15 ediciones de tonada de Les Mines
2010 / 03 / 05 - Les Noticies
Por más qu’haya bien de concursos de tonada a lo llargo de too Asturies, pol nuestru propiu centralismu y la nuestra tradicional redución a lo importante, acabamos dexando de lláu dellos que lleven bien d’años funcionando y que cuenten, como l’organizáu pola Asociación San Luis de La Nueva de Llangréu, con una consolidada y llarga trayectoria. Esta tendencia al reducionismu fai que fale d’avezu del Concursu y Muestra Ciudá d’Uviéu, del Concursu de Canción Asturiana Cuenca del Caudal y del Concursu de Xixón, y que por diferentes razones m’escaeza d’otros de llargu percorríu, como’l d’Amieva (al que na edición pasada dediqué un artículu con motivu de la final y la entrega de premios), el d’Avilés (que va camín de consolidase como una cita importante) y el de La Nueva.
Bien d’editase, con motivu de la so décimo quinta edición, un llibru recopilatoriu de voces (incorpora un CD), de vivencies y de relación de premiaos, baxo’l títulu La canción asturiana de les mines -15 años de tonada en La Nueva-, editáu pola propia Asociación Cultural San Luis, baxo la dirección de José Francisco Torre. Un modelu a siguir por otres cites asemeyaes, yá que bien a sumase a la edición continuada que vienen faciendo de CD’s recopilatorios de les sos ediciones y nos que puen topase voces que d’otra forma por nun tener nada grabao acaben pasando desapercibíes más que pal públicu específicu y siguidor d’estos concursos.
El Concursu de Canción Asturiana de Les Mines naciera como actividá dinamizadora d’una de les zones más afectaes pola reconversión minera y que produxo un importante descensu de población nel valle. D’ehí que, por esti propósitu dinamizador cultural, el concursu parta d’una apuesta firme pola canción asturiana pa estendese a la organización de bien d’actividaes paraleles y complementaries.
Les diferentes ediciones del Concursu de Les Mines celébrense, polo xeneral, ente los meses d’ochobre y abril, en tres fases: eliminatories, semifinales y finales. Amás de los premios importantes a los tres primeros de cada categoría –femenina y masculina-, progresivamente fueron implantándose otros premios especiales como’l de canción ayerana, el de mozos, pareyes de baille, gaita y tambor…
La primera edición del Concursu de Les Mines, la del añu 1995, esclusivamente pa homes y mozos, ganáranlu Maximino Solís y Eloy López. Esti rapaz volvió repitir primer premiu na edición siguiente al delláu d’Ana Cabielles, nel apartáu de Moces, y de José Manuel Collado y Mariluz Cristobal Caunedo, nes modalidaes masculina y femenina corresponientes.
Na tercera edición del Concursu l’Asociación Cultural San Luis firma un alcuerdu cola Sociedá Fonográfica Asturiana, pol que los campeones del concursu, d’aquella p’acá, viene grabando, entós una casete y agora un CD. Naquella edición de 1996 ganaran Jorge Tuya y Mariceli Fernández, siendo l’apartáu de Mozos pa Anabel Santiago y Eloy López, por tercer añu consecutivu. Tamiés, esti mesmu añu, Juan Luis García Lobo recibe’l premiu al concursante que meyor interpretara una tonada ayerana.
Vuelven ganar la cuarta edición, la de 1998, José Manuel Collado y Mariceli Fernández, siendo los premios Mozos p’Anabel Santiago y Hermógenes Fernández, y la meyor canción ayerana pa Maximino Solís. Tres d’ellos, na siguiente edición, ganen Jeremías Cuello y repite victoria Mariluz Cristobal, recibiendo’l de tonada Moza Bibiana Sánchez y Fernando Entrialgo, y el de tonada ayerana Pablo Huerta.
La sesta edición, la primera del nuevu mileniu, crea la categoría de Campeón de Campeones, pa facer concursar a los anteriores ganadores. El vencedor absolutu d’esta nueva modalidá resultó ser Jeremías Cuello. Los otros ganadores fueron el Che de Cabaños y Mariluz Cristóbal, colo Mozos Noelia de Dios y Pablo Carrio. De les otres modalidaes, Julio Mallada recibió’l premiu a la meyor tonada ayerana y los nuevos premios a les meyores canciones mineres lleváronlos José Manuel Collado, Mariluz Cristobal, Pablo Carrio y Bibiana Sánchez.
La nómina de ganadores absolutos de les ediciones siguientes, del 2001 a la pasada, amplióse con Jeremías Cuello y Mariluz Cristobal, Lolo de Cabranes y Mariluz Cristobal (na del 2002), Jeremías Cuello y Nori Redondo (nes del 2003 y 2004), Lolo de Cabranes y Anabel Santiago (na del 2005), Sergio Agüeros y Liliana Castañón (na del 2006), Juan José Martínez y Marisa Valle (nes del 2007 y 2008) y Jorge Tuya y Bibiana Sánchez (na pasada del 2009).
El CD qu’acompaña’l llibru cuenta con tonaes de tolos citaos, más dalgún premiu más de los mozos y de la modalidá de gaiteros, que sumarán en xunto los venti cantares que lu integren. Una bona razón más p‘adquirir el llibru dedicáu a La canción asturiana de Les Mines.