Blo

< P'atrás  |   P'alantre >


Otra vuelta de tuerca

2010 / 09 / 24 - Les Noticies

Otra vuelta de tuerca

Ensin qu’aparezan en nengún momentu, el presente de la canción asturiana tá enllenu de pantasmes. Como na novela d’Henry James, The Turn of the Screw. Nun se ven, pero habeles hailes.

La pantasma más impresionante ye la del inmovilismu. La constancia de que lo que se vien faciendo ye idéntico a lo que se facía un cientu d’años atrás y qu’ello nun ye sinon lo que yá se venía faciendo d’enantes. Nada menos cierto, lo que nun quita pa que seya una idea xeneralizada.

Gracies a que la hestoria de la canción asturiana ye una hestoria tan reciente que tenemos d’ella constancia grabada, a poco qu’echemos la vista atrás alvertimos la escasa relación que tien el repertoriu de primeros de sieglu col que se vien faciendo anguañu. Ensin qu’ello nun signifique en nengún momentu una ruptura radical. Pero, sí la suficiente distancia como pa dase cuenta de que tamos delantre d’un xéneru en constante evolución.

Cada nueva xeneración tien ente les sos manes la necesidá de dar una vuelta de tuerca y, tres d’ella, acabar convenciéndose que nun se fizo nada más allá qu’un regresu a los oríxenes. Alviértese bien a les clares ente la distancia nes grabaciones del Gaiteru Lliberdón y les de los Cuatro Ases. Como la qu’hubo, en menor intervalu de tiempu, ente les d’estos y les de Juanín de Mieres. Y asina hasta aportar a los nuestros díes.

Esti añu, más escasu de nuevos trabayos qu’otros, vamos asistir a una de les vueltes de tuerca más interesantes de los últimos años. Dígolo depués de sentir esta mesma tarde l’últimu trabayu d’Héctor Braga que va salir en discu nestos prosimos díes. Nun dexa de ser tonada, pero va ser tamién enforma más coses. No obstante, nada tan allonxao como pa dexar de siguir entendiéndose como tonada y, tamién, lo suficientemente diferente como pa les pantasmes inmovilistes de dientro de la canción asturiana lu vean como un estrañu.

Vengo de sentr nesti mesmu tiempu les últimes grabaciones de los Hermanos Valle Roso. Y tamos falando de lo mesmo que con Héctor Braga. Xente que nun escaez d’onde vien y que tien ganes de dir inda más allá. Xente que tien un fondu conocimientu del xéneru col que trabayen y que saben que ye una ferramienta cola que puen trabayar a gustu. Pero, más que nada, xente que tien una perfecta conciencia d’oinde vienen pa esplorar caminos que los lleven a llugares onde dir. Partiendo, siempre, del públicu que tienen, p’aportar a públicos nuevos.

Dalgo que ye una llei xeneral del márketing: nun pierdas al cliente que tienes al dir al alcuentru d’ún nuevu. La música ye un productu más. El cliente y l’espectador son el mesmu.

Y que fale bien de xente qu’arriesga como Héctor Braga o los Hermanos Valle Roso, nun quita a qu’espere con verdaderes ganes el nuevu trabayu d’una voz tan tradicional como la d’Ismael Tomás qu’apuesta por dar una vuelta de tuerca al repertoriu de siempre p’adaptalu a la so voz y a la so manera d’interpretar.

La distancia ye lo bastante grande ente los trabayos d’ellos como p’alvertir que les posibilidaes que brinda la canción asturiana siguen siendo impresionantes. La mesma distancia qu’había nos años cincuenta ente lo que facía La Busdonga y lo que proponía El Presi. La mesma que vimos ente les grabaciones más recientes nel tiempu de Mariluz Cristobal Caunedo y les de María Sánchez Blanco o del Che de Cabaños.

La música, les musiques de toles partes, cuenten con pantasmes idéntiques. Cuando elles puen coles idees y les ganes de facer coses diferentes de los sos intérpretes, la música acaba morriendo.




<< Volver al llistáu