El primeru de los concursos

2010 / 02 / 26 - Les Noticies

Marisa Valle Roso repitió primer puestu na XIII edición del Concursu de Canción Asturiana “Cuenca del Caudal”. L’añu pasáu ganara con una cierta claridá. Esti añu la competición fue enforma más dura. Los nervios acompañaron a los intérpretes nes semifinales y na final y a bien d’ellos xugánron-yos una mala pasada. Namás asina pue esplicase’l puestu qu’algamaron delles de les meyores voces del momentu. Más que nada nel apartáu femenín nel que la competencia ente voces moces y veteranes ye grande.

Asina les coses, tres del primer puestu de Marisa Valle, Lorena Corripio algamó la segunda posición, siguida de la veterana María Teresa González Soto, que pasa por ún de los meyores momentos de voz. Con too, la potencia y seguridá de la xoven Lorena Corripio permitió esa llixera diferencia que la conduxo hacia’l segundu llugar. Per detrás d’elles quedaron en cuarta y quinta posición Rosario González y María José García, respectivamente.

Si na modalidá femenina la competencia fuera grande, na masculina llegóse a una final tan axustada que namás dellos mínimos erros definieron –en bien de casos solo producíos tamién polos nervios correspondientes a ver dende l’escenariu y auditoriu hasta la bandera y, amás, les cámares de televisión enfrente.

Celestino Rozada, faciendo gala de la so voz sobeyosa, upóse col primer premiu, siguíu de José Manuel Robledo, “Lolo de Cabranes”. Los dos con discu acabante d’editar el pasáu añu y cola voz na plenitú de facultaes. Tres d’ellos, na tercera posición, Juan José Martínes, al que siguieron José Antonio González, “Cantu la Vara”, y Rogelio Suárez. El ganador de la pasada edición, que nun participara nésta, fuera Jorge Tuya –que parez ser esti añu tienlu tomáu de sabáticu no qu’a concursos se refier.

Una de les grandes novedaes del concursu fuera la incoporación de la modalidá de Mozos (pa menores de 18 años). La sorpresa vieno col númberu grande de participantes de la vecina Cantabria, siguiendo la secha qu’abriera Sergio Agüeros, un verdaderu ídolu na so comunidá- Asina, el primer puestu algamólu un espléndidu Esteban Verdeja, siguíu de cerca por Álvaro Fernández Conde. Dambos de la citada Cantabria. El tercer puestu fue pa l’asturianu Raúl Díaz. Pa repartise’l cuatru y el quintu ente Cantabria y Asturies, respectivamente pa Cipriano Solarana, “Panín”, y Andrea Cueli.

Repitíase nesta edición la modalidá de Tonada d’Autor, p’aquelles composiciones nueves en lletra y música, na que taben presentaes un total de diez composiciones, interviniendo na final namás qu’ocho d’elles. Dexando u bon regustu na xente al ver que s’enfrentaben xente bien mozo y xente de la veteranía de Chucha de Nembra o José Manuel Collado.

El ganador absolutu de la modalidá resultó ser Héctor Braga, con una composición propia de títulu “Del emigrante”, que defendió al arpa y acompañáu a la gaita por Llorián García. El segundu puestu fue pa Marisa Valle Roso, con una composición lletra d’Esmeralda Carrera y música de Pablo Carrera, titulada “Recomienda’l presidente”, que fue interpretada nel escenariu por dalgo más d’una ventena de músicos (banda de gaites, pandereteres, buzuki, baxu, guitarra elléctrica…). La ganadora de la pasada edición fuera Liliana Castañón.

Na tercera posición afayamos a Fernando Entrialgo, una voz que lleva bien d’años compitiendo y que se presentaba con una lletra del padre y música propia, acompañáu al piano por Pablo Álvarez (el mesmu pianista qu’acompañara a primeros de los ochenta a Diamantina Rodríguez na so última grabación, A las madres de los mineros). La composición titúlase “Cómo t’añoro mio Asturies”.

El cuartu puestu fue pa Fernando Valle Roso, con “Como l’agua de los ríos”, lletra del poeta iraní Omar Khayyam y música de Xaime Arias, que tamién lu acompañó en directo al piano. Siendo la quinta posición pa “Lloren les cuenques mineres”, defendida por María José García y orixinal d’Amor Muñiz, que tamién l’acompañó al piano.

Igualmente, concediéronse los Galardones Eugenio Carbajal a Javier d’Arroes y a Elías Suárez Riera. Al primeru d’ellos, pol so archivu personal, ún de los más impresionantes de canción asturiana, y por tenelu siempre abiertu y a disposición de tolos cantadores, estudiosos, investigadores y públicu en xeneral que lu visiten o consulten. Y, al segundu, más conocíu como Elías el de Casa Fulgencio, pola sidrería que rexentara dende l’añu 1957 na conocida plaza de Requexu, pola so promoción de concursos y muestres de tonada asturiana y la creación del Memorial Silvino Argüelles, que se continúa cellebrando.

Una edición más del primeru de los concursos que tien llugar n’Asturies y que val a los aficionaos pa tastar como tán les grandes voces del momentu.