La peor imaxen

2010 / 01 / 22 - Les Noticies

Llámenme poderosamente l’atención los datos del reciente estudiu realizáu pola rede de blogs Ocio Networks sobre la SGAE y que pue atopase na so páxina web, amás de vese reflexada ampliamente en bien de medios de comunicación.

Esti Estudiu de Vezos d’Internet nel que participaron 2075 españoles tenía como obxetivu dilucidar la imaxen cola que se percibe a la SGAE (Sociedad General de Autores y Editores) y la consideración sobre’l canon dixital, asina como tamién l’actutú tomada ante les descargues ilegales y el derechu de la propiedá intelectual.

Los resultaos son ablucantes: un sesenta por cientu de los encuestaos afirmó que la SGAE ye la entidá con peor imaxen de la rede, siguida por Hacienda y Telefónica. Destacando que los internautas con edaes comprendíes ente los 21 y los 40 años son los que peor la tienen catalogada, demientres qu’ente los más mozos (menores de 16 años) namás un venticinco por cientu coincide con esta postura.

Alejandro Suárez Sánchez-Ocaña, d’Ocio Network, comentó al respectu: “Internet ye un mundu de contrastes. La percepción negativa de la SGAE ye abrumadora y empeora cada añu, ensin que los garantes de los derechos de los autores y editores faigan nada por impedilo. Más bien tolo contrario, parecen nun tener relaciones públiques y comunicación, amás de tener un excesu de celu y d’abogaos. Ye curioso nesti sentíu que la percepción de la SGAE pa los internautes ye peor que la d’Hacienda, qu’hestóricamente fuera l’iconu d’entidá más odiada, por motivos obvios, demientres qu’empreses como Google o Apple tienen una imaxen positiva pa los internautes”.

Los resultaos negativos de la SGAE tan mui per delantre de los obteníos por Hacienda, votada por un catorce por cientu. Asina, el 90,3 % de los entrevistaos cuida que la entidá abusó de los particulares y el 85,9 % apoyaría que se llimitara’l so poder.

Otru detalle importante que surde del estudiu ye’l que señala que si bien les persones que descarguen material de forma ilegal tienen una mala impresión d’esta entidá, el peor conceptu tiénenlu los que tán dispuestos a pagar por consumir música n’Internet.

Alejandro Suárez comenta sobre ello: “Los internautes consideren que la SGAE, con delles de les sos actuaciones, incita a la piratería. Trátase d’una interesante reflexón per parte de los usuarios, pues un setenta por cientu taría dispuestu a pagar les descargues de música si les condiciones fueren xustes, pues consideren que’l canon dixital qu’ingresa la SGAE fomenta la piratería como un sistema válidu de rebelión contra l’abusu. La voracidá de la SGAE fai que los usuarios non solo xustifiquen, sino que n’ocasiones presuman y recomienden a terceros la descarga de conteníos protexíos por derechos d’autor”.

Esti canon dixital ye considerái dafechamente inxustu pol 86,1 % de los encuestaos (por más que seya curioso que namás un 56 % asegurara que lu eliminaría). El 47,8 % confiesa que baxa conteníos de manera ilexítima, pero a la vez comenta que tamién adquier esti tipu de material llegalmente (el 56 % de los encuestaos comenta que va d’avezu al cine, pero a la vez descarga películes d’internet).

A esta imaxen negativa de la entidá vien a sumase esta selmana la fanfarria de pitos que sonó a les puertes de la sé de la SGAE en Madrid, per parte de trabayadores contra los sos xestores. Los cánticos nun dexaben llugar a duldes: “¡Qué gran pensionista sería Teddy Bautista!”.

Demientres la SGAE apuesta por invertir 300 millones nel Proyecto Arteria, una impresionante rede de teatros a lo llargo d’España, llatinoamérica y los Estaos Uníos, inténtase meter a los trabayadores nun ERE, base fundamental de la propuesta (arriendes d’una subida salarial que denuncien de 0 €).

Una acción de protesta asemeyada a la d’estos díes yá se produxera va unos meses durante la celebración d’una Asamblea Extraordinaria y va un par de selmanes repitiérase durante la celebración d’una Xunta Ordinaria. Les agües siguen revueltes y nun se preven tiempos de calma pa los meses próximos.

Podría amestase un apéndiz a esta hestoria xeneral de lo qu’ocurre n’España territoriu físicu y n’España territoriu virtual, cola situación n’Asturies. Pero nun paga la pena. Equí, más allá de les crítiques normales y los comentarios de dacuando, la entidá sigue faciendo suma y sigue colos concursos de tonada, los festivales de canción asturiana, les muestres de gaita y cualaquier tipu d’actuación nel ámbitu tradicional, ensin que digan nada los organismos municipales qu’abonen relixósamente les factures que de manera puntual lleguen dende la SGAE.

La pregunta sigue siendo la mesma que vengo faciendo dende va tiempu: ¿a ónde va too esti volumen de dineru que xenera la música tradicional que, por definición, ye de dominiu públicu? De tanto facela yá suena hasta gastada.