Baxar de la braña
2010 / 07 / 30 - Les Noticies
En bien d’artículos tengo falao de la década de los setenta, un tiempu nel que, coincidiendo cola Transición política, coincidieron diversos mundos musicales y surdieron nueves propuestes que marcaron fondamente la nuestra música popular. Baxo la influencia de lo que venía pasando nel ámbitu del folk notros países, la canción tradicional, el pop del tiempu, la chanson francesa y la nova cançó catalana, diéronse la mano y surdió’l movimientu del Nueu Canciu Astur.
Nun esiste nengún trabayu específicu sobre aquel tiempu y aquel movimientu. Pero, de facese, tendrá de falase más de xente de la que, trenta años más tarde, nada nun se sabe, que de los pocos que, por llegar a gabrar, tuvieron accesu a los sos tres minutos de fama. Asina, pasaos los años, falar del Nueu Canciu Astur y del tiempu acaba siendo facelo poco más que de Nuberu o de Carlos Rubiera.
D’aquel tiempu d’efervescencia y grandes proyectos vien Rafa Lorenzo. Cantautor dende mediaos de los años setenta, un tiempu enantes trayárase poles romeríes de prau col grupu Los Jekes. Como tantos otros, los sos proyectos de grabación nun lleguen a cuayar y acaba dexando la música a primeros de los ochenta, pa nun volver a retomala hasta bien entrada la de los noventa.
Con FonoAstur aparez nel añu 1997 el so primer discu, La otra Asturias, al que lu sigue dos años más llueu A Camín, sobre doce poemes d’Alfonso Camín, del que ye gran almirador. Con Grabaciones Pola edita nel 2003 Sou vaqueiru, primer gran averamientu a la cultura tradicional de la so tierra y familia, nel que vuelve aporfiar en nada con Pabirún, pabirún, editáu nesta ocasión por Trabe. De regresu a la poesía que tanto-y presta, nel 2007 publica Primos hermanos, sobre poemes en gallegu de Federico García Lorca, cola producción de Juan Taboada.
El nuevu regresu al so universu tradicional failo esti añu con Voy pa la braña, nel que combina tanto pieces tradicionales, como “Cantares de Rogelia”, como la so versión del poema “Las abarcas” de Miguel Hernández. Al delláu de cantares d’él y tradicionales, con arreglos más averaos al pop.
Préstenme de manera especial los citaos “Cantares de Rogelia”, nos que suena la voz de la propia Rogelia Gayo Antón, a partir de la grabación que d’ella ficiera Alan Lomax nel añu 1952 nes brañes de Tinéu y L.luarca. Sobre la voz de Rogelia intervién la propia de Rafa Lorenzo creando una mestura qu’atraviesa’l tiempu y que nos devuelve, con una frescura impresionante, la grandeza d’esos sones de la tierra.
Trabaya, igualmente, sobre otres pieces tradicionales, como “Nel campu de San Roque” o “La xota’l valle”, con resultái interesante, p’aportar a una interesante y guapa versión de temes atropaos del Cancioneru d’Eduardo Martínez Torner y acompañaos por un arreglu pa cuerda de Fernando Allen pal quintetu Da Capo.
La braña vuelve asina a dar que falar nesti nuevu trabayu de Rafa Lorenzo y apunta determinaos caminos polos que puen discurrir los sos proyectos futuros. Demientres, vuelvo sentir los “Cantares de Rogelia” que me devuelve dafechamente a la década de los setenta, nos qu’inda se cantaben de manera non anacrónica.