Camín de Cabreira, de Suarías, d'Arroes
2010 / 04 / 23 - Les Noticies
D’estrena d’esti nuevu sieglu escribí una serie d’artículos pal diariu La Nueva España sobre diferentes comarques de Lleón y Zamora que depués se publicaron baxo’l títulu de L’Asturies Cismontana (Ámbitu, 2003). Entre ellos ún doble dedicáu a Cabreira, L’Alta y La Baixa. Enantes, gracies a la insistencia de Gausón Fernande, escribiera sobre esta comarca qu’aportaba a la modernidá a reblagos naguando por salir d’años d’abandonu ya incomunicación que-y valieron pa caltener unes señes arquitéctóniques y culturales que n’otres tierres de los alredores yá fueran desapareciendo décades enantes.
Volví visitar Cabreira de la mano de Camín de Cantares. Nun lo ficiera en directo por nun tar equí’l día d’emisión, pero la maravía del youtube permite que nun queden atrás preciosidaes como ésta. Nun lo fice solo. Más de dos mil visites refrendaben que’l programa tuviera interés asgaya como pa aparar unos minutos a sentilu y a velu. Otros programes, con un númberu enforma mayor de visites a través d’esta páxina d’internet, vienen a demostrar que tamos delantre d’un trabayu bien fechu y un bon comunicador –elementos fundamentales detrás de cualquier productu audiovisual-, pero tamién d’un productu que tresciende l’ambitu del fechu televisivu p’asitiase na nuestra memoria como un bien cultural.
Yá perdí la cuenta de cuantes temporaes lleva emitiéndose Camín de Cantares, pero inda recuerdo la primer vez que Ramón Lluís Bande me faló d’ello como un pequeñu proyectu que namás tendría la vida de los primeros capítulos programaos. Sonriólos l’exitu d’una manera que sorprendió a los propios directivos de la TPA, pero más que nada a los propios asturianos: pola primer vez vieron a los sos padres y güelos falar na so propia llingua y cantar los cantares de la so tierra con dalguién que los trataba de tu a tu. Un ingrediente revolucionariu, la llingua. Dalgo qu’acabó resultando col tiempu que yera’l meyor de los medios p’averase a la xente. El más evidente. Pero’l que non por evidente s’empleara más davezu.
Esti fin de selmana pasáu averé al pueblu de Suarías a la inauguración del Archivu de Carlos Jeannot nuna de les cases de la entrada del pueblu. Un llugar apartáu, pero magníficu, con unos vecinos que se volcaron na celebración y con una montonera de xente llegaos de tolos puntos d’Asturies –principalmente vinculaos a la canción asturiana- qu’apoyaron cola so presencia y los sos cantares esta inauguración y la propia figura del homenaxeáu que da nome al Archivu.
Ún de los programes de televisión del citáu Carlos Jeannot grabóse, cuido qu’a finales de los ochenta o mui a primeros de los noventa, en Teberga, alredor de la ermita del Cébranu. Poco enantes ficiérase otru en Quirós nel que tamién interviniera xente de Teberga, miembros d’aquella del grupu Seronda. Tenía bon recuerdu de los dos programes y aproveché que taba en Suarías pa revisalos, acompañándome pa la ocasión el director de Seronda, venti años depués de les imáxenes grabaes. Pregunté-y, tres de velos, pol archivu del grupu y contóme de primera mano una hestoria que yá conocía: la de la so desaparición en manes de dalguién qu’entiende’l patrimoniu de toos como una propiedá privada.
El xestu del propiu Carlos Jeannot de poner a disposición de tol mundu’l so Archivu, como’l de tantos otros investigadores qu’asina lo faen, ye un xestu que lu honra y qu’amuesa que más allá de la so vida profesional esiste un interés porque les xeneraciones futures disfruten d’un patrimoniu que-yos pertenez. Yá sé que dalguién pue pensar que Suarías, en Peñamellera Baxa, pue quedar un poco fuera de mano. Pero non más que cualquier otru sitiu vistu dende Suarías.
Nun se trata d’exemplos aisllaos. Asturies tien la bendita suerte de contar con bien de xente que, como ellos, trabayen y el frutu del so trabayu siempre tá a disposición de tol que lo necesite. Por un procesu natural: ellos tomen del pueblu lo qu’al pueblu pertenez y ellos nun faen más que servir, como tantos otros enantes y de tantes formes estremaes, de correa de tresmisión.
Esta selmana, enantes de dir a Suarías, tuve n’Arroes con Javier Díaz, que yá ye más Javier d’Arroes que del apellíu que tien de propio. Otra casa coles puertes abiertes. Otru archivu que ye parte de la memoria de tolos asturianos. Otru benditu exemplu de lo meyor de la nuestra tierra. Falamos de Cabreira y de Senabria. D’esa particular manera que tienen ellos de cantar tonada y de cómo, si nun s’acaba dando un procesu como’l que vien teniendo Cantabria nos últimos años, vamos vela desaparecer delantre de los nuestros güeyos. Falamos de los gaiteros Moisés Liébana y Domingo, que toquen nel programa. Falamos d’otros gaiteros que, como ellos, nun tuvieron la suerte de contar con un mediu d’espresión como Camín de cantares. Nin siquiera de los medios de grabación del propiu Javier d’Arroes. Esa xente, tamién necesaria, pa que la nuestra imaxinación los empondere tamién como grandes ente los grandes y que s’integren asina na memoria señaldosa del futuru.