L’home que coyó d’un artu una flor

2007 / 11 / 02 - Les Noticies

Si mires les bases del Concursu Cuenca del Caudal de Tonada d’esta edición 2007/08 vas alcontrar qu’aparez la sección de “Tonada d’Autor”. Si busques nes bases del Concursu “Ciudad de Oviedo” del Teatru Campoamor na edición 2008 tamién vas dar con una sección que se llama “Renovación de la Tonada”. Inda nun me parez que salieran nin les bases del Concursu de La Nueva, nin del de L’Entregu, nin del d’Amieva, nin del de Xixón... pero de los dos exemplos espuestosvese qu’hai una llinia trazada.

Yera dalgo necesario. Pero tampoco ye enforma sorprendente. La tonada lleva años reinventándose a sí mesma. Ensin necesidá de dexar de ser tonada. Ensin dexar tampoco de ser la banda sonora por escelencia de la nuestra música.

Nun tenemos noticies d’ella muncho más allá del finales del sieglu XIX. Fue’l tiempu nel que volvió reinventala’l Gaiteru Llibardón a base de competir nel mundu del primer show bussines en condiciones d’igualdá, al par del ragtime y del cuplé.

Como fueron quién a facelo na xeneración siguiente los compositores del nacionalismu musical asturianu, componiendo nuevos aires pa vieyes voces y creando la base del repertoriu clásicu de la tonada, nun tiempu nel que’l mundu baillaba al son del tango y del fox-trot. Como lo entamaron dende la perspectiva de la lírica los miembros de Los 4 Ases de la Canción Asturiana y bona parte de los compañeros de la so xeneración, naquella dómina na que la emigración regresaba con corríos y rancheres mexicanes de la tierra a la que nun paraben de dir y de la que nun dexaben de tornar.

Como lo volvió facer El Presi y la xente del so tiempu, nel mediu d’un mundu enllenu de coples, óperes flamenques y boleros, y consiguiendo facese un llugar y un nome na so propia tierra y na ayena.

Como fueron quién de nuevo la quinta de Diamantina, regresando a los sos oríxenes –que nel casu d’ella fuera regresar a Torner y nel d’otros compañeros del tiempu volver a los clásicos de primeros de sieglu-, como una manera de renovar les fuerces con aires antiguos que sonaban nuevos y auténticos en xunto nes sos voces.

Como lo intentaron recuperando la esencia de la llingua na que taben cantaes de la mano de los Amigos del Bable, nun tiempu nel que l’inglés y l’español macarrónicu imitando al inglés atacaben les emisores y les bocines de los salones de baile.

Como-y tocó facelo a la quinta de Mariluz Cristobal, atravesando un desiertu de pop, rock y folk, hasta aportar a les puertes del sieglu XXI.

Como agora mesmo tamos viendo a una xeneración entera -que nun tien siquiera trenta años y qu’anda alredor delos venti les más de les veces-, que va ser la que se presente nel apartáu de “tonaes d’autor” o “tonaes renovaes” nos concursos que vienen.

Demientres esta llinia trazada sigue firme y enllena de nomes y reinventándose a ella mesma xeneración tres de xeneración, les otres músiques pasen, como modes pasaxeres que son. Dellos sones vuelven con tiempu, pero nengún vuelve pa quedase. Sentada nel estragal de la so casa, la tonada fue viendo pasar a lo llargo del sieglu XX toles modes. Delles d’estes modes foranes aportaron con fuerza asgaya y con intención de quedar. Pero, el tiempu pasa y la priesa ye dalgo que nun afecta a la so llinia trazada. Siguimos cantando boleros y tangos con señaldá, pero yá pasó’l so tiempu. Y yá naide recuerda a la Orquesta Gardel –que yeren de Mieres-.

Como siguimos copiando melodíes pop n’inglés y amoldando la fonética del español a elles, y siguiremos faciéndolo bien de tiempu más gracies a les radio fórmules. Pero yá naide s’alcuerda d’una grupín que diben d’Ilegales pol mundu y el mundu acabó siendo mui grande y el tiempu convirtiéndolos a toos en calvos.

Como siguiremos sintiendo corríos mexicanos, balades celtes o aires flamenquitos. Y nun ye que pasara’l tiempu de lo mexicano, de lo celta o de lo flamenco, sinon que siguen teniendo un éxitu enorme nel so llugar d’orixen y dalguna vez, tiempu alantre, volverán a intentar conquistar el mundu.

Una conquista que tamién emprendieron dende esta parte del mundu xente como’l Gaiteru Llibardón, El Presi o Hevia. Y consiguiéronlo. Y cuando ya’l mundu nun s’alcuerda d’ellos tamos nosotros, la parte del mundu de la que partieron y los raigaños de los que bebieron, pa recordalos. Demientres escribía esti artículu sentía cantares de Llorienzu Novo Mier, dalguién qu’intentó cambiar dende dientro de los xuraos de concursos el propiu mundu de los concursos. Con un razonamientu bien simple: si les lletres de les asturianaes tan n’asturianu, ¿por qué nun siguir componiendo les nueves n’asturianu?

Naciera va noventa años n’Uviéu y morriera va diecisiete nesta mesma ciudá. En xusticia, el Premiu de Renovación de la Tonada tendría de llevar el so nome. Pero toos conocemos la tendencia a la ingratitú d’esta tierra.

El cantar qu’agora suena –tamién d’él-, diz: “Coyí d’un artu una flor / y esgatuñéme les manes. / Munches flores hai n’amor / pero arestes tamién hailes. / Ye que tamién les flores / tienen espines / qu’endolcaes n’arume / faen feríes”.