Asturianaes con trucu

2010 / 11 / 12 - Les Noticies

Sorprendentemente, esti nun va ser un añu de grandes novedaes discográfiques nel apartáu de l’asturianada. Por más que pudiera dar la sensación de selo’l fechu de que un bon númberu de cantadores tan nes condiciones vocales ideales como p’afrontar sacar un discu. Concultaos sobre’l tema, el comentariu xeneral lleva a una especie de desánimu: hai propuestes planteaes a delles casdes discográfiques, pero estes deben de facer númberos y la cuenta resultaos de xuru tien que tar dando cifres negatives.

Otru comentariu xeneralizáu apunta hacia’l fechu de la esistencia d’un productu más rápidu y baratu: el llanzamientu d’un recopilatoriu grabáu, polo normal, nel propiu marcu del concursu o festival onde s’interpreta cara al públicu. De manera que, coles deficiencies propies d’estos marcos y coles asturianaes cantaes ensin posibilidá de modificación, el productu na cai dexa enforma que desear (por más que, en dellos aspectos, recuerda los comentarios de les grandes estrelles de los años sesenta y setenta que contaben les condiciones de grabación que sufríen nes manes de los técnicos del tiempu en Madrid).

Asina les coses, los dos productos meyor ellaboraos de la serie sácalos la Fonográfica Asturiana: el primeru, baxo’l títulu de Asturianaes III, a partir de los campeones del Concursu d’Amieva; y, el segundu, col títulu que nun lleva a enquívocu de Campeones del XV Xoncurso de la Canción Asturiana AC La Nueva-Langreo.

El primeru d’ellos cuenta con tonaes tan interesantes como “Del altu La Collaona” y “¿Cómo te va?”, por José Manuel Collado, “Caleyucu, caleyucu” y “A les andeches”, por Mariluz Cristobal Caunedo, o “Pasé’l puertu’l Pontón” o “Pidí-ylo a la mio morena”, por Ismael Tomás. Ente munches otres.

Pero, dos cantares llamen l’atención sobre la fecha de grabación d’esti productu: “Debaxu del Picu Pierzu” y “Canto a Amieva”, de María Rosa Quero, La Pastorina. Lo que nos lleva a comprobar que se trata d’una grabación de finales de los años noventa, presentada como nueva (y recibiendo por ello subvención de la Conseyería de Cultura, como señala la carátula del cedé).

Esto bien a dignificar lo contrario del pensamientu de la xente preguntada: el productu asturianada vende, pero les cases discográfiques, atentes siempre a la mínima inversión de perres, saben que cuenten col filón de les grabaciones d’época como pa siguir sacando productos. Nun pagaron polo xeneral nin un duru a los cantadores pola so intervención na primera de les ediciones y, años más tarde, nun se-yos avisa siquiera de la edición d’esti nuevu productu.

Un fechu que tá dándose tamién con cedés de cantadores de tonada como Silvino Argüelles, Diamantina Rodríguez, Ataulfo Lada Camblor o’l citáu Ismael Tomás. Reedítense discos d’ellos ensin que tengan les cases la mínima deferencia de comunicá-yoslo.

Porque, a fin de cuentes, nadie tá falando de facese ricu con un productu como ye’l cedé y más nestos momentos tal y como tá’l mercáu. Pero, dinero sí que se tá sacando, por más qu’esti nun suela llegar a los bolsiellos de los sos verdaderos protagonistes. La preba tenémosla en que nun pasa añu ensin que tengamos una bona amuesa de nuevos productos. Por más que, n’años como ésti, baxo la capa de nuevu productu s’escuenda les más de les veces un productu antiguu o colos problemes del directo.

Con too, un par de productos d’última hora lleguen tamién al mercáu con meyor traza: Cuatro pardos, del tantes vueltes citáu nesti artículu Ismael Tomás, y Caminos del mundu, d’Héctor Braga. Necesito de más especiau pa comentalos y de más tiempu pa siguir sintiéndolos. Son, nos dos casos, discos que lleguen pa quedase una llarga temporada ente nosotros, porque en dambos hai materia como pa sentir con gustu.