100 años de Josefina Fernández
2010 / 02 / 05 - Les Noticies
Esti añu tendría de cumplir 100 la cantadora de tonada Josefina Fernández, que naciera’l 24 d’agostu de 1910 y que, colos años, diba convertise na voz de referencia de la posguerra y la primer ganadora del premireu de los grandes concursos que se va entamar depués de la contienda civil, el que se celebrara na Sala Babel d’Uviéu, nel añu 1948.
Esta selmana pasada’l so fíu, Fernando Ruíz, organizador y director del Concursu de Canción Asturiana de Xixón, cedió al Centru d’Estudios de l’Asturianada “Diamantina Rodríguez” de Mieres, la copa y el diploma acreditativu del citáu premiu. Dos detalles con un valor simbólicu impresionante dientro del ámbitu de la canción asturiana.
Josefina Fernández yera quince años más moza qu’Obdulia Álvarez, La Busdonga, y va ser diez años más grande que la so gran discípula, Diamantina Rodríguez, cola que diba coincidir riba los escenarios. Tovía agora, cuando se-y pregunta a Diamantina poles sos influencies a la hora d’interpretar, cita siempre’l maxisteriu de Josefina Fernández, a la que sintiera gracies a la radio y a la llegara a ver bien de veces depués n’escena. Una referencia que tamién citen bien d’otres voces del tiempu y que ye importante más que nada si se considera que Josefina Fernández nun dexara nada grabao, yá que la muerte la sorprendiera’l 7 de marzu de 1951, a los 41 años d’edá.
Venía d’una familia bien relacionada cola música y la canción asturiana. Tanto la so madre, María Álvarez Vigil, de Xixón, como’l so padre, José Fernández Riaño, de Villaviciosa, fueran bonos intérpretes. L’hermanu d’ella, Xuacu Fernández, va acompañala bien de veces a la gaita.
La voz de Josefina empieza llamar l’atención dende neña y tamién como actriz de teatru, yá que dende bien moza forma parte de la Compañía Asturiana de Comedies y de la Compañía Los Mariñanes. Dos tonaes son les que la upen como gran campeona del Concursu de la Sala Babel: una magnífica versión de “La Soberana” y una sobeyosa “Carromateros”. Dos tonaes grandes de les que se siguen interpretando una y otra vuelta nos principales concursos de tonada d’anguañu.
En bien de les sos interpretaciones públiques cantaba a la guitarra, lo qu’acentuaba la so personalidá sobre l’escenariu. Una tradición que nunca tuvo mui estendida, pero que ye una constante a tolo llargo del sieglu XX n’otros cantadores, hasta llegar a los nuestros díes. Una guitarra que, nélla, guardaba tamién relación cola so afición al flamenco, un xénero nel que tamién llegó a interpretar con mui bones crítiques dellos palos.
Arriendes de les citaes, “La Soberana” y “Carromateros”, la voz de Josefina interpretaba de manera almirable otres tonaes como “Carretera de Cualloto”, “A la salida del Sella” (que pola so tesitura ye bien difícil volver sentila en voz de muyer), “Ventanina”, “Cada vez que voi a Uviéu”, “Les faldes del monte”, “Sácalo con garabatu”… que, anque nun quedara d’elles rexistru sonoru nengún, queda la memoria de los que la sintieron y de los que tuvieron la suerte de vela tocar el techu de la gloria tres de les sos intervención nel Salón Babel d’Uviéu.
L’alcordanza de la guerra civil taba mui cercana. La posguerra siguía siendo un mal tiempu, enllenu de precariadaes y de miseries humanes. Los cantares de la radio vinieron a enllenar esi tiempu de silenciu y, ente ellos, les grandes obres grabaes en discos de pizarra nel periodu anterior a la contienda poles voces que, a partir d’aquella, van considerase clásiques del xéneru. Nel casu de la voz de muyer, esclusivamente La Busdonga.
Con Josefina Fernández y La Busdonga, fórmase una base sobre la que van dir apareciendo otres grandes voces de la canción asturiana d’aquellos años, coles que van compartir escenarios: Purificación Rivas, La Pichona, especializada nun repertoriu mui tradicional, nel que destacaron les sos versiones de “La Soberana” y “La Cabraliega”, que sí quedaron rexistraes en discu; y, como non, Diamantina Rodríguez, que con cerca de noventa años y más d’un cientu de tonaes grabaes sigue exerciendo’l so maxisteriu y recordando a les nueves xeneraciones que’l d’ella empezara, ente otres voces, por sentir a Josefina Fernández cantar “Carretera de Cualloto”.