Crisis, ¿qué crisis?

2010 / 09 / 17 - Les Noticies

L’añu entrante ye electoral. Lo que siempre, en términos económicos y en proyectos culturales der tou tipu, ye positivo. Pero, naide escaez que nesta ocasión otres circunstancies adicionales lleven a nun mirar de manera tan positiva un añu asina.

Tovía tamos en septiembre pero, nel ayuntamientu nel que trabayo, tengo una previsión de descensu d’un venticinco por cientu del presupuestu. Aconceyamos varios compañeros de diferentes centros culturales y, en llinees xenerales, el descensu del venticinco por cientu, xeneralízase. Con too, hai un comentariu a medies ente positivu ya irónicu: como les elecciones son nel primer semestre, el descensu del venticinco por ciento –y en dellos casos, de más- va notase principalmente nel segundu.

Bien de grupos de música comentábenme, con relación a esti branu, que l’añu fuera malu. Colo que, si la previsión ye a peor, el branu que vien –el tiempu nel que polo xeneral se concentren la más grande parte de les actuaciones en directo- tendrá de ser catastróficu. Modelu final d’añu, al que yá nun lleguen los presupuestos o aporten bien meguaos.

La disculpa de la crisis dexa de ser disculpa p’acabar siendo la realidá contra la que nos vamos a enfrentar. La situación fuera mala nesti añu. Apunta a enforma peor nel que vien. Y, tampoco ye que naide s’enfote nun ameyoramientu camín del siguiente. Nun esiste más que’l recursu a la esperanza. Que ye’l mesmu que’l de desesperación.

En tiempos asina, siempre va haber un comentarista políticu o económicu que nos recuerde que la palabra crisis nun esiste dafechamente en chinu, porque coincide col mesmu términu col que s’espresa oportunidá. Nada nuevo: los periodos de crisis siempre fueron los momentos de grandes oportunidaes y d’opción polo diferente, pola novedá.

En música, como en tantos otros apartaos culturales, podríamos encontrar exemplos de crecimientu en periodos de crisis y, tolo contrario, en periodos d’espoxigue económicu. N’Asturies, ensin dir más lloñe: la terrible posguerra vio’l surdimientu de la música en directo y de los grandes festivales de canción asturiana. Nos años sesenta, cuando’l momentu económicu yera yá bien estremáu, la música asturiana volvió vivir otru gran momentu, por más que-y tocó’l dificil tiempu del pop y del rock, en franca competencia desleal al traviés de les radiofórmules.

Volvemos a tiempos asemeyaos, anque bien diferentes. Cada momentu tien característiques propies que necesiten, ensin dulda, de recursos tamién diferentes. Un exemplu d’ello vengo de comprobalo esti fin de selmana pasáu en Madrid onde se celebraba la quinta edición de la Noche en blanco. La crisis económica acusóse nun descensu espectacular de los grandes conciertos y de les grandes figures. Pero, más allá de la organización, diferentes entidaes ficieron un ddespliegue d’imaxinación hasta completar una programación a lo llargo de tola nueche del 11 al 12 de septiembre. El públicu, más d’un millón de persones, respondió cola so presencia.

Tamién tuve la santa moral de lleer la programación entera, integrada por más de doscientos actos diferentes. Alcontré forrmaciones de los más estremaos tipos de música y de bien de llugares d’España. Por cierto, non d’Asturies.