Un conceyo de cantares
2010 / 11 / 26 - Les Noticies
Tendría d’escribir l’artículu en fala, pero ente que lo qu’estudié va munchos años ye portugués, que lu acabé amestando a lo qu’aprendí a falar en Galicia y a lo poco que tuve en Serantes, en Tapia, nun me veo con fuerces pa ello. Pero que conste que la mio primer intención yera facelo, más que nada depués d’asistir esti día atrás a la presención del discu Conceyo de Cantares nel auditoriu d’As Quintas, na Caridá.
De la hestoria namás sabía que lo que m’adelantara Xose Ambás d’una grabación de Francisco de Rozadas del tema “A fiya d’Antón”, la versión popularizada d’ún d’aquellos temes que ficieran célebres les orquestes de los años sesenta y que, agora, na so voz bien templada, acaba convirtiéndose notra cosa bien distinta y bien guapa.
A la llamada d’Ivan Iglesias, del Parque Histórico del Navia, dispunxe too p’asistir a esta presentación na que diben intervenir el citáu Francisco de Rozadas –qu’al final nun pudo facelo por un problema familiar- y les formaciones Bacotexo, Mestura, Mezá, Cádaba y Tuenda, que cerraba’l conciertu.
El discu incluye tamién cantares d’otros grupos y cantantes de la zona como Herbamora, Elisa, Diaño Burlón, Hermanos del Herbaseca, Dual y Elena Mera Alonso. En xunto, cantares populares tradicionales, xunto a composiciones de folk, rock y de canción d’autor, qu’amuesen de dalguna manera la bayura de la música que se fai ente’l Navia y l’Eo y que se canta na fala d’esa comarca.
El conciertu, presentáu pol citáu Xose Ambás, en fala, y Sonia Fidalgo, n’asturianu, y que va ser retresmitíu por TPA esti domingu, entamó con “Días de cinza” del dúu Mestura. Voz y guitarra, con un repertoriu que llama l’atención pola so dulzura, y que siguió con “Debaxo del augua”, “Unde a vida s’acaba” y “Recordos”. El discu recueye la de “Debaxo del augua”, n’alcordanza de la memoria de la xente que dexó toles sos hestories familiares sapozaes baxo les agües del embalse de Grandas.
A Cádaba tocó-y la seguna intervención del conciertu, con temes del so repertoriu, como “A mía morena”, “Muñeirach”, pa cerrar con “Xúcaras”, el mesmu tema que nos llega na grabación y que fala del ser imaxinariu del títulu. Cádaba ye una formación folk amplia, de la mesma A Caridá, que yá cuenta con dos trabayos editaos, Do y sidemol, de 2003, y Camíos de ferro, de 2008. Esti mesmu añu 2010, el cantar “A mía morena” fuera nomináu al premiu AMAS al meyor cantar folk.
Los siguientes en subir al escenariu fueron los rockeros Bacotexo que l’añu pasáu estrenabel el so trabayu “A máquina del tempo”. Heriedes de la música d’otres formaciones nes que tuvieron, ente les que destaca Babilon Chat, los miembros de Bacotexo amosaron la so contundencia en temes como “Taliando na guardia”, “Campos de meiz” y el so “As de corazóis”, que ye tamién la qu’aparez d’ellos na grabación de Conceyo de Cantares.
El “Guinaldo dos mortos” abrió l’actuación de Mezá, recoyíu orixinalmente por Xose Ambas y los hermanos Monteavaro en Pezós y que tamién se canta en bien d’otros llugares de la riba del Navia. Esti ye’l tema qu’aparez tamién nel discu. Nel concierti siguieron con “San Antonio” y “Eu caséi con un veyo”.
Cerraron el conciertu la flauta de Pepín de Muñalén, el buzuki d’Elías García y la voz de Xose Ambás. Tuenda empezó con “A palmeira”, tema incluyíu nel cedé, pa siguir con “As mañanitas” y “El rosco”. Nes puertes d’aparecer el so tercer trabayu, Tuenda volvió dar una llección de cómo revisar el repertoriu tradicional, quedando la xente con bien de ganes de sentir dalguna propina.
Pa los que nun pudieron dir al conciertu el discu va tener de se-yos bastante. Habrá nél coses que presten enformas y otres que presten menos, pero a nadie-y va quedar dulda de la bayura d’esta tierra y de les ganes d’esta xente de facer la música que más-yos apetez, na llingua d’ellos.