Blo

< P'atrás  |   P'alantre >


A ritmu de pasudoble

2010 / 10 / 01 - Les Noticies

A ritmu de pasudoble

Lo que pa bien de musicólogos ye’l ritmu más xenuinu de la música española, el pasudoble entra a formar parte de la música popular asturiana a mediaos del sieglu XIX y estiéndese a nos bailles de romería como pieza obligada del repertoriu de los gaiteros y músicos del tiempu a tolo llargo de la primera metá del sieglu XX.

Les bandines más tradicionales llegaron tocando pasudobles hasta los nuestros díes, como lo demostró la grabación que se fizo en vivo na Puela d’Ayande va alredor de cuatro años y como se sigue comprobando en bandines y grupos folixeros más recientes que son los reis de la fiesta práu, como ye’l casu de La Cirigüeña.

Según dalgún de los sos principales estudiosos, como ‘l musicólogu José Subirá, el pasudoble procede la la tonadilla escnénica, una composición que na primer metá del sieglu XVIII valía pa finar los entemeses y los bailles d’escenariu y que, depués, según fue avanzando’l sieglu, empezó a utilizase con entemediu musical nes representaciones de comedia.

Otres versiones, como la de Mariano Sanz de Pedre, apunten a que’l pasudoble toreru, el que s’emplea nes corríes de toros y qu’acabó tamién pasando al folclor popular, podría tener l’orixen en dalguna de les dances fiesteres de finales del XVII. Posiblemente, les de carácter más allegre, acabaron formando parte de lo que col tiempu s’acabaría convirtiendo nel pasudoble.

Con relación al pasudoble que s’interpreta na fiesta de los toros, Manuel Delgado-Iribarren, autor de Los toros en la música, señala que’l pasudoble procede d’un tipu concretu de marcha militar, de compás binariu, que s’orixinaría a partir de la música interpretada poles formaciones de banda na Fracesada y que pasu ente pasu fuera incorporando la población civil.

Ye nesti momentu, a mediaos del sieglu XIX, cuando, fueran los que fueran los sos oríxenes, los compositores del tiempu empezaron a garrar esti ritmu pa trabayar sobre él nueves melodíes, amestándo-y elementos armónicos de la siguidiya, la xota, el boleru… y principalmente incorporando lo qu’en música se llama cadencia andaluza o española.

El xéneru del pasudoble tuvo una especial fortuna dientro del teatru líricu, como s’alvierte nel descomanáu númberu de zarzueles qu’incluyen esti ritmu, principalmente pa da-y casticismu a la obra y tamién pa vincular la temática a Andalucía o al mundu del toréu.

Pero, el sieglu XIX dio enforma más variantes que’l pasudoble toreru, como fue’l pasudoble-romance, el pasudoble-cantar, el pasudoble-baille, el pasudoble-marcha y bien d’otres variantes que s’adaptaron a les característiques propies de cada comarca y rexón o a determinaes actividaes, como ye’l casu del pasudoble adaptáu a les rondes d’estudiantines universitaries o a las filás de les fiestes de moros y cristianos del oriente español.

Los exemplos n’Asturies son múltiples. El romanceru de finales del XIX tá enllenu d’ellos, como puen ser los exemplos de “Clara soi, Clara me llamen” o delles versiones melódiques del tradicional “Don Buisu”. El pasudoble toreru, inesistente prácticamente n’Asturies al nun tar enraigonada malapenes esta fiesta, pervivió nel norte de Lleón y zones del oriente con romances de circunstancia de primeros del XX, como’l que fala del toreru Granero, namoráu d’una asturiana, que muerre na plaza de Madrid el 7 de mayu de 1922 ente les astes del toru Pocapena.

Pero, ente les bandines y nes formaciones de gaita y tambor, garra enforma más presencia un tipu de pasudoble que, de dalguna manera, s’emparenta col tradicional ritmu binariu del saltón y en bien de casos acaba incorporando les sos melodíes, como ye’l casu de la conocida “Villaviciosa hermosa” o de la bien estendida “El mandil de Carolina”.

Esti tipu de pasudoble caltúvose nel occidente d’Asturies hasta feches bien recientes, principalmente interpretaes por gaita y tambor, como tamién nes manes de los acordinistes. Esta parexa de gaita y tambor llega tamien hasta los nuestros díes en bien de comarques del norte y noroccidente zamoranu y del occidente lleonés, afayándose igualmente bien de muestres melódiques en tol planaltu portugués de la otra riba del Douru.

Depues de bien d’años de despreciu per parte de los músicos asturianos, les formaciones nueves acaben incorporando pasudobles a los sos repertorios y, con ciertu conocimientu de los gustos del llugar, toa esa riestra de pasudobles que cuenten una hestoria y que recuerden el ritmu rápidu d’esti modelu de pasudoble que contaba aportó hasta los nuestros díes en tan bones condiciones y con sabor tan dafechamente asturianu por contar con elementos provinientes de la música propia del llugar.

Tengo, como exemplu, puesta de música de fondo de la qu’escribo esti artículu la pieza “Los moros”, na versión del grupu Brandal, pero que dieran a conocer nún trabayu de va años les componentes del grupu Muyeres. Un exemplu de pasudoble folixeru que tanto val pa baillalu como pa pasar un bon ratu sintiéndolu.




<< Volver al llistáu