La Praviana
2010 / 06 / 18 - Les Noticies
Nel iviernu de 1889 a 1890 ocurrió un fechu notable na vida cultural de Madrid de la que la pequeña tertulia de pintores que s’axuntaba nun mínimu local de la cai Abada decide ampliase treslladándose a la cai Libertad y adoptando’l nome de Círculu de Bellas Artes. El pianista Isaac Albeniz, el violonchelista Agustín Rubio y el violinista Enrique Fernández Arbós van participar aína nes velades artístiques y na vida social que se desarrolla na institución.
Fernández Arbós cuéntalo asina: “Concurríamos toles nueches. La tertulia facíase xeneral; xugábase al tresillu, al billar, charrábase, discutíase y reíase. Dacuando facíamos música en serio”.
Ún de los cantares de moda d’aquelles velades yera un lied compuestu pol pianista asturianu Saturnino del Fresno y Arroyo y qu’interpretaba maxistralmente’l cantante italianu afincáu en Madrid Antonio Baldelli y que llevaba por títulu “La Praviana”. Cinco años atrás los dos músicos, pianista y cantante, viaxaran dando conciertos por Portugal, Francia y España y la so sonadía nun dexaba d’espardela tola prensa de la época.
Esi branu de 1890 Agustín Rubio vien a braniar a Avilés, refuxu qu’emplea pa sacar alantre una serie de composiciones que tien en mente. En nada va a formar parte del Quinteto Albeniz, una de les agrupaciones camerístiques de mayor relevancia a finales del sieglu XIX.
Coincidiera aquel branu con Saturnino del Fresno que pasaba unos díes n’Uviéu xunto a los suyos de regresu de la última xira de conciertos, pero nun queda nenguna constancia de que tocaran nada xuntos, por más que yá d’aquella nos salones busgueses de la villa avilesina punxérase de moda’l Primer Capricho Pot-pourrístico sobre cantos populares de Asturias compuesto para piano, de Rufino González Nuevo y Miranda, publicáu en Madrid en 1885 y distribuyíu n’Asturies pol almacén de música de Víctor Saenz, d’Uviéu.
Nuevo y Miranda naciera n’Avilés en 1831 y n’aquellos años yera director de la banda de música La Lira, de L.luarca. El so Capricho, a la manera de suite, taba integráu por quince pieces populares asturianes colos sos correspondientes testos lliterarios, amás d’una “Zarabanda asturiana al son de gaita y tambor”, ensin lletra, que sirvía como cierre pa llucimientu del pianista acompañante. La segunda de les pieces asturianes d’esta suite yera “La Praviana” que yá d’aquella interpretaben de manera popular los cantadores de la quintana acompañaos a la gaita.
L’exitu d’esta pieza fuera tan grande qu’acabó empleándola’l dramaturgu Vital Aza nel empiezu de la so obra La Praviana, pero faciéndo-y na so estrena’l 8 de febreru de 1896 el flacu favor de que la interpretara’l personaxe de Ramona, una mozona braca que la canta al altu la lleva pero bien desentonada pa provocar la risa fácil. Namás nel actu XII el personaxe de Julia recupera’l cantar y esta vez conviértela na so versión nún de los grandes motivos del éxitu de dir a ver la obra.
Que se sepa enxamás nunca volvieron a coincidir Agustín Rubio y Saturnino del Fresno. El primeru d’ellos marchara pa Inglaterra y afincárase nel barriu de Chelsea, centru artísticu onde s’asitiaben los estudios de los artistes emerxente de la dómina. Pola contra, Saturnino del Fresno, cansáu de dar vueltes pelos escenarios del mundu, tornó a Uviéu al poco del cambiu de sieglu pa ser profesor interín de l’Academia de Música de San Salvador, garrando la titularidá de la plaza en 1916.
Agustín Rubio siguió viviendo en Londres hasta la so muerte’l 4 d’abril de 1940, pero tovía tuvo tiempu de conocer al exiliáu Eduardo Martínez Torner y interpreta-y al violonchelo la versión que guardaba na memoria d’aquella pieza que fuera un éxitu tremendu a finales del XIX y que-y valía más que nada pa empaña-y los güeyos cuidando la de tiempu que diba tardar en tornar a casa. O quiciás camentando qu’enxamás nunca diba facelo.