Hai una lletra cantada
2010 / 05 / 28 - Les Noticies
Fuera de lo que ye’l circuitu normal de distribución –si se pue dicir que queda dalgo que se puea llamar en música grabada un circuitu normal de distribución- lleguen al mercáu delles grabaciones que nin esperes nin sabes nada d’elles. Bien de veces, la sopresa ye positiva.
Pasárame va dos domingos. Frecuento nel mercáu de los domingos de la Plaza de Mieres del Camín la Casina Musica de Lito, un puntu nel que facese tovía a estes altures del sieglu colo último de lo último en formatu casete o coles grabaciones más rares y pirates qu’aparecen en CD y que nun saben d’ónde vienen anque sí se sabe asgaya a quién van dirixíes.
Lito tienme dende va años al tantu de lo qu’aporta de manera normal al mercáu y de toa esa otra serie de productos que, d’otra forma, queden en circuitos tan restrinxos que nun hai manera de saber d’ellos. Nesta ocasión toi refiriéndome a un doble CD que tien nada menos que 44 tonaes y que se titula “Hai una lletra cantada”, col indicativu publicitariu de ser una Antoloxía de la Canción Asturiana en Samartín del Rei Aurelio. Con fot del Pozu Sotón na portada.
Pa facese cargu d’esos 44 temes voces nueves y hestóriques: Arturo García, Alfonso Llaneza, Alfredo Canga, Andrés Collado, Arsenio Fernández-Nespral, Aurelio González Fueyo, Benjamín Ceñera, Graciano Fernández “Cholín”, Diagmina Noval, Eloy López, Emi Fanjul, Felipe de Carrocera, Fidel Díaz, Gerardo Orviz, Jeremías Cuello, Jesús Alonso, Juanjo Martínez, María Luisa Díaz, Marcelino Fernández “Tarín”, Manuel González “Kiko”, Noelia de Dios, Pablo Carrio, Pilar Barreñada y Raúl Díaz.
Esti domingu pasáu falóme d’el Gerardo Orviz nel trescursu del descansu de la tercera final del Concursu y Muestra de Folclor Ciudá d’Uviéu. Detrás d’un proyectu d’estes característiques taba xente como él y d’ello respuende qu’a la convocatoria acudiera tanta xente.
El doble CD tien un primer apunte positivu: el de ser quién a amosar a xente tan estremada y natural del mesmu conceyu. Una prueba de la importancia de la tradición nel llugar, pero tamién, dada la mocedá de bien de les voces, de cómo esta tradición perpetúase nel tiempu. Pablo Carrio, que vien de ganar l’apartáu de tonada masculina de L’Entregu, ye un bon exemplu d’ello. Interesante, amás, nun añu nel que l’apartáu femenín lu gana Marisa Valle –lo que yá nun causa nenguna sorpresa.
El segundu apunte positivu tien relación col propiu folletu del CD, dalgo a lo que nun s’aveza nesti tipu de grabaciones: tolos intérpretes tienen foto y un pequeñu apunte biográficu. Suficiente pa valorar al cantador, enantes de facelo pola propia calidá de la so interpretación.
Lo que me lleva al tercer apunte positivu: al ser tanta xente hai exemplos de calidá pa tolos gustos, pero ensin dulda la llinia xeneral fala a favor d’una iniciativa d’estes característiques. Tonaes complicaes en voces hestóriques y voces valientes y, en xunto, un ampliu repasu a lo meyor de lo meyor de lo que vien sonando estos últimos años en concursos de tonada.
El títulu del doble CD fai referencia a la tonada “Hai una llinia trazada”, que canta Manuel González “Kiko”. Un verdaderu himnu a Samartín del Rei Aurelio y una pieza obligada nel repertoriu de tou bon cantador que se precie.