Premios,premios, premios

2008 / 02 / 15 - Les Noticies

Acabante salir de la resaca de los premios del Concursu Cuenca del Caudal, va tocame de siguío la del premiu al Meyor Cantar n’Asturianu. Lo de la resaca nun ye broma. La fiesta d’entrega premios de la que falo tuvo llugar el sábadu 9 de febreru nel Hogar de Xubilaos y Pensionistes de Returbiu. Nun parez el llugar más afaízu pa dase al meyor xamón y a la peor bebida. Y yelo.

Estos premios, los de Returbiu, como tantos otros, son premios a la música asturiana y quiero volver falar d’ellos. Como exemplu. Más bien, como parábola. Naide se mira nel espeyu de naide. O, lo que ye lo mesmo: visto lo visto, de nada sirven los exemplos. Polo que, influenciáu pol redentorismu anabaptista de la campaña americana –la páxina web d’Obama tienme más aterráu que la del Opus Dei-, empleo la parábola más como exerciciu lliterariu que como palabra de Dios.

Primero. Unos premios de la música a los que tienen de respetar en primer términu ye a los profesionales de la música. La meyor manera de promover el respetu al trabayu d’un profesional ye pagándo-y.

Nun hai nada más fácil nesti mundu que montar unos premios de lo que sea relacionaos cola música, enllenar la gala de músicos pola cara y dar premios a mamplén, si con too ello nun tas pagando a los músicos, tienen qu’actuar pola cara –o namás que pagues a les estrelles de turnu que son amigos tuyos- y das unos premios ensin cuantía económica nenguna. Los políticos y los llistos apúntense bien de tantos con premios asina y los músicos marchen pa casa cola palmadina al llombu y el convencimientu espresu de que, otra vuelta más, tuvieron riéndose d’él a la cara.

Nada d’esto ocurre en Returbiu. Nun ye Uviéu nin Xixón nin Avilés, nin siquiera Llugones. Ye un barriu obreru, con colomines pintaes una y otra vez pa nun parecer colomines, empozáu nel fondo d’un valle fondu ente dos escombreres de mines cerraes. Pero, tienen el procuru de tratar con dignidá hasta al últimu de los músicos que participen nos sos premios: pagándo-yos por cada día d’actuación. Arriendes de paga-yos la cuantía de los premios a los que por votación del públicu pasen a la siguiente ronda y por decisión del xuráu algamen los primeros premios.

Segundo. Unos premios de la música, o de los que sean, tienen que ser tresparentes. El meyor exerciciu de tresparencia danlos unes bases clares y una organización visible.

Asturies pue que sea’l llugar del mundu nel que más premios s’entreguen. Cola disculpa más nimia, equí siempre hai dalgo que premiar. Polo xeneral son premios retroalimentaos: premiase a dalguién que, a la llarga, va premiame a mi. Esto, organizao en pequeña escala, crea alredor un movimientu impresionante de reuniones, fartures y magnos actos d’entrega. Toos ellos cuenten colos cinco minutos de gloria del espaciu acotáu nos medios de comunicación. Pero tol mundu desconoz quién forma parte d’esa organización que premia y por qué escuros mecanismos decisivos llegó a otorgase esi premiu al so merecedor.

En Returbiu les reuniones son abiertes –como puesta al día de la vieya usanza del conceyu abiertu-, nes fartures participen tanto los organizadores, como los músicos, como’l públicu participante –anque esto signifique axuntar alredor de les meses a más de mediu millar de comensales- y, como consecuencia, l’actu final d’entrega de los premios ye realmente magnu, porque nél participa tol mundu.

Resumen. Va dos selmanes falaba de los premios del Concursu Cuenca del Caudal y esta selmana vuelvo a falar d’ellos. La selmana pasada falaba de los Premios AMAS y nun m’apetez nada tener que volver sobre ellos. Ésta mesma o la siguiente, tendría de facer lo mesmo colos premios al Meyor Cantar n’Asturianu, pero espero que sea suficiente l’usu de la parábola con ellos.

Nun ye broma: dicía al principiu que me diben tocar estos premios porque por razones de trabayu van llevase al acabu en Mieres. A les altures que tamos tovía desconozo quién son los nominaos. Lo que nun quita pa que, como bon siguidor d’estes hestories, yá té dafechamente convencíu de quién lu va ganar.

Nota adicional: lo que se paga en Returbiu a cada intérprete por cada día d’intervención son 120 € (venti mil de les antigües pesetes). A los que pasen a la semifinal vuelve pagáse-yos 120 €. Tolos que lleguen a la final tienen una remuneración económica d’alcuerdu col puestu nel que queden.

Claro qu’hai munchos otros llugares que paguen más en premios. Normal. Pero equí tamos falando d’otra cosa.