De los ministriles al pianista de salón

2010 / 11 / 19 - Les Noticies

Asturies fue’l llugar d’España nel que más grande repercusión tuviera a lo llargo del sieglu XVIII la polémica ente los partidarios de la música antigua y los siguidores de lo que, d’aquella, comenzó a llamase música moderna. Uviéu convirtióse, gracies a la valoración de la opinión d’un intelectual como Feijoo, nel centru de la polémica, al decantase públicamente a favor de la polifonía barroca y en contra del ars nova qu’apienzaba a estendese per Europa.

Dende la so celda del conventu de San Vicente d’Uviéu, el benedictín Benito Jerónimo Feijoo y Montenegro (1676-1764), faise ecu d’esta polémica. En verdá, nun tá en contra de la música moderna, sinon del fechu de que s’abandone la música relixosa tradicional.

La música culta n’Asturies, a partir del Renacimientu más que nada, xira alredor de la Capilla de Música de San Salvador d’Uviéu. A los sos maestros nun se-yos desixía ser sacerdotes y alcontrábense ente los meyor pagaos d’España al ser retribuyíos pola propia Ilesia y la Universidá. Les modes de la época aportaben a estos maestros, de manera que, nel tiempu de Feijoo, la Capilla déxase influenciar poles corrientes italizanizantes.

La formación de la orquesta de la Catedral d’Uviéu ye tardía, yá que nun se tien noticia de qu’esistiera enantes del sieglu XVI. Pero, nesi momentu, daos los buenos tiempos económicos pelos que se pasaba, decidióse añadir ministriles, nome pol que se conocía a los instrumentistes, a los yá esistentes como organistes, maestru de capilla…

El carácter d’esta formación ye únicu y nun se tien noticia de nenguna otra asemeyada, nin siquiera vinculada a la Ilesia, n’Asturies. El primer ministril, Céspedes, del que se conoz el nome nesta orquesta catedralicia, ye de 1580. A partir d’esti momentu empiecen a aparecer nos documentos eclesiásticos los nomes de los primeros músicos asturianos rellacionaos con esti tipu de música culta d’época, como Xuan de Manzaneda o Lucas de Langreo.

Tamién s’alvierten nos nomes la presencia de músicos estranxeros qie, enin dulda, fueron los primeros que truxeron les novedaes de la música y organoloxía europea, como violines, oboes, clavicornios… El sueldu d’estos músicos enxamás fuera abondosu, polo que tendieron a ampliar los sos emolumentos con clases particulares y con pequeños conciertos.

Na documentación del tiempu alviértese, de toles formes, que los inicios de la escuela de música vinculada a esta orquesta pasó por duros momentos d’arranque. Asina lo señala la cita del 26 de marzu de 1588, citada por Héctor Braga nel so artículu “La música culta n’Asturies” de la revista Resonancias del Conservatoriu Superior de Música d’Uviéu, nel que pue lleese: “Refirióse como la música anda desconcertada y que saben tañer algunos ministriles, ni deprenden ni les enseñan…”. Un sieglu más tarde, más de mediáu’l sieglu XVII, la escuela de música que procura neños de coru a la catedral ye’l colexu y seminariu de San Xosé.

El sieglu XIX ve’l declive d’esta orquesta, en primer llugar porque los gastos de mantenimientu de los sos músicos ye enorme y, en segundu, porque ye’l momentu nel qu’entamen a proliferar los teatros, los ateneos y les sociedaes filarmóniques.

Per otra parte, el movimientu románticu del siegñu XIX llama a revalorizar los temes rellacionaos col folclor de les rexones y países, La música popular apienza a ser recopilada (asina tenemos l’Euskaldun ancina ancinako, de 1826, de Juan Ignacio de Iztueta) y a convertise nuna de les principales fontes d’inspiración. A la proliferación de recopilaciones folclóriques aína va amestase una llarga serie de cancioneros armonizaos y de pieces del tipu popurrí y lied.

El nacionalismu musical asturianu entama a facese notar a partir del últimu terciu del sieglu XIX. La influencia de la música de salón, de moda naquel tiempu, fizo que fuera’l xéneru de canción popurrística con acompañamientu de piano’l que triunfara. D’esa dómina son los dos caprichos popurrísticos de Rufino Nuevo y Miranda, titulaos Todo por Asturias, y los tres popurrís de Víctor Sáenz Canel de Cantos asturianos.