10 muyeres 10

2011 / 01 / 21 - Les Noticies

La gripe, les afecciones de garganta y delles otres enfermedaes consiguieron, tanto na modalidá femenina como na masculina de la XIV edición del Concursu de Canción Asturiana Cuenca del Caudal, que les semifinales fueran más abiertes que nunca: ensin dulda con una gran calidá nes voces, pero tamién ensin la competencia directa de delles de les más grandes, como María Sánchez o Marisa Valle Roso.

Nun falló na cita nenguna de les diez voces. El repertoriu, el propiu d’estes cites. Tá llegándose a la gran final y les voces arriesguen. D’elles, un total de quince a la gaita, lo que valió pa dar más atrabayu al gaiteru Berto Varillas que, amás de miembru del xuráu, ye gaiteru oficial del concursu.

L’espectáculu abrióse con una intervención del citáu gaiteru, un pupurrí de xirandiyes asturianes, al que siguieron les pieces “Me gusta cantar a Asturies” y Marchó Pachín pa la siega” na voz de Pilar Barreñada, una de les voces habituales d’esti concursu. A la que siguió Lorena Corripio, segunda clasificada na edición del añu pasáu, y que volvió a dar muestres de querer ganar ésti con dos versiones tremendes de les clásiques “Soi de Llangréu” y “Tienes casa tienes horru”.

Dende Villaviciosa llegó Águeda Riera, una voz menos conocida pero que lleva bien d’años dexando constancia del so bon facer, con “Escurecióme nel monte” y la primera de les versiones de la tarde de “Nun sé qué siento mio Asturies”.

La única particpante de Mieres, llugar nel que se celebren les semifinales d’esti concursu, fue Rosi Fernández Torre, afincada en Llangréu dende va años. D’ella fueron les versiones de “La cabraliega” y de “Adiós conceyu Quirós”. Que dio pasu a la última de les intervenciones de la tarde, la de María José García, la primera de les intérpretes que nun intervino a la gaita, con otres dos clásiques: “Arboleda bien plantada”, que la ficiera Diamantina Rodríguez, y “Al pssar per el puertu”, que cantara La Busdonga.

Con María Llatores abrióse la segunda parte d’esta XIV edición del Concursu Cuenca del Caudal, organizáu pola Asociación Cultural Güeria de San Xuan y la Conceyalía de Cultura del Ayuntamientu de Mieres, y del que les fases eliminatories lleven a cabu nel pueblu de Returbiu, nel salón d’actos del Llar de Xubilaos y Pensionistes.

María Llatores yera nesta ocasión la más moza de les participantes y, con una fuerza descomanada y unes ganes enormes de comese’l mundu, dexó claro que venía con ganes de pasar a la final con dosw tonaes braves, “Carretera de Colloto” y “Cuatro coses tien Asturies”.

Tres d’ella entró n’escena una de les voces mayores, la de María Teresa González Soto, voz redonda y tamién atacada de fuerza, cola segunda vuelta de “Nun sé qué siento mio Asturies” a la que siguió una espectacular “Carromateros”. Laudelina Hortal, con Onde yo me pueda dir”, tamién clásica del repertoriu de La Busdonga, y “Tienes el carru a la puerta”, dexó tamién mui bon tastu na boca de los espectadores.

Chucha de Nembra nun necesita presentación nenguna. Con discos grabaos na década de los sesenta y compañera d’escenarios d’aquella de xente como la propia Diamantina Rodríguez o La Pastorina, sigue llegando a les semifinales de los concursos y, como na padada edición, a la final, con un repertoriu que la convierten una de les voces que con más grande placer se sienten. Nesta ocasión abriendo l’actuación con “Debaxo’l cielu d’Asturies” y cerrándola con “Soi la muyer d’un mineru”, que valió p’arrancar les llárimes de bona parte del públicu asistente.

Cerró les actuaciones Silvia Suárez, qu’unes selmanes enantes recibía nesti mesmu escenariu del Auditoriu Teodoro Cuesta de Mieres el Premiu de la Crítica de la RPA 2010 pol so trabayu nel discu Cantares de Degaña, xunto al grupu Filandón. Silvia Suárez abrió con “Aguellos gües” y cerró, a la manera na que saben facelo les voces más grandes, con “La Soberana”.

Dos selmanes depués d’esta semifinal femenina tendrá llugar la correspondiente masculina, na que van participar Celestino Rozada, Juan José Martínez, Andrés Cueli, Juan Robledo, Héctor Braga, José Antonio González “Cantu la Vara”, Eloy López Cuello, Fernando Valle Roso, José María García y Fernando Entrialgo.