La década que pasó y la que vien

2009 / 12 / 18 - Les Noticies

Pasaron los diez primeros años del sieglu XXI. Diez años y bien poques novedaes musicales. Prestaríame facer un repasu de lo pasao y avanzar una prospectiva de lo por venir. La que refier al tiempu d’atrás nun dexará de ser subxetiva. La mirada al futuru serálo claramente.

Tamos falando d’una década, la pasada, que s’abría col esperanzador éxitu d’Hevia y que, nel mesmu sentíu, se tá cerrando con más bien poques esperances. La década, pues, resúmola asina:

Uno. El boom de la gaita pareció afogase ante l’ábanu del éxitu del primer discu d’Hevia, que nun volvió repitir. Con too, la gaita consolidóse a través de les escueles de música y de les propies de les bandes. Por más qu’esti procesu de funcionarización (conversión en funcionarios de los músicos) contribuyera tamién a que nun se dieran munchos más avances que los pedagóxicos. Esti estancamientu viose y vese, aína, nes bandes de gaita. El modelu bretón que s’apunta en dellos trabayos nun acaba de dar equí los sos frutos. Falten compositores, nesti sentíu. Y, cuando lo hai –como en dalgún casu-, notóse tamién la falta de bonos músicos.

Dos. Los grupos de baille nun llevantaron cabeza más allá de lo que ficieran los grupos na década anterior. Un bon exemplu de cómo sigue l’ambiente dientro del ámbitu dalo’l fechu de que’l Conceyu de Cultura Tradicional Vezos Astures publicara un DVD d’amuesa de bailles y dances d’Asturies y nun s’avanzara nel mesmu sentíu un pasu más. El fechu constatáu d’hacia onde caminen otros trabayos nel tarrén del baille en llugares como Galicia, Irlanda o Andalucía, nun se reflexa equí de nenguna manera. El pesu de la memoria de los grupos de coros y dances de la Seccción Femenina sigue presente. El colectivu Muyeres apuntó bones maneres col so trabayu escénicu en Pasamentu, pero nun avanzó nesi camín.

Tres. La cultura más tradicional, la que se correspuende a la nuestra tresmisión oral, vivió un verdaderu terremotu cola aparición de Camín de Cantares na TPA y más que nada pola cotidianidá de tratu y los conocimientos del so presentador, Xose Ambás. El so éxitu, diametralmente opuestu al d’Hevia, consiguió remover los raigaños del trabayu de campu, de la comunicación n’asturianu y de la conciencia de toa una xeneración qu’acabó viendo nel trabayu cola xeneración más vieya un camín de trabayu de cara’l futuru.

Cuatro. El mundu del folk nun dio señales de vida más allá de los trabayos puntuales que dellos músicos ficieron con cantadores de tonada como Mariluz Cristobal o Anabel Santiago, o con voces y temes tradicionales como’l citáu Xosé Ambás. El resto, amás de repitir hasta’l cansanciu fórmules que nel pasáu nun llevaran a nada, dio escasísimos momentos de música que pudiera reconocese como propia. Un cansanciu qu’abarcó tamién al ámbitu de folk-rock y del rock a seques –por más que nesti campu enxamás nadie ficiera más allá de lo fecho por Dixebra nin apostara por triar otros caminos que los yá asgaya triaos.

Cinco. La xeneración de cantautores desapareciera por más que dalgún d’ellos, como Carlos Rubiera o Rafa Lorenzo ficieran nesti tiempu lo meyor de los sos trabayos, y otros, como Pedru Prereira, apuntaran un camín difrente que nun fue más allá d’un únicu trabayu discográficu y dalgún conciertu. Los toques puntuales d’otra xente como Toli Morilla o Alfredo González nun resultaron más qu’eso, toques puntuales, ensin mayor trescendencia. Namás, como yá ocurriera na década anterior, un cantautor (y tamién cantautor de temes d’otros) como Vicente Díaz vio refrendáu’l so trabayu col reconocimientu del públicu. Pero siguirá siendo l’exitu d’él una espina llantada nel corazón de los que cuiden que lo qu’él fai tien poco o nada que ver cola música asturiana. Un problema de cultura xeneral musical que se quita sabiendo simplemente un poco más de cultura xeneral. Otros merecedores del aplausu popular fueron el duu Nuberu que lleven cásique tola década despidiéndose d’esi aplausu al que, vuelta tres de vuelta, regresen.

Seis. Dientro de la canción asturiana asistióse al relevu xeneracional más importante de les últimes décades. Una xeneración que rondaba la ventena, y en bien de casos rondábala per debaxo, subióse a los escenarios con ganes de comese’l mundu y consiguiólo: ehí tenemos los primeros premios nos principales concursos d’Anabel Santiago, Sergio Agüeros, Liliana Castañón, Lorena Corripio o, el más reciente, de Marisa Valle. Los trabayos discográficos de bien d’ellos, xunto a los que ficieran otres voces de la xeneración que los precede, puen considerase lo más representativo de la década.

En fin, la década que vien cuenta con buenos músicos y bones voces. Quiciás nun falte más que bones idees, ganes de desarrollales y, más que nada, solvencia económica pa llevales a cabu –entendiendo que pa que se dea esta solvencia económica lo principal nun ye la subvención correspondiente del gobiernu de turnu sinon el refrendu popular de la propuesta: si nun gusta lo que faes al to públicu natural nun va servir de nada que se siga aumentando la partida económica de los capítulos de subvenciones.