Vezos Astures o la envidia

2008 / 03 / 14 - Les Noticies

Pol fechu de llevar años escribiendo artículos rellacionaos cola música que se fai n’Asturies, tanto nesti periódicu como notros diarios y como tamién notros medios, lléguenme a través del corréu ellectrónicu munchos comentarios y piticiones.

La música ye un tema del que toos tenemos, en mayor o menor gradu, conocimientu. La música ye dalgo que nos vincula, cuando tamos fuera de casa, cola nuestra familia y cola nuestra tierra. La música ye una seña d’identidá que nun tien ideoloxía evidente, por que nos sirve pa mantener esa ideoloxía mínima de vinculanos a una parte del mundu.

Asina, dende’l que pregunta pola tonada arxentina o la gaita venezolana hasta’l que manda la versión del “Chalaneru” que se canta en Valladolid o fala d’un discu pirata de Diamantina Rodríguez en México, el corréu ellectrónicu valióme pa establecer contactos con bien de persones rellacionaes con Asturies de les más estremaes maneres y que por diferentes circunstancies de la vida alcuéntrense lloñe.

Fai esactamente dos meses escribía un artículu sobre’l nuevu trabayu qu’acababen d’editar en formatu DVD la xente de Vezos Astures. Un exerciciu de bon gustu y de material didácticu imprescindicle na biblioteca / fonoteca / videoteca de cualquier bon aficionáu y más que recomendable na de tou aficionáu a les coses d’Asturies en xeneral.

Entós, ¿cómo ye posible que tantos asturianos de fuera y de bien p’afuera me pregunten pola manera de facese con él? A nivel individual mando respuesta, porque hai forma de facese con él nuna determinada dirección. Pero, ¿y a nivel collectivu? La pregunta faise evidente: ¿cómo ye posible qu’organismos del tipu del Conseyu de Comunidaes nun lu mandaran a los correspondientes centros asturianos espardíos pel mundu, el que ensin duda ye’l más importante trabayu visual fechu sobre la danza y el baille asturianu fechos hasta’l momentu?

Nun se trata d’un tema nel que tengamos tanta bayura de materiales que podamos andar faciendo esbilla. Esiste dalgún otru, tamién interesante pero ensin dulda enforma menor, pero “El baille na tradición asturiana” abárcalos y da un pasu más allá al ufiertar una apuesta tradicional a la vez que vanguardista. Pol simple fechu d’amosar el baille desnudu. Pola gran virtú de plantear un puntu y aparte y servir de material tanto pal que quiera respetar la tradición como pal que quiera, a partir de los pasos tradicionales, construyir una danza nueva.

El primeru de los correos preguntándome por esti DVD llegóme de Suiza, como nun podía ser menos d’una tierra na que siguen viviendo tantos asturianos, tantos fíos d’asturianos, tantos ñetos y demás. Detrás d’él un verdaderu ábanu: lo que pal que quiera tener un númberu como referencia podría indica-y que más de cien. Lo que pal ámbitu del que tamos falando -la música- y pal tema más qu’esclusivu dientro d’esi ámbitu –la danza-, significa una cifra descomanada.

La pregunta cásique retórica fecha sobre’l llabor del Coseyu de Comunidaes podría estendelu a tantos otros trabayos importantes que por dalguna estraña razón nun llegaron a los sos destinatarios de l’Asturies de fuera. Trabayos que, gracies a los sistemes magníficos de piratería, nun-yos costó tanto trabayu facese con ellos. Dalgo que, tamién tristemente, tendrá d’acabar ocurriendo con ésti.

Esti fin de selmana pasáu presentóse’l DVD nel teatru de la Casa de Cultura “Teodoro Cuesta” de Mieres y contóse cola presencia de Ramón Lluis Bande, como director del DVD, de Fernando Ornosa, como ún de los responsables de la producción del proyectu, y Heliodoro Díez, como miembru del propiu grupu. A ellos mesmos-yos dirixí la pregunta. La respuesta –o respuestes-, diríxenos directamente a la nuestra Asturies profunda: la de la envidia, la que prefier quedar tuerta si’l contrariu queda ciegu, la que va cumplir por siempre la imaxen lliteraria del burru del hortelanu... la que nun paga la pena.

Nun se trata más que d’una manera de triunfar a l’asturiana. Un mecanismu ocultu nel subconsciente collectivu d’esti pueblu.

Una vez escribí un artículu que se titulaba “Diamantina Rodríguez o la envidia” y que falaba de la supuesta incomprensión del tiempu, que nun yera tal sinon envidia antroxada. Cenciellamente ocurría que naide vendía los discos qu’ella vendía, nin naide aparecía nel programa de la televisión “La casa de los Martínez”, el más vistu del tiempu, nin naide yera tratada como estrella al so nivel.

Tamién me tocó escribir el de “Hevia o la envidia”, sobre aquel gaiteru que enantes d’imitase a sí mesmu ficiera un discu rompedor que vendió un par de millones d’exemplares. Nel so casu la envidia pudo con tantos gaiteros que munchos equí n’Asturies nun llevantaron más cabeza dende aquella.

Dende entós fice munchos más na radio dedicaos a la puta envidia, porque se trata d’un mediu que llega mui biena la xente y que permite poner exemplos sonoros de los que cuentes. Cuando fice “Anabel o la envidia” sentó tan rematadamente mal que me sirvió p’alvertir que diba convertise na gran estrella de la tonada y de la canción asturiana qu’agora ye.

Y agora tocóme esti “Vezos Astures o la envidia”. Asina de simple ye: esta ye la midida del éxitu n’Asturies. Tala ye la mediocridá de bien de la so xente. Pero trátase d’una mediocridá magnífica yá que nos val como baremu de la midida del triunfu. Del verdaderu valor de les coses bien feches.