12 muyeres, 13 homes
2010 / 01 / 15 - Les Noticies
Comentaba la selmana pasada como aportaran a la semifinal femenina del Concursu Cuenca del Caudal doce voces de muyer. Y, pa continuar en llinea col artículu anterior, tócame falar de los trece homes que tamién llograron aportar a la semifinal masculina que va tener llugar esti sábadu 16, a partir de les ocho de la tarde, dende l’Auditoriu Teodoro Cuesta de Mieres.
La llista de les voces de muyer de les que falé la selmana pasada ye la siguiente: Lorena Corripio, Marisa Valle Roso, Rosario González, María Teresa González Soto, María José García, María Sánchez “La Pastorina del Cares”, Rosi Fernández Torre, Pilar Barreñada, Jesusa Fernández “Chucha de Nembra”, Noemí Torrado, Carmen Camporro y Liliana Castañón. A la final, como tamién nel casu de los homes, namás van pasar que cinco d’elles.
El llistáu de los homes nun ye menos impresionante. Diez yeren los puestos, pero como nel casu de les mueyeres, tamién se dieron varios empates. Nesta ocasión, dos voces recibieron la mesma puntuación pal segundu puestu, ores dos pal novenu y dos más pal décimu. Lo que fizo posible los doce nomes que van darréu: Julio Mallada, Celestino Rozada, José Manuel Robledo “Lolo de Cabranes”, Juan Robledo, Rogelio Suárez, Juan José Martínez, José Antonio González “Cantu la Vara”, Manuel López Menéndez, José María García, Héctor Braga, Ismael Tomás, Carlos Alonso Peñayos y Dimas González.
Demientres que nel casu de la semifinal femenina’l númberu de voces xóvenes representaba’l cincuenta por cientu, nel casu de los homes malapenes llega al trenta. La diferencia ye grande. Con un datu esperanzador: na final de menores de dieciocho años que va tener llugar dientro d’esti mesmu Concursu na primer selmana de febreru, el númberu de voces d’home ye de seis frente a una única participante femenina. El relevu xeneracional que tuvo llugar a lo llargo d’esta década nel ámbitu femeninu pue dase, d’equí a unos años, nel masculinu.
Les elimnatories siempre deparen sorpreses. Una d’elles vieno de la mano –o meyor de la voz- de Julio Mallada. Lleva años y bien de grabaciones detr´ñas, pero esti últimu añu parez tar nún de los meyores momentos de voz y espérase con ganes la so actuación nesta semifinal masculina. En puntuación del xuráu quedó per delantre d’otres voces grandes que lleven tiempu disputádose los primeros puestos, como Celestino Rozada, Lolo de Cabranes, Rogelio Suárez o Juanjo Martínez.
La otra sorpresa nestos primeros puestos de la puntuación del xuráu vieno cola actuación de Juan Robledo, que va dalgo más d’una añu presentara’l so trabayu discográficu La mio parexa y que tamién pasa per ún de los meyores momentos de voz. Una voz firme que, como la de Manuel López, que tamién llogró asomase a los primeros puestos, va permitir que la semifinal masculina se convierta ensin dulda nuna competición de primer nivel.
El casu d’Héctor Braga, el más mozu de los representantes masculinos, ye interesante porque representa nesti terrenu lo que les voces d’Anabel Santiago, Liliana Castañón o Marisa Valle representaron nel so momentu pa la tonada femenina. El so últimu trabayu, Trad.ye, marca la llinea per onde tien intención de dir el so prósimu trabayu, pal que nun debe quedar munchu yá que lleva tiempu trabayando nel estudiu de grabación.
Otra de les voces de la que s’espera pronto un nuevu trabayu ye Ismael Tomás. Dos tonaes d’él aparecieron nel recopilatoriu 25 clásiques de l’asturianada y comentó durante la grabación les ganes que tenía de dedicar tiempu a un trabayu personal. Dalgo que vien siendo una constanbte esti últimu añu ente otros compañeros de xeneración, como’l citáu Juan Robledo o Lolo de Cabranes y José Manuel Collado.
El xuráu, como nel casu de la simifinal femenina, va tenelo dafechamente difícil. Pero, del so resultáu, tendremos una impresionante final na que van participar diez voces, cinco y cinco. Un verdaderu luxu pa tar a primeros d’añu, pero que va servinos pa dir tanteando como tan les grandes voces del momentu.