75 años de Xuacu'l de Sama
2010 / 02 / 12 - Les Noticies
La selmana pasada falaba de que nesti añu tendría de cumplir 100 la cantadora de tonada Josefina Fernández, que fuera una de les voces de muyer clave pa entender la evolución de la tonada femenina y con un ampliu maxisteriu qu’aporta hasta los nuestros díes. Nésta, por siguir na mesma llinia, tendría de falar de que se cumplen 75 años de la muerte d’otra de les grandes voces del tiempu, la del cantador Xuacu’l de Sama.
Pa tolos entendíos y críticos musicales del momentu, Joaquín Martíenz González, Xuacu’l de Sama, fuera la voz más impresionante de la tonada asturiana. El so nome asóciase al de los diez clásicos del xéneru de primeros de sieglu, xunto a El Maragatu, Cuchichi, Botón, Claveron, Quin el Pecador, Santos Bandera, La Busdonga, Miranda y El Polenchu de Gráu.
L’amplitú del so rexistru vocal, la brillantez de les sos notes agudes y graves, el bon gustu nes sos interpretaciones, convirtiéronlu aína nuna figura solicitada pa tou tipu d’actuaciones na década de los trenta del sieglu pasáu. Bien de xente, tiempu alantre, recordaba como momentos memorables delles de les sos actuaciones, tanto como solista del Coro Santiaguín como en solitario interpretando tonada.
Naciera’l 10 de mayu de 1900 n’Uviéu, fíu de Vicente Martínez, canteru, y de Matilde González, llabradora, pero dende edá temprana treslládase a Sama Llangréu cola so familia. Tamién dende bien mozu comienza a trabayar de canteru, como’l padre, y dada la so afición, ingresa nel Coro Santiaguín, onde se forma musicalmente. Un fechu ésti, el de la formación musical, que va ser clave nel desarrollu de la tonada del tiempu, y nel que coinciden otres voces, como les de los Cuatro Ases o El Maragatu, miembros del Orfeón Ovetense, o de Juanín de Mieres, nel Orfeón de Mieres.
Una grave enfermedá fizo que-y sobreviniera la muerte a los 35 años, na flor de les sos facultaes vocales, el 18 d’avientu de 1935. A la gaita quedaron rexistraes les sos magnífiques interpretaciones de tonaes como “Que yo contigo no igualo”, “Aquellos gües”, “Nun quieren que nos casemos” y “L’aire m’apagó la vela”. A la voz sola dexó grabaes, ente otres, la so particular versión de “Viva la xente minera” (que s’acabó convirtiendo nuna de les sos tonaes estrella), “Para castañes Tremañes”, “Les barandielles del puente”, “Que vas al Cristu”, “Cuatro chavales de Ceares”…
La maestría de la so voz creó una escuela de siguidores y les sos interpretaciones continúen siendo un canon abligáu p’aquellos qu’entamen a cantar tonada y quieren atrevese a concursar en dalgún de los grandes concursos del añu. Tovía nestos díes atrás, cuando vienen celebrándose les finales del Concursu Cuenca del Caudal y les eliminatories del Concursu y Muestra de Folclor “Ciudá d’Uviéu”, nun hai día que nun se siga sintiendo una versión d’él, de manera especial de pieces como les citaes “L’aire m’apagó la vela” o “Viva la xente minera”.
Los aniversarios son bon momentu pa recordar la obra d’estos grandes clásicos de la canción asturiana. Tanto nel casu de Josefina Fernández como de Xuacu’l de Sama, por citar a dos que se correspuenden con esti añu.
Nota adicional: Esperemos que la organización d’eventos d’estes característiques nun caiga nes manes de dalgún especialista na organización d’homenaxes que, al final, nun s’acaba faciendo más qu’un homenaxe a él mesmu. L’últimu casu tuvímoslu en Sama esti añu pasáu col homenaxe al Tordín de Frieres, pol baxu nivel xeneral de los intérpretes convocaos y pola ausencia d’organización. Tanto Xuacu’l de Sama como Josefina Argüelles influyeron en tolos grandes intérpretes d’agora mesmo, polo qu’una mediocre organización d’actos como estos restaría brillu a la obra de dos de los principales intérpretes de canción asturiana de tolos tiempos.