De la que'l futuru tien menos de 18 años

2011 / 03 / 04 - Les Noticies

Nun cuesta albidrar un futuru detrás de la interpretación de “Canta’l gallu” por Luis Castiello, un guaje de seis años. Nun paga la pena siquiera de si lo fizo bien o mal. La hestoria ye otra. Cuando se tienen tan pocos años como él y la xente que xunto a él algamó la final del Concursu Cuenca del Caudal na modalidá de Menores de 18 Años, nun queda más qu’entamar un artículu como ésti con plabres de futuru.

Un guaje de seis años llevando na voz un cantar antigüu, de gran dificultá, de los que tienen de cantase al altu la lleva depués de trabayar una técnica depurada, arrancando sólu metanes del escanariu frente a un patiu de butaques atacáu que vibró dende’l primer momentu pola valentía de la so voz, pola grandeza del so cantar y, como non, pol mesmu fechu de con tan pocu tiempu atrevese a salir solu delantre d’un micrófonu y delantre de tanta xente.

Tres de Luis Castiello intervino Andrea Cueli, de la saga de los Cueli que tien nel so padre, Andrés Cueli, a tou un campoeón d’esti mesmu concursu. Con quince años defendió una “Cabraliega” lo suficientemente bien plantada como pa ser a facese un sitiu ente les voces que, tres de delliberaciones del Xuráu, va tar ente premiaes. Dalgo que volvió alvertise tres de la intervención de Francisco José Fernández, de dieciséis años, con “Baxo a la mina cantando”.

La fuerza de la presencia de voces cántabres volvió sentise cuando aportó al escenariu Cipriano Solarana, “Panín”, de quince años, apostando por una brava versión de “Déxame pasar que voi”, que sirvió pa cerrar la primera parte del programa y pa dexar al públicu gratamente impresionáu del enorme nivel algamáu por esta xente tan mozo en tan poco tiempu.

Arrancó la segunda parte cola emotiva actuación de Laura Uría Boto, con malapenes cinco años, y una impresionante “Toca la gaita, gaiteru”, pa los sos pocos años. L’aplausu cerráu del públicu vino a corroboralo.

Qu’una nueva xeneración tá llamando a la puerta quedó patente tres de la defensa de “Soi pastor”, al cargu de Rodrigo Valle Barros, de dieciséis años, y más que nada, tres de la intervención del anterior ganador d’esta modalidá del concursu nel añu anterior, Esteban Verdeja, de diecisiete años, con “Tengo de facer un horru”. Ensin dulda, ún claru candidatu a revalidar el so títulu y de llevalu a la vecina Cantabria de la que provién, continuando la llarga tradición de cantadores de tonada asturiana d’esa tierra.

Cerró l’apartáu d’intervenciones la neña Alicia Villanueva, de diez años, con “Coyí d’un artu una flor”. Y nun pudo facelo Aurora Cereijo Díaz porque, neña como ye, de cinco años, xungando como andaba pelos pasiellos de los camerinos diose un trastazu contra’l marcu la puerta y nun fue quién a salir al escenariu.

Asina, cuando tan a puntu de cumplise diez años de la edición de los discos “La tonada de la mina” y “Cantares de mina” que sirvieron de plataforma pa dar a conocer a una nueva xeneración de cantadores de tonada, esti concursu retresmitíu pela televisión valió pa dexar constancia de que’l relevu xeneracional tá volviendo a llevase a cabu. D’aquella diéronse a conocer voces como les d’Anabel Santiago, Bibiana Sánchez, Liliana Castañón, Urbano Prieto y Fernando y Marisa Valle Roso, agora delles de les más reputaes y premiaes del momentu.

L’éxitu de la presente convocatoria fue total. Un éxitu que se continúa nel d’otros concursos, como’l Ciudá d’Uviéu, qu’incorporaron nesta edición la modalidá de tonada xuvenil pa dexar constancia de la importancia d’esta nueva xeneración que vien con ganes de tomar el relevu.

Volveré, nun me queda nenguna dulda depués de lo visto nesta edición del Concursu Cuenca del Caudal, a tener de falar d’esta nueva xeneración. Dalgunos son entá mui pequeños, pero otros como Esteban Verdeja, Andrea Cueli, Francisco José Fernández y Cipriano Solarana, “Panín”, yá son toa una realidá.