Blo

< P'atrás  |   P'alantre >


Armes cargaes de futuru

2010 / 05 / 14 - Les Noticies

Armes cargaes de futuru

Vengo de sentir la nueva “Xota de Payares” grabada por Mapi Quintana, acompañada al piano por Jacobo de Miguel, a les cuerdes por Michael Lee Wolfe y a les percusiones por ella mesma, y cuéstame creelo. Yera difícil superar la maestría de voz y músicos que desplegara la so grabación El sonar de les semeyes. Pero, sintiendo esti tema otra vuelta grabáu, vese que fue quien a ello. Superándolo enforma. Llogrando que suene a más “Xota Payares” que nunca.

El padre d’esta grabación ye Ramón Lluis Bande, pal programa Pieces de la TPA. Inda más impresionante. La imaxen amuesa un compendiu únicu de música asturiana. Un compendiu que fala a les clares de qu’esiste más futuru que pasáu. Mapi Quintana vuelve tar maxistral. Reinventándose a ella mesma. Sabiendo emplear la voz como nadie. Sabiendo xuntase colos músicos necesarios.

2010 va ser añu de grandes novedaes y de mayores esperances. Muncha xente con ganes de facer coses nueves vien con un proyectu baxu’l brazu. Como siempre, la más grande parte d’estes novedaes vien de la mano de la canción asturiana. Vien ocurriendo los últimos cien años. Pero, agora, col nuevu sieglu, como yá ocurriera a primeros del XX, la canción asturiana vuelve a querer dexar claro que’l futuru tiren de vorver a ser d’ella.

Vímoslo va nada col trabayu de Verdasca. Un folk que sabe echar mano de la voz más propia, la de la tonada. Xente mui mozo qu’ufierta con un elementu tan cenciellu la so firme decisión de tener un llugar propiu dientro de la música asturiana.

Tamién vamos velo dientro nada col nuevu trabayu d’Héctor Braga. Que va ser, en bona midida, doble. Per un lláu, un trabayu propiu, continuador del que ficiera en Trad.ye. Per otru, el correspondiente a la producción musical del nuevu d’Anabel Santiago. Un Héctor Braga meyor que meyor nel ámbitu vocal (llegando, por exemplu, a la fase final del Comcursu y Muestra de Folclor Ciudá d’Uviéu).

Alviértese n’Héctor una meyora sustancial de la voz d’un discu a otru. Del primeru al segundu’l blincu ye tremendu. Del segundu al terceru tamién se va notar. Héctor, na mesma midida que selu ve más sueltu sobre los escenarios, va sintiéndose seguru col instrumentu que meyor quier dominar: la so voz.

Y, como dicía, tamién va ser interesante descubrir la so mano nel nuevu trabayu d’Anabel Santiago. Llevaba tiempu con bien de ganes de facer coses diferentes y una forma d’intentalo yera cambiando de músicos y de producción musical. Sabe facelo. Yá lo ficiera ente Al son de la lluna y Anabel Santiago canta a Diamantina, el so trabayu más impresionante y que más grande güelga tien dexao nel propiu campu del que procede. Va poco, ente bambalines del Teatru Filarmónica, una cantadora de tonada comentábame les ganes que tenía de grabar un discu. Comenté-y lo fácil que yera nestos momentos, coles ayudes y los medios qu’hai pa ello. Díxome: “Yá, pero ye que quiero facer un discu como’l d’Anabel a Diamantina”. La idea tá clara: un discu que la propia Diamantina, presente na grabación, firmaría como propiu. Un discu clásicu, ensin dexar en nengún momentu de ser modernu.

Hai más novedaes en puertes. Lo prósimo de los Hermanos Valle Roso. Dieron un adelantu na Selmana de les Lletres. Canciones asturianes nueves a partir de textos de poetes asturianos actuales (Esther Prieto, Berta Piñán, Antón García, Xosé Antonio García, Xuan Bello…) y poetes universales de siempre (Omar Khayyan, Ibn Hazm de Córdoba, Kavafis, Ana Ajmatova, Fernando Pessoa…). Nueves, pero planteaes de manera que suenen a canciones asturianes de siempre, con dos voces que saben combinase pa facelo posible de manera natural. Dos voces que son, como la propia voz de los poetes que vienen utilizando, armes cargaes de futuru (Gabriel Celaya, contaba).




<< Volver al llistáu