La xeografía de festivales de música
2010 / 07 / 23 - Les Noticies
Fala Francesc González Reverté nel últimu númberu de la Revista de Gestión y Cultura de la importancia y trascendencia de los festivales de música (y de toa suerte de festivales culturales) na economía y nel desarrollu local. L’articulu titúlase “Los festivales urbanos como herramienta para el desarrollo local” y nél, amás d’un análisis de los retos qu’estos festivales planteen y de los factores qu’actúen como lastre, comenta:
“Los festivales formen parte de les estratexes de desarrollu local y urbanu que tomen la cultura (local o global) como referente o argumentu nun contestu de reorganización productiva de les ciudaes contemporanees. L’enllaz col desarrollu local consíguese mediante la puesta en valor de les particularidaes d’una rexón o ciudá (el patrimonio intangible, musical, festivu, etc.) y mediante la explotación d’esperiencies efímeres (“tómeslo agora o piérdeslo pa siempre”) qu’estimulen l’asistencia. La música como elementu recreativu suxer una manera de facer “audible” la ciudá y d’incorporar un nuevu sentíu a la mirada convencional (visual) del turismo que, amás, condiciona un usu diferente del espaciu públicu”.
La xeografía de festivales de música n’Asturies, n’España y n’Europa nun apara nesti sentíu de medrar. Formen parte del dibuxu d’imaxen de ciudá y tienden a contribuyir al desarrollu económicu (por más que nun hai malapenes estudios d’impactu económicu). Nel casu de los festivales de branu n’Asturies, de gran formatu, xunto a propuestes afianzaes como l’Intercélticu d’Avilés, vuelve con fuerza la segunda convocatoria del de Xixón.
Con too, repasando la xeografía española de festivales, un datu sorprende: esti añu, al menos nel mes de xunetu del que más información tengo, nun hai grupos asturianos nes grandes cites brañegues. Y namás significa que solo topé dos conciertos ente bien d’ufierta de festivales. Ún de Duerna dientro del programa del VII Festival San Juan Folk d’El Arenal de Penagos de Cantabria, la nueche pasada del 26 de xunu. Y otru de De Miguel, Wolfe & Quintana, la nueva propuesta musical alredor de la voz de Mapi Quintana, el 23 d’esti mes na programación de Las Noches de San Francisco de la ciudá de Palencia.
Sorprende l’ausencia asturiana nun alcuentru como’l VII Festival de la Veu de Banyotes, tamién celebráu nos alredores de San Xuan. Esti festival esplora a lo llargo de cuatro díes toles posibilidaes de la voz, enllenando la villa de Banyotes de propuestes artístiques de calidá y pa tolos públicos. El cartel amuela estilos bien diferentes y tá dirixíu a tou tipu de públicu. Nél entra xente como Mercedes Peón, Martirio, Cristina Rosenvinge o Maika Makovski.
Como tamién sorprende esta ausencia asturiana del restu de propuestes importantes del mes de xunetu. Como nel casu del Folk Segovia 2010, con un programa que s’allargó ocho díes y que finó la selmana pasada. Como tampoco nel VI Festival de Música Celta Barrio del Torrero de Zaragoza, nel XV Fescarrer La Xara d’Ondara, n’Alacant, na XIX Magosta Folk de Castañeda de Cantabria, nel Festival d’Hecho, en Huesca, nel Folkmedio d’Olmedo, en Valladolid, nel XIX Pirineos Sur de los pueblos de Lanuza y Sallent de Gallego, de Huesca, nel XIV Etnosur d’Alcalá la Real, de Xaen, nin siquiera nes cites de mayor sonadía del mes como son el XVI Festival La Mar de Músicas de Cartagena, con dieciséis díes de programación musical, y el XXVI Festival do Mundo Celta d’Ortigueira, con cuatro nueces atacaes de grupos de tolos requexos más o menos celtes.
Datos preocupantes.Escasea’l númberu de cites brañegues n’Asturies y nun hai presencia malapenes de grupos asturianos nes programaciones de los grandes festivales españoles. Dalgo tien de tar fallando.