Ente vieyes glories y clásicos

2011 / 03 / 11 - Les Noticies

A finales d’esti pasáu mes de febreru xuntáronse en Ribeseya delles de les principales voces de la canción asturina de los últimos tres cuartos de sieglu. Entre toos ellos –facíen pa ellos mesmos el cómputu- sumaben alredor de dos mil años. Muncha edá, muncha sabiduría, muncha hestoria de la música asturiana atropada nes sos voces y nes sos alcordances.

Esti homenaxe a les voces hestóriques qu’inda guarda la xente na memoria y que mantién viva coles sos grabaciones, partió de la iniciativa privada del empresariu hosteleru Olegario Garcia –que yá ficiera dalgo asemeyao colos ases de la cuatriada, pal mundu de los bolos. Y, pa facelo, contó col asesoramientu de xente como Ismael Tomás, miembru de l’Asociación d’Intérpretes de la Canción Asturiana, y la collaboración del propiu Ayuntamientu de Ribeseya.

Confirmaran la so presencia a esti Alcuentru de Veteranos cantadores como Socorro Noriega, María Rosa Quero La Pastorina, Mercedes Canal, María Luisa Díaz, María Teresa González Soto, Josefina Argüelles La Calandria de Vegaotos, Elena González, Nori Redondo y Diamantina Rodríguez, como representación de la tonada femenina.

Y tamién los cantadores Benito García, Aquilino Ferrera, Jaime Caleya, José Ramón Menéndez, José García El Tordín de Frieres, Enrique García L’Abogáu, José Fernández El Ruiseñor de Llangréu, Alejandro Fernández El Guaje, Delfín Llerandi, Benito Díaz, Maximino Solís Lada, Alfredo Canga, Armando Montes, Faustino Braña, José Manuel Collado Vidal El Llaniscu, Armando Fernández, José García Che de Cabaños, Avelino Fernández Corte y Gerardo Orviz.

A esta cita tamién asistieron invitaos como: Javier Díaz, más conocíu como Javier d’Arroes, ún de los p`rincipales colleccionistes de discografía y documentación de la música asturiana; Fernando Ruiz, director del Concursu de Canción Asturiana de Xixón y fíu de Josefina Fernández, una de les voces más clásiques de la canción asturiana y que se cumplía va poco el cincuentenariu de la so desparición; Facundo Fernández, director del Concursu Cuenca del Caudal; y Narciso Fernández, director de diferentes concursos y muestres de la canción asturiana, como’l d’Amieva o l’acabante de surdir de la Comarca de la Sidra.

L’Alcuentru de Veteranos tuviera llugar nel Restorán La Cerezal, de Ribeseya, y tuvo amenizada peles notes de la gaita de Graciano Fernández, otru hestóricu al delláu de la xente de la so xeneración. Recordóse nes sos notes la desaparición, mlapnes un mes enantes, del gaiteru Eduardo’l de Sabina –tamién conocíu como Eduardo’l de Ribeseya-, al que s’homenaxeara de manera multitudinaria nel pasáu mes d’avientu y desapareciera pocos díes depués.

Presten alcuentros d’estes característiques porque ye la manera de poner al día anotaciones sobre datos que falten. Tamién porque ye’l momentu nel que, de manera natural, surden anécdotes nueves que nun se conocíen. Y too ello mientres bien d’ellos s’arranquen por tonada, dando exemplu de que l’arte que guarda la so voz nun se pierde nin s’escaez fácilmente.

De toles formes, ente los presentes tamién s’alcontró xente que tovía sigue n’activu y, en bien de casos, participando en concursos y llegando con plenes facultaes a les fases finales. Un exemplu magníficu tenémoslu con María Teresa González Soto qu’algamó mui bonos puestos en concursos como’l d’Uviéu o’l de Mieres desta pasada edición. Hasta l’extremu de poder dicir que la so voz, con un tiembre mui característicu, s’alcuentru nún de los sos meyores momentos.

Y, pal casu de los homes, ye’l casu de xente como Tino Braña, que continúa dando mui bonos momentos a tolos aficionaos, o como Gerardo Orviz, xuráu del Concursu Ciudá d’Uviéu, y que continúa n’activu grabando discos. Tovía esta selmana mesma me falaba, durante’l descansu de la cita nel Teatru Filarmónica, del so prósimu trabayu discográficu nel qu’andaba metíu.

Y ye tamién el casu de xente como José Manuel Collado, que fizo esta pasada selmana una actuación impresionante del Festival d’Ayeranes que tuvo llugar en Mieres y que demostró la so maestría nel xéneru con dos pieces cla´siques como “Tuve na esfueya” y “Adiós la mio vaca pinta”. Dos cantares que, polo xeneral, nun formen parte del so repertoriu.

Y como ye tamién el casu d’Alfredo Canga. Nun se trata d’una voz n’activu, nel sentíu de velu participando tovía pelos concursos d’Asturies o actuando en festivales y alcuentros. Trátase cenciellamente de que ye una de les voces que sigue dando clases a intérpretes de tonada y acompañándolos nes sos grabaciones, como una especie de director musical personal. Tamién esta selmana pasada tocóme velu en funcionamientu durante la grabación del nuevu trabayu de Marisa Valle Roso nos Estudios Tutu de Corvera.

Quedó la xente con ganes de más. Faltaron dellos de los convocaos a última hora polos problemes que siempre surden. Pero, nel moemntu de les despidíes, los comentarios llamebn l’atención sobre la necesidá de facer de manera más periódica alcuentros d’estes característiques. Veteranos, a mediu camín ente vieyes glories y clásicos.