Gausón Fernande, l'arte d'enfiñise

2008 / 03 / 21 - Les Noticies

Gausón Fernande ta a puntu de sacar un llibru que se titula “El Paxellu asturianu o Traxe’l País”, que lleva como dedicatoria la siguiente: “A la mio bisagüela y a la mio güela d’El Pedrosu d’Onís que mi h.acieren saber qu’era parte d’una tierra, d’un puelu”.

De Mieres de tola vida –tanto él como yo, que somos d’otra parte arriendes de Mieres-, al lleer esa decicatoria vuelvo cásique trenta años atrás y recuerdo a Gausón en Teberga atendiendo a la mio güela Angelina postrada yá d’aquella na cama. Y recuérdolu de manera especial porque va trenta años yá formábamos parte d’una sociedá tan moderna que nun s’avezaba a tratar a los vieyos como aquel rapaz lo facía, llamando de manera especial l’atención pola so paciencia, pola amabilidá del tratu, por saber escuchar y pol fechu de fala-yos a la xente na so propia llingua.

Y esto último llamaba más que nada l’atención, porque significaba munches coses en xunto: significaba situase nun planu d’igualdá cola xente cola que taba falando; significaba dici-yos a la xente: “soi ún de los vuestros”; y significaba un copromisu, el d’una persona que preguntaba pola cultura de la xente na propia llingua de la xente.

Aurelio de Llano, más de cincuenta años enantes, tamién tuviera en Teberga. La mio güela lu recordaba de manera especial. Yera imposible escaecese: cuida no que sedría ver llegar a un pueblu como’l Vixidel d’aquelles dómines a un puntu vistíu de traxe mil rayes y sombreru canotier. Un estraterrestre anguañu llamaría enforma menos l’atención.

La so presencia significaba, tamién, munches coses en xunto: significaba marcar una gran diferencia, la del home cultu y modernu del traxe cola del probe al que diba entrevistar; significaba tar diciéndo-yos a la xente: “sois parte d’una especie rara a la qu’hai qu’analizar”; y significaba una total falta d’educación, al dirixise a los representantes d’una cultura na llingua d’otra.

L’exemplu d’Aurelio de Llano ye’l más socorríu por mi. Pero en Teberga tuvimos munchos más Aurelios. N’Asturies entero siguimos teniendo Aurelios a manta. Por eso, sigue pagando la pena dedicar tiempu y eloxos a falar de xente como Gausón Fernande.

Porque falar d’él de va trenta años ye tar amentándolu cásique como ún de los padres d’una xeneración que regresó a los pueblos col espíritu dafechamente rompedor de llamar a les coses pol nome que siempre tuvieron y, bien de veces, por ser quién a afayar esi nome de les coses que yá se taba escaeciendo.

Agora mesmo l’éxitu d’un programa como “Camín de cantares” y la esperiencia de sentir falar a Xose Ambás cola xente de los pueblos, invita a pensar que tamos delantre d’una situación de normalidá. Y nada ye más falso. Nun nos llame esto a engañu: siguimos teniendo un cientu d’eruditos reputaos que siguen averándose al conocimientu de la nuestra tierra dende les premises que sustentaron a Aurelio de Llano.

Pero, el que resiste, vence. Gausón sábelo. Y la meyor manera de demostralo ye publicando un trabayu como “El Paxellu Asturianu o Traxe’l País”: porque namás conociendo les circunstancies entiéndese que dalguién puea sacar alantre’l trabayu más impresionante fechu hasta’l momentu sobre’l vistir tradicional asturiano.

Iconográficamente impresionante, el llibru despídese con un ruegu que namás pue facer dalguién que va siguir trabayando nello: el de facer un llamamientu a la xente qu’atesora o guarda nos sollaos de casa un vieyu paxellu o fotografíes familiares del tiempu, pa que les dea a conocer al restu del so propiu pueblu.

A la fiesta de Cuieru, arriba en puertu, ente Teberga y otros conceyos de la rodalada, aportó un día un vieyu ganaderu coles sos caballeríes. Cuando s’averó al tenderete del chigre, les caballeríes quedaron alliniaes y sollertes a la espera de qu’acabara. Taben sueltes y nun s’altereron siquiera col lladrar de los perros nin col trasegar de la xente.

Mio padre, al delláu d’él na barra, preguntó-y sorprendíu:

-¿Cómo se consigue eso?

-Yá too enfiñise –dixo ensin da-y más importancia.

Falar de Gausón Fernande nun ye solo facelo de dalguién que va sacar un llibru que nun debería faltar na biblioteca de naide d’esti país, sinon facelo de dalguién que supo enfiñise no que siempre creyó. Y agora namás tamos delantre que del resultáu d’una parte mui pequeña d’esi enfotu –y digo enfotu porque desconozo si esiste’l términu enfiñimientu.