Suarías, ente l'asturianada y la montañesa

2010 / 05 / 07 - Les Noticies

Suarías queda un poco a desamano. Más que nada avezaos como tamos a mirar el nuestru mapa dende’l centru. Como’l Valledor, na otra punta. Pero, depués, viéndolu dende’l sitiu daste cuenta que los que tamos a desamano somos tolos del centru. Diba años que nun pasaba pela Peñamellera Baxa. Dellos más pela Alta. Como la Baxa ye camín de pasu a llugares como Fuente Dé, Potes y Santu Toribiu de Llébana, acaba visitándose dalgo más. A l’Alta hai que dir porque sí, yá que la carreterina de siempre faite dar munches vueltes qu’agora t’aforra la de la costa (por más que’l tramu Unquera-Llanes vaya camín de nun llegar a velu fináu la xente de la mio xeneración). Y llegué a Suarías cola bona disculpa de ver l’Archivu Carlos Jeannot que s’inauguraba aquel mesmu día. Una casona de pueblu, empleada na planta baxa pola xente de l’Asociación la H.orma y que na superior daba abellugu a la colección personal de recuerdos y presentes del periodista citáu, la más grande parte d’ellos vinculaos a la canción asturiana. Nuna gran pantalla de televisión alcontré les imáxenes d’ún d’aquellos programes dirixíos y presentaos por él y grabaos en Teberga. Y, a partir d’él, los de tantos otros llugares que me devolvíen al tiempu nel que se grabaron, venti y venticinco años atrás. Bien d’ellos que recordaba y bien d’otros de los que m’escaeciera. Con esa disculpa de la inauguración diose cita en Suarías una llarga nómina de cantadores de tonada, gaiteros y demás xente relacionao cola tonada. A la tarde, como parte del actu, hubo una bona amuesa de lo meyor de los presente, del occidente al oriente, pasando per esi centru que dexa de selo visto dende ellí. Nun paga la pena citar a tol mundu, pero pel escenariu desfiló dende les bromes asainetaes de Folixa Astur (El Maestru y El Pravianu) a les canciones de la Coral de Piloña (que depués, al atapecer, quedó atravesada en mitá de la carreterina de baxada a Panes por mor del tamañu del autobús contratáu y por aciu de los coches mal aparcaos contra les sebes y atropando’l camín). Y, más que nada tonada, na voz de campeones como Celestino Rozada o Marisa Valle, a xente que lleva años y sigue coles mesmes ganes qu’al principiu, como Nori Redondo o Salvador Vázquez. Un Archivu d’estes característiques nun sé si va consiguir llevar muncha xente a Suarías, pero ye de reconocer l’empeñu de la xente de La H.orma y del propiu Carlos Jeannot. Una vez ellí, el propiu llugar, la casa na quque s’afaya, el pueblu nel que s’asitia y el conceyu y la comarca, convierten en bona la visita. Depués, al atapecer, falando de les coses del día, llegó’l momentu de facer memoria de toa esa xente que tuvo una vida dedicada a trabayar pola música asturiana y tolo que llogró alcontrar guardólo pa él y, les más de les veces, llevólo con él al cagüercu. Seguro que tais pensando en dalgún que tovía tá vivu. Yo toi, arriendes, pensando en dalguién que yá tá muertu. A lo meyor, l’aportación de Carlos Jeannot ye mínima. Pero, por mui mínima que fuera, al dala a conocer conviértela en un cientu de veces más grande que la del más grande folklorista pagáu d’él mesmu que nun devuelve al so públicu natural lo que tomó prestáu d’él. Como hai bien d’asociaciones que, como’l Cantu la H.orma, tienen pequeños espacios nos sos pueblos y conceyos, que bien podríen servir como nesti casu pa dar a conocer la so proppia tierra y los sos propios vezos, non solo a los que venimos de fuera sinon a los propios estranxeros d’ellos mesmos. Un día guapu. Con sol y con agua, poco. Una tarde fresca. Y bien de ganes de repitila. Espero que los organizadores s’animen a convertirse nuna referencia de la canción asturiana del oriente d’Asturies. Un puntu perfectu d’alcuentru ente l’asturianada y la montañesa.