50 años de La Busdonga
2010 / 02 / 19 - Les Noticies
Ye lo que tien dedicase a efemérides. Falara de los 100 años del nacimientu de Josefina Fernández. Como tamién, la selmana pasada, de los 75 de la muerte de Xuacu’l de Sama. Faltó tiempu pa que dalguién me recordara qu’esti añu tamién se tendría de conmemorar el 50 aniversariu del fallecimientu de La Busdonga: la única voz femenina que s’afaya nel panteón de los clásicos de primeros de sieglu XX, al delláu d’El Maragatu, Cuchichi, Botón, Claverol, Quin el Pescador, Santos Bandera, Miranda, El Polenchu de Gráu y el citáu Xuacu’l de Sama. Toos ellos nacíos na última década del sieflu XIX, menos El Maragatu que lo ficiera en 1889.
Un exemplu de la vixencia que sigue teniendo la obra grabada por La Busdonga a primeros de sieglu XX: toles participantes nes semifinales y final del Concursu Cuenca del Caudal que tuvo llugar estes últimes selmanes interpretaron en dalgún momentu dalguna de les sos pieces más emblemátiques, como “Al pasar per el muerte” (nada menos que tres, de les cinco voces de la final, cantáronla), “Carromateros”, “Para castañes Tremañes”, “Tienes casa tienes horru”, “Cantar bien mío”, “Aquellos gües” o “Carretera de Colloto”. Y una anécdota casual relacionada con esti Concursu: el técnicu de soníu ye bisñetu d’ella.
Obdulia Álvarez Díaz, La Busdonga, ñaciera n’Uviéu en 1896. El nomatu pol que se la conociera (como al so hermanu, Manuel Álvarez, El Busdongu) venía del padre, ferroviariu d’esta localidá al pie de la cordelera cantábrica. Con otra anécdota –non casual- relacionada con esti nomatu: el fondu fonográficu de la Fundación Joaquín Díaz d’Urueña, Valladolid, cuenta con un importante númberu de grabaciones d’esta muyer, al entendese que, se la nomaben La Busdonga, yera por proceder d’esa localidad llioneso-castellana.
L’amplitú del so rexistru vocal siempre se consideró como ideal pa la interpretqaciuón femenina de tonada y, en concreto, pal repertoriu col qu’ella se ficiera famosa. La potencia de la so voz, la capacidá pa mantenese sobre una mesma nota y la musicalidá de les sos interpretaciones, terminaron por convertila, a los güeyos de los sos contemporaneos y de les cantadores de tonada de les siguientes fornaes, na voz femenina más representativa de la tonada asturiana.
De la mesma manera que lo ficiera con El Maragatu, el compositor y pianista Baldomero Fernández trabayó musicalmente con La Busdonga, surdiendo del contactu ente dambos versiones úniques de “Pasé’l puertu de Payares” (que yá grabara El Maragatu con anterioridá), “Aquellos gües” o “Al pasar per el puertu”.
Buena parte de la so mocedá pasárala en Mieres del Camín, onde la so familia rexentaba un chigre na conocida plaza de Requexu. Y falleció en Xixón, onde se treslladara a vivir nel añu 1934, el 27 de xunetu de 1960, a la edá de 64 años.
Les grabaciones de los sos discos vivieron diverses reediciones, lo que ,gracies a ello y a les emisiones radiofóniques, permitió que la so voz se convirtiera nun estándar pa les xeneraciones siguientes. Un maxisteriu que siempre reconocieron voces como les de Josefina, Leonides, Diamantina, Maudilia, Margarita… hasta aportar a los nuestros díes nos exemplos magníficos de Mariluz Cristóbal, Anabel Santiago o Marisa Valle.
Otru de los nomatos pol que se la conoció davezu fue’l de La Maña, que-y vieno del so matrimoniu con El Mañu, reputáu xugador de cartes. Un nomatu qu’ella llevaba con gustu cuando interpretaba “Anda y señálame un sitiu”, que na primer versión grabada d’ella titulara “Jota aragonesa”, dexando constancia con ello d’onde surdiera l’orixinal de la –agora- célebre tonada.