Col culu al aire

2008 / 02 / 07 - Les Noticies

Contaba Víctor Manuel, nel trescursu d’una cena en Cenera con motivu de la entrega del “Trasgu d’oru”, como fuera que ganara’l premiu de nuevos villancicos nel Festival de Pamplona con “El portalín de piedra”.

-Llamáronme de la casa discográfica pa que ficiera un villancicu, que diba ganar el primer premiu.

Por suerte, o porque’l cantar lo merecía, “El portalín de piedra” fue ún de los más grandes éxitos del tiempu y tovía se sigue interpretando (esta mesma Navidá, por exemplu, a cargu d’un coru de la Comunidá de Madrid que fizo una versión en castellanu, cuando esti mesmu coru contaba nel so repertoriu con villancicos en catalán y en vascu).

Si España en xeneral tien premios pa tolo premiable, Asturies representa’l superlativu d’esta práctica. Como en toles partes, hai premios bien organizaos y premios que son una verdadera vergoña, premios que premien un llabor y premios que paguen favores, premios que defienden la so dignidá apostando pola llimpieza de la convocatoria y la independencia del xuráu que lu otorga y premios qu’escuenden detrás d’una impresionante parafernalia una simple cacicada.

Aquellos que por cuestiones de trabayu tenemos qu’organizar premios sabemos que la diferencia ente facer les coses bien y mal ye mínima. Por una razón simple: l’esfuerzu ye más o menos idénticu. Se trata d’un problema d’intencionalidá. Si dende l’orixen la pretensión ye facer les coses bien, los mecanismos pa ponelo en práctica son simples. Pa facer les coses mal los mecanismos empleaos son idénticos.

A la llarga, facer les coses bien compensa porque’l propiu premiu algama prestixu y ye esti mesmu prestixu’l que llama a la xente a sentise dignificao por una nominación, a sentise feliz por consiguir un premiu y a vese cómodu d’aceptar una derrota.

Cuando se convocaron los primeros premios AMAS escrbí un artículu diciendo qu’asina nun se facíen les coses. Un artículu que tuve la oportunidá de comentar con Carlos Madera, d’aquella director xeneral de cultura y ún de los garantes y patrocinador de los premios. Falárame de les prises de la primer convocatoria y de la necesidá d’afianzar el proyectu. Y, más que nada, de dalgo no que yo tamién creyía: la necesidá d’unos premios d’eses característiques.

Cola convocatoria de los segundos volví falar de lo mesmo notru artículu, anque en peores términos. Yá yera claro que nun había nenguna intención en facer les coses bien. Una vez más la organización estructurábase a la manera de chiringuitu y, contando colos beneplácitos económicos de la mesma dirección xeneral de cultura y de la conceyalía correspondiente del Ayuntamientu d’Uviéu, sacaben alantre’l proyectu.

Lo cierto ye que bien creyí que pa esta edición les coses diben cambiar. Hasta estos estremos llega la mio credulidá na bondá humana. La razón yera simple: cambiando los responsables de los organismos patrocinadores, siempre quedaba la posibilidá de creer qu’apostaríen por una dignificación de los premios.

Visto lo visto, nada cambió. Les estructures tienden a ser estátiques como mecanismu d’autodefensa (que, nun ye broma, dexara dicho Trosky). La organización de los premios presentaría’l dossier de los sos éxitos, la cierta repercusión nos medios de comunicación del eventu y la necesidá de dar continuidá al fechu con una nueva convocatoria.

Y equí la tenemos una vez más. Si la primera, poles prises, podía disculpase, la segunda dexó claro que cuando nun se quier nun se quier. Esta tercera –como si de la corroboración del Principiu de Peter se tratara- riza’l rizu: algamar el so mayor gradu d’incompetencia.

Y consíguenlo superando lo más negativo de les anteriores ediciones. Yá nun se trata sólo de que se llamen Premios de la Música Asturiana y que nun s’alcuentren representaos los xéneros más identificativos de la música asturiana, sinon que nesta edición nin los mesmos músicos y grupos entienden los criterios de nominación.

Y, nesta ocasión, nun solo falé con bien d’ellos de los nominaos sinon que yo mesmu tengo relaciones familiares con dos nominaos y tengo responsabilidaes directes na producción de dellos de los trabayos nominaos, amás d’una montonera d’amigos. Pero, nin con eses, soi a entendelo yo mesmo. Entós, pregunto. El nivel de plasmu xeneral ye manifiestu.

Lo que nos lleva al más patéticu de los paisaxes: equí tan riéndose de la xente a boca enllena. Tan riéndose de los patrocinadores. Tan riéndose de los medios de comunicación. Tan riéndose de los músicos. Tan riéndose de la música que se fai n’Asturies.

En verdá, tienen de tar pasándolo de puta madre. Esto ye lo que se llama un chiringuitu bien montáu.

Los exemplos de como se roza la ridiculez nes candidatures yá los apuntara la selmana pasada Miguel Barrero nestes mesmes páxines. Pero tovía hai más exemplos y dellos más escuros que los simplemente evidente. Ye más, nun ye mester ser alvininu pa descubrir que detrás de tanta ineptitú a la hora de facer les nominaciones escuéndense negocios puros y duros. La evidencia de quién van ser dellos ganadores infierse directo d’ello.

Yo formo parte tamién d’un grupu d’amigos que nos xuntamos toles selmanes y nos facemos llamar de manera rimbombante “Socièté Général des Amis du Morue” –que ye como se llama en francés el bacalao o abadexu-. Pero, en verdá, a lo que nos dedicamos ye a beber cacharros. Nun engañamos a naide –si acasu a nosotros mesmos-. Nun pidimos nenguna subvención a naide. Y tamos convencíos de que desarrollamos un fondu llabor cultural: ye más, esti sábadu, cola disculpa de qu’El Llagarón de Mieres cumple 200 años participamos nún de los principales eventos d’esta efeméride, un strip-tease de Dinio.

Gracies a dios Dinio ye cubanu. De ser d’Avilés taría nomináu a los premios AMAS na categoría de “Otras escenas”. Asina quedaríen los dos -Dinio y los premios-, col culu al aire.