Un soñador pa un pueblu

2011 / 01 / 14 - Les Noticies

La selmana pasada falaba de l’absoluta necesidá d’un circuitu de música n’Asturies. Y falaba, de pasu, de cómo funcionaben dellos otros en Calaluña, en Galicia o n’Extremadura. Una necesidá tam imperiosa, nel casu asturianu, que me lleva a siguir falando del tema y a traer exemplos de llugares nos que funciona. Más que nada de funcionamientos puntuales. Llugares que, dende la mínima expresión, son quién a sacar alantre una programación musical. En Mieres tenemos l’exemplu del programa de Conciertos de la Panadería, de l’Asociación Cultural Serondaya, que se lleva a cabu na restaurada panadería del pueblu de Cenera, nel Valle de Cuna. En Mucientes, Valladolid, tenemos l’exemplu que lleva años funcionando del Aula Muséu Paco Díez, con programación selmanal. Nos dos casos trátase d’iniciatives privaes. La programación de La Panadería de Cenera tá xestándose, colo que falaré d’ella en selmanes vinientes. Dedico, pues, un momentu, al modelu de Mucientes.

Mucientes ye d’esos sitios que nun te crees qu’esista. Pero tá, de la que t’aparez la salida de l’autopista a la derecha indicando Valadolid, garrándola y xirando al llau contrariu. Malapenes unos pocos kilómetros, camín de Cigales, famoso polos vinos. Paga la pena. Ye Castilla. Nun hai munchos problemes de curves. Frente a la traza de Valladolid como ciudá, Mucientes ye un pueblu castellanu engaramáu nuna llomba, coles sos bodegues, la so ilesia románica y un Aula-Muséu d’instrumentos musicales ibéricos que lleva’l nome del so creador: Paco Díez.

Si’l pueblu, les bodegues y la ilesia merecen una visita, l’Aula-Muséu necesita d’un recorríu más fondu. L’edificiu ye modernu y nun desentona en nada nel llugar nel que s’afaya. Dalgo que siempre s’gradez. Más que nada cuando nun dexa por ello de siguir siendo modernu.

De mano tópeteste con dos grandes sales en dos altures con una esposición permanente d’instrumentos tradicionales de la prenínsula ibérica. Pa oir, ver y tocar. Y, de nun atrevete o nun saber, Paco Díez ye quién a acompañate en persona y dátelos a conocer. Tamién, nuna sala adicional, espónense una llarga serie d’instrumentos europeos, principalmente gaites o cornamuses. Dalgo que fala a favor d’una futura ampliación como colección museográfica de les cornamuses europees.

Pa pasar un bon ratu, los fines de selmana cuenta con una programación de conciertos. De músiques tradicionales. De toles partes del mundu. La programación completa pue consultase al traviés d’internet. Pero tamién ye bueno arriesgase a dir pa saborguiar un conciertu que nun s’espera. Y que siempre va sorprender. Dos llugares tien pa los conciertos: de tar malu’l tiempu, una sala polivalente interior a la manera de mini anfiteatru; y, cómo yá nos vamos averando al bon solín de primavera, l’anfiteatru esterior.

Paco Díez comenzó la so andadura musical en 1975. De mano centróse na música tradicional de la so fastera, pero aína’l parentescu rítmicu y melódicu de los sones de Portugal, Galicia, Lleón, Asturies y Cantabria, lleváronlu a incorporar tola bayura d’esti repertoriu a los sos conciertos y a los sos trabayos discográficos. Xunto al grupu La Bazanca, más d’una docena de discos recueyen el so repertoriu.

Nún d’estos últimos trabayos discográficos, Entre Nochebuena y Reyes, atropa la diversidá del repertoriu de villancicos y de les estremaes llingües nes que pue cantase nel noroeste peninsular. Yá falara nesta sección del discu nel añu del so llanzamientu. Nun ye malo, nestes feches de les que salimos, recordalo. Agradezse nél una versión magnífica del “Aguinaldu y Reis”, dos villancicos de Teberga. Como tamién la so impagable “Huida a Egipto”, un villancicu de tradición moderna pañáu en Mieres y del qu’esisten bien de versiones per toa España (Juanitop Valderrama interpreta una que tovía sigue apareciendo en dellos recopilatorios navidiegos). Al delláu d’estos villancicos asturianos, los dos interpretaos nun más que correctu asturianu, alcuéntrese otros en portugués, castellanu y ladino.

Porque, más allá d’esti repertoriu tan averáu a la so tierra, Paco Díez ye ún de los principales intérpretes de música xudeo-española o sefardita. Bien reconocíu’l so trabayu internacionalmente, fue va unos años condecoráu poles autoridaes sefardíes pol so llabor divulgativu d’esti cancioneru musical.

Delles veces tuvimos la suerte de sentilu y velu n’Asturies. L’añu pasáu cantaba n’Uviéu por mor d’unes xornaes culturales sobre Sefarad. Pero, dada la cercanía de Mucientes y la importancia de la instalación cultural que rexenta, ye enforma más recomendable una visita al llugar. El vino, impresionante. El pueblu, magníficu. L’Aula-Muséu, una disculpa perfecta paempezar a perdese per Castilla.

Más que nada porque resulta un centru difícil d’entender dende Asturies. Una instalaciuón que salió alantre pol propiu empeñu personal del so creador. Nun va ver logotipos de grandes bancos nin de les sos fundaciones correspondientes ente los sos collaboradores. Nin tampoco va ver aparecer los nomes de les grandes instituciones polítiques de la Comunidá Autónoma.

Ye’l so sueñu personal. El qu’agora tá dando vida a tou un pueblu. Una razón más –quiciás l más importante- pa llevar a cabu esta visita. P’alendar esi aire de llibertá que tan bien-y sienta a la música tradicional.

NOTA: Na web www.aulamuseopacodiez.net tenéis tola información necesaria pa dir a velo, p’asistir a un conciertu o, de ser un grupu o intérprete, pa ponese en contactu pa dir tocar.