Enrico Tamberlick

2010 / 06 / 11 - Les Noticies

La primera vez que se cantó riba d’un escenariu fue la tarde del 2 de xunu de 1882. Aquel vienres terminaba n’Uviéu la temporada d’ópera y facíalo con una función organizada pol poeta y director de la banda, Teodoro Cuesta, y el músicu y compositor Anselmo González del Valle.

El domingu anterior, el famosu tenor Enrico Tamberlick asistiera con ellos dos a la misa solemne de San Cloyo que daba empiezu a les fiestes. Dos momentos musicales-y llamaron poderosamente l’atención. El primeru, cuando en medio de la misa un cantador de la quintana interpretó un Kyrie a la gaita. El mesmu que, acabante l’actu relixosu, nel práu de delantre la ilesia interpretó media docena más de tonaes, segundu de los momentos que lu sorprendieran.

Enrico Tamberlick fuera contratáu pol Teatru Colón de Buenos Aires pa la so inauguración, el 25 d’abril de 1857. Amable, encantador y siempre con ganes de facese col públicu que tanto lu adoraba, interpretó d’aquella un fragmentu del himnu nacional arxentín. Fuera una verdadera llocura, cuenten los medios escritos de la época. El públicu en pie sobre les butaques de cueru estrenaes pa la ocasión siguiólu dende la segunda llinia hasta’l final de la interpretación. Depués, como la tradición manda que se faiga colos grandes diestros nes tardes de gloria, sacáronlu en volandes y cruzaron con él l’amplia avenida de Colón hasta’l cai de Puertu Maderu nel Mar del Plata.

La so voz sobresalía nes interpretaciones de Bellini, Rossini y Verdi, y de la so intervención nel Fidelio de Beethoven dixo Héctor Berlioz na so obra Les soirées de l’orchestre: «Naide d’ente los músicos diz palabra. Los güeyos de tolos artistes brillen, los de los músicos simples arremellen, los de los imbéciles tranquen. Tamberlick revoluciona la sala. El momentu escita l’entusiasmu más violentu. Depués del gran final, Kleiner Elder esclamó: ¡Esta música árdeme nel estómadu! Parezme que llevo bebíos quince vasos d’oruxo”».

Enantes que cantu estudiara teoloxía y debutó en Nápoles en 1841, con ventiún años. La grandeza de la so voz yera tan impresionante que se lu noma en San Peterburgu cantor de la corte imperial. Los sos éxitos en Roma, Lisboa, París, Madrid o Buenos Aires conviértenlu na voz d’ópera más reputada de finales del sieglu XIX. De xira por mediu mundu, averó con sesenta y dos años a la temporada d’ópera del Teatru del Fontán d’Uviéu.

Aquella tarde de les fiestes de San Cloyo alvirtió nes tonaes que sentía interpretaes a la gaita que taba delantre d’un xéneru con unes característiques vocales que lu averaban a les napoletanes de la so tierra, pa les que non solo se necesitaba tener unes cualidaes vocales escepcionales pa ser a interpretales, sinon qu’amás atesoraben na so cenciellez una belleza musical inmensa. Asina-yos lo fizo saber a Teodoro Cuesta y a Anselmo del Valle, y dambos convinieron con él que yera ciertu’l so argumentu.

Asina, cuando por mor de los preparativos de la clausura de la temporada, decidieron organizar un gran festival musical, Enrico Tamberlick dispúsose a cantar nel cierre una tonada a la gaita acompañáu pola orquesta. La perspectiva del tremendu éxitu que diba collechar esta iniciativa movió a Alselmo del Valle a animar a Teodoro Cuesta a componer una tonada d’urxencia pal eventu. Al día siguiente, el gran poeta presentaba a los sos compañeros la so composición “Ayer me dixo to madre”.

Les males llingües contaron que tuvo más que ver nel asuntu la cantidá de sidra bebida na tarde festiva en San Cloyo que l’interés musical de la propuesta. Pero la maledicencia de la xente escaez que’l día enantes del magnu festival del Teatru del Fontán, durante les fiestes del Corpus Christi de Trubia, Enrico Tamberlick estrenó “Ayer me dixo to madre” a la gaita nel so ambiente. Yera lo que quería, saber si’l so públicu natural lu aceptaba como cantador de la quintana, más allá de los aplausos de la busguesía pagada d’ella mesma que frecuentaba la ópera nuna ciudá de provincies d’un país que nun diera siquiera nengún compositor d’interés al mundu de la música.

Una vez que comprobó ante aquel públicu espontaneu que yera creible la so interpretación de “Ayer me dixo to madre” sintióse con fuerces pa llevala al escenariu aquella tarde que tovía se recuerda del 2 de xunu de 1882. La memoria d’aquella interpretación y la guapura de la tonada ficieron que tovía anguañu se siga interpretando. Por más que bien poca xente recuerde que se trata d’una composición de Teodoro Cuesta.

El periódicu El Carbayón comentaba al día siguiente: «La gaita acompañaba a la orquesta y actuó tola compañía y fue la función tan esperada que llegaron a pagase trenta riales por una butaca (…) Desaparecía’l Tamberlick de Lucrecia pa dar llugar al Tamberlick d’Asturies».