El saltón del gochu
2010 / 05 / 21 - Les Noticies
El saltón (Piophila casei) ye un tipu de mosca que, nel tiempu de larva, fue una plaga importante del quesu y de la carne de gochu. Inda, en bien de llugares, sigue siéndolo. Sicasí, n’Asturies, poles midíes hixéniques tomaes na matanza, acabó perdiéndose la noción de la so importancia y el fechu de la llaboración d’una serie de rituales musicales que propiciaben el que la plaga nun añerara na carne.
Nel tiempu nel que la matanza del cerdu yera un momentu d’especial importancia na vida económica d’una familia y d’un pueblu, el saltón yera una plaga temida. Les larves del saltón posábense na carne y yeren quién a blincar hasta 25 centímetros, de manera qu’acaben infestando tola producción de la matanza. De manera que, trescurríu un tiempu, les larves convertíense en mosques negres con güeyos de color arroxao y esnales iridiscentes.
El vezu d’espantales corría al cargu d’un gaiteru y fízose estensible a un tipu de baille de fuerte ritmu y movimientos abultaos. Nun sabría dicir si esta profilapsis tendría resultaos positivos contra la plaga, pero’l nome de saltón treslladóse al modelu de baille y llegó como tal hasta los nuestros díes.
Nun se trata d’una plaga que tuviera incidencia única n’Asturies, sinon que notres partes d’Asturies recuéyense rituales d’estes característiques como pa ser a desaniciales. Asina, nel Campu de Montiel, en plena Mancha, en frecha tan cercana como mediaos de los años setenta del sieglu pasáu, el folklorista Carlos Villar Esparza recueye esta práctica, escribiendo d’ella na Revista de Folklore númebru 274 del añu 2003: “Na fría nueche na que la familia y los amigos facíen les matances, había allegre baillotéu. Baillábase’l “saltón”. Baille y música teníen la virtú máxica de protexer la carnede los cerdos sacrificaos de los ataques del guxán nomáu saltón”.
Col tiempu, el saltón acabó siendo una de les pieces obligaes del repertoriu del gaiteru y ún de los bailles que más prestaxaba al que sabía baillalu, pola dificultá de los sos pasos y el fuerte ritmu col que s’interpretaba. Emperentáu melódicamente y, anque a más grande velocidá d’execución, coles melodíes de dellos ramos, los saltones integren dellos momentos del repertoriu más característicu de la música asturiana.
En delles partes tamién se lu conoz colos nomes de xiringüelos, llixeros o saltiqueres. Pero, con too, el nome del saltón aportó con plena vicencia hasta los nuestros díes, valiendo pa xeneralizar los de toles sos variantes. Por más que, de xuru, el so nome nun vaya más allá del sieglu XVI o XVII, momentu nel qu’esta plaga de la carne algamó característiques d’epidemia.
El nome d’esti baille, por ello, num vendría de los blincos (“saltos”) que desarrollen los bailladores na so interpretación. Que, mirándolos detenidamente, tampoco lo son más que los propios del pericote o de los fandangos. Con too, el nome acabó incidiendo na deficinición del baille,de manera que la mayor parte de les referencies que d’él se fain llamen l’atención sobre lo desmesurao de les sos figures.
De cierto, lo dafechamente importante del baille, ye’l ritmu. Dalgo que vuelve a entroncar col propiu de la mayor parte de los ramos y que nos vuelve a recordar que se trata d’ún de los ritmos más característicos d’esta tierra y anterior a la implantación de los fangangos, les xotes o les muñeires.