N'alcordanza de Margarita Blanco

2008 / 04 / 18 - Les Noticies

Nel momentu nel que me disponía a escribir esti artículu selmanal llégame al móvil un mensaxe escuetu d’Anabel Santiago: “Acaba morrer Margarita Blanco”.

De xuru nun va ser una noticia que vaya ocupar munches llinies nos medios de comunicación, pero pa la xente mozo de la xeneración d’Anabel Santiago la voz de Margarita Blanco va siguir siendo durante bien d’años una referencia obligada. El que tenga dalguna dulda que ponga’l so CD “Desnuda” y sienta “Ven a veme”. Más allá de la propia voz d’Anabel nesta tonada ta la propia voz de Margarita Blanco.

Ñació nel peor de los momentos posibles pa la canción asturiana, el que trescurre ente la revolución d’ochobre y la guerra civil, un tiempu que xunto cola inmediata posguerra va tayar un paréntesis nel impresionante xorrecer de la canción asturiana de la década anterior. Cuando ella naz en La Collada de Siero, el 5 d’agostu de 1935, toles grandes voces de la tonada ya yeren consideraos clásicos en vida. El tiempu de los grandes compositores (Francisco Lavandera, Víctor Sáenz, Baldomero Fernández, Torner, Martínez Abades...) taba a puntu de pasar páxina. La siguiente diba tar en blanco.

Una llarga páxina en blanco que convierte les décades siguiente nun ermu nel que, al traviés principalmente de los concursos de radio, la tonada asturiana va convertise nun xéneru repetitivu y con bien poques coses nueves coles que sorprender. Una páxina en blanco na que van destacar una serie de nomes pola grandeza de la so voz, pero na que nun vamos tener malapenes exemplos de nenguna innovación.

A esta xeneración de la guerra civil va pertenecer Armando Montes –que tamién va destacar en canción española y en flamenco-, Marcelino Fernández Meré –que va ser conocíu pol nomatu d’El Manquín de Les Arriondes y que s’especializó en tonada a la gaita-, Manuel Gandoy Zapico –qu’acabó siendo ún de los meyores cantadores que-y dio al punteru arriba y qu’ensin dulda diba acabar siendo ún de los más grandes de nun ser porque un accidente de tráficu nun-y dexó cumplir siquiera cuarenta años-, José Ramón Montes –Ito’l Farucu, que tampoco fue a prodigase enforma n’actuaciones y concursos-, Laudelino García Palicio –al qu’un desgraciáu accidente retiró de los escenarios, tornando a ellos venti años depués pa ganar dende una siella de ruedes el concursu del Teatru Campoamor-, Manuel González –al que toos llamaron Manolo Ponteo, con más de setenta asturianaes grabaes en discu de vinilu-, Adelina Baragaño –continuadora de la estirpe de La Busdonga y siguidora fiel deles vueltes de la so voz-, Manuel Fernández –más conocíu como El Fogoneru, con seis discos grabaos en Bélxica, onde tamién se ganó la vida cantando copla española y flamenco-, Aquilino Ferrera –Quilo’l de L’Agüeria Carrocera, que deja de cantar en los años setenta cuando muerre’l so compañeru a la gaita-, la gran parexa de la tonada dialogada Diagmina Noval y Alfredo Canga –con una grabación que continúa, trenta años depués de grabada, siendo un superventes, agora na so edición en CD-, Aurelio González Fueyo –que fuera solista renomáu del Coro Santiaguín-, Enrique García Palicio –que siguimos conociendo como L’Abogáu, nomatu que-y punxo Menchu del Valle dende’l so programa de radio-, Nori Redondo –qu’aporta a la tonada depués de tener un nome coles sos interpretaciones por Cocha Piquer y Estrellita Castro-, Socorro Noriega –a la que tovía siguimos teniendo’l placer de sentila polos escenarios y cosniguir ganar nel Teatru Campoamor poco tiempu atrás-... y tantos otros.

Un llistáu impresionante de nomes que ficieron l’inmensu llabor de treslladar a les nueves xeneraciones les voces glorioses de primeros de sieglu. Y que, como dicía al principiu, toos ñacieron nesi reducíu periodu ente guerres.

La voz de Margarita Blanco, tres d’algamar el segundu premiu del concursu del salón Babel del añu 1955, apienza a ser requerida pa cantar nosprincipales cetámenes del xéneru, interviniendo en delles de les primeres xires que se llevaron a cabu. Como la que compartió con El Tordín de Frieres y que los llevó a Bélxica nel añu 1969.

Tenemos la suerte de que nos dexó un bon llegáu en grabaciones, ente les que destaquen les sos versiones de “Lloraba una cabraliega”, “Playina la de Xixón”, “Al pasar La Collaona”, “Un maquinista lloraba”, “Que fui al Carmín de La Pola”, “Carretera de Colloto”... Y como non, la magífica interpretación de la citada “Ven a veme”, toa una declaración al altu la lleva d’amor desgarráu.

El bravor de Margarita Blanco riba los escenarios, la valentía d’atrevese a resolver con fuerza tonos duros, les ganes de comese el mundu que nun fue quién nin a acabar con elles la edá, va permitir que sigamos falando d’ella como ún de los patrones obligaos pa entender que s’atreven a partir d’agora a facer xente como Lorena Corripio, Bibiana Sánchez, Liliana Castañón, Marisa Valle, María Sánchez o Anabel Santiago. Les sos ñetes musicales.

Unes ñetes musicales que tuvieron la suerte de contar con una maestra escepcional.