La conquista del pan

2010 / 04 / 30 - Les Noticies

Les priese enxamás son bones conseyeres. Depués d’acabar l’artículu que lleva’l llibru regalu d’esta edición de la Selama de les Lletres dedicada a Xosé Antonio García, Pin, y d’atropar los artículos que lu componen y d’aporfiar polos que nun llegaron, empecé a recordar una montonera más de temes y a una montonera más de xente que tenía enforma que dicir sobre él.

Y una de les primeres surdióme en Teberga, de resultes d’un alcuentru que facemos tolos años unos cuantos amigos y que nos lleva como siempre hasta La Chabola de La Plaza. Yá se sabía pola prensa que la Selmana de les Lletres diba dedicada a Pin y una conversación telefónica vino a recordame’l branu nel que pasó unos díes con nosotros. El llibru de cabecera del tiempu yera La conquista del pan, de Pedro Kropotkin:

“La humanidá caminó enforma dende aquelles remotes edaes nes que vivía l’home de los azares de la caza y nun dexaba a los sos fíos más heredá qu’un abellugu baxo les peñes, probes instrumentos de sílex, y la Naturaleza, contra la que teníen que lluchar pa siguir la so mezquina esistencia. De toles formes, nesi confusu periodu de milenta años, el xéneru humanu acumuló inaudites ayalgues. Llantó’l suelu, desecó los pantanos, fizo seches nos bosques, abrió carriles; edificó, inventó, observó, cuidó; creó instrumentos complicaos, arrancó los sos secretos a la Naturaleza, domó’l vapor, tantu que, al ñacer el fíu del home civilizáu, atopa anguañu al so serviciu un capital inmensu, atropáu polos sos predecesores. Y esi capital permíte-y algamar riqueces que superen los ensueños de los orientales nos sos cuentos de Les mil y una nueches.

(…) Somos ricos, enforma más de lo que cuidamos. Ricos polos que poseemos yá; inda más ricos polo que podemos consiguir colos instrumentos d’agora; dafechamente más ricos polo que pudiéramos obtener del nuestru suelu, de la nuestra ciencia y de la nuestra habilidá técnica, si s’aplicaran a procurar el bienestar de toos”.

Regreso asina a lo que fuera la Biblia de los nuestros pocos años y sorpréndome de que siga teniendo esti llibru nel mesmu estante que la Odisea, el Lazarillo de Tormes, los poemes de Cavafis o El Gatopardo, otres biblies d’otros tantos momentos. Un textu, el de La conquista del pan, que me devuelve inmediatamente a los diecisiete años y que me trai, como’l vino malo que siempre se bebió nes tasques de Teberga, la memoria de los sueños que nunca llevaron a nada y que tampoco s’echaron de menos.

Aquellos primeros díes del branu aprovechamos pa subir la Siel.la de la Pena Sobia y llegar hasta la braña de L.lamaraxil pa baxar pol val.le del Troncu, del que contaben los de casa que nun entraba nin siquiera la Guardia Civil nel tiempu de los fugaos. Ellí, siguiendo los pasos de los Diarios del Che, vimos les posibilidaes d’un llevantamientu armáu a la manera cubana, intentando sobre’l tarrén subsanar los problemes qu’alvertíamos en Bolivia a través del testu.

Depués, coses tamién del tiempu y de la edá nuestra, baxamos a Samartín a fiesta. Cinco kilómetros a pie más los cinco de la vuelta. Pero les ganes de fiesta -y lo que se siguía faciendo en pueblu en tiempu de fiesta colos amigos con ganes de fiesta- fízonos escaecer los planteamientos cubanos p’acabar quedándonos cola poesía de La conquista del pan. Y aquella llamada de teléfonu que tuviera esti día atrás de la que volvía tar en La Plaza de Teberga tuviera muncho que ver con esta hestoria. Nel mesmu sentíu, al Che nun-y valiera gran cosa Tania en Bolivia más allá de lo que la Madalena a Xesús de Nazaré. La poesía pudo más que’l misticismu de la llucha armada o que la redención de los pecaos del mundu.