correos unviómelu’l propiu Elías Veiga. Y cuido tamién que la meyor manera de qu’entendáis lo que sintió la xente qu’asistió y participó nel conciertu ye lleer les palebres que’l propiu Elías Veiga m’unvió por email y que dicen asina:
“Foi, como s’esperaba, un día máxicu, un día pa les emociones, pa los reencuentros, pa los abrazos y pa les llárimes. En definitiva, un día pa recordar.
El patiu del Palaciu Merás quedóse mui pequeñu pa la cantidá de xente qu’asistió al actu el sábadu 26 de marzu. Tanto foi asina, que los asistentes enllenaron tamién l’atriu del primer pisu. Nunca, según el xerente, tuvieran tanta xente. La cosa entamó a les 16 hores y duró hasta les 5 la mañana…
Esta vez los qu’anduvieron de candanga foron los músicos d’algunes de les orquestes más renombraes del conceyu Tinéu. Fallaron unos pocos pero la gran mayoría de los que taben avisaos nun faltaron.
Namás velos llegar podía apreciase-yos ciertu nerviosismu. Nun sabíen mui bien qué diba pasar porque nunca naide-yos ficiera un reconocimientu públicu. Como muncho, dalguna semeya nalgún calendariu o nel llibru fiestes del pueblu. Nunca naide los xuntara depués de tantos años. Pasara tanto tiempu que dalgunos de la mesma orquesta nin se reconocíen. Y sin embargu, enseguida ente ellos surdió la complicidá de tantos momentos grabaos nel recuerdu colectivu.
Una de les coses que más nos llamó l’atención foron los saludos acompañaos d’abrazos y apretones de mano efusivos: “compañeru”, “hermanu”, o simplemente’l silenciu pa dicilo tou, con esi brillu nos gueyos que reclama la emoción contenida. Una camaradería que namás ente ellos puede xurdir.
Yá sentaos xuntos nes primeres silles de cara al escenariu, arrodiaos de xente, pudimos velo: taben inquietos. Igual que panteres encerraes nuna xaula (o daqué paecíu). Seguramente, como dixe, nunca pensaron qu’esi día podía llegar. Y que, nin muncho menos, diben tener a medio conceyu pendiente d’ellos. Pero tamién sintieron, por fin, que, anque un pocu tarde, quiciabes, la xente valoraba tolo que fixeran.
Con Ambás presentando l’actu cerróse’l círculu. Él supo facer que cuatro hores, que foi lo que duró la primera parte de La Candanga, nos supieran a pocu. Y que naide se moviera del asientu namás que p’aplaudir y baillar sentáu.
Dende la primera orquesta invitada, la Iberia de Caeras, fundada nel añu 1940, hasta la más nueva de toes, Los Jekes de Rafa Lorenzo y compañía, nacíos en 1974, la xente pudo escuitar non solo la historia de cada agrupación sinón tamién una pequeña muestra de cómo y qué tocaben. Ver a Constante restayar la batería con 91 años foi pa munchos dalgo difícil de creer y un exemplu de lo emotivu que diba ser la nueche.
Porque pa sorpresa de tous, la gran mayoría de los homenaxeaos nun dudó en revivir los vieyos tiempos axuntándose nel escenariu pa ofrecenos dalgunes pieces que’l públicu acoyió con ovaciones. Foron los componentes de les orquestes Iberia, Sanfrichosu, Urbis, Iris, Horizonte y Maracaibo. Pesllaron Los Jekes, depués de más de diez años ensin tocar, con cinco canciones ensayaes pa la ocasión. Un pieslle d’oru pa la primera parte de La Candanga.
Actu seguío vendría la foto de familia y el comienzu de la segunda parte con un pase de Mariluz Cristóbal, Ambás y Ramsés, la Bandina Andecha Turcipié, la Bandina Los Eólicos y la banda llocal, Cero Negativo. Depués de la cena, l’escenariu foi’l centru de peregrinación d’un sinfín de músicos que estiraron la folixa hasta altes hores.
En resume, una Candanga que va dar que falar pa munchos años”.
Cuido, a la fin, que la meyor manera d’entender lo que se vio ellí son estes palabres d’Elías Veiga. Siento de verdá nun poder tar presente. Les mios felicitaciones a los que lo ficieron posible.