Renovase o morrer o dar los aboquíos

2008 / 02 / 01 - Les Noticies

Los exemplos tenémoslos a la vista. El Concursu de Tonada de Xixón sigue atacáu de xente porque, arriendes de la natural afición al xéneru de los xixoneses, celébrase en plenu branu y na Plaza Mayor, lo que llama a un éxitu aseguráu. Dalgo que nun ocurre na Muestra de Folklore “Ciudad de Oviedo” que, baxando cada añu un poco más de públicu, yá pasó del Teatru Campoamor al Filarmónica. Idénticu camín que lleven los concuros de La Nueva, L’Entregu, Amieva...

Por eso paga la pena detenese un instante no qu’ocurre nel Concursu Cuencas del Caudal, a manera de reflexón. Porque, amás, nél, la midida del éxitu nun la da esclusivamente una foto d’un teatru atacáu de xente.

Primer cambiu importante: apostóse por cambiar el Xuráu. Adiós al vezu de ver sobre l’escenariu a una retafila de vieyes glories y de “entendíos” –un tipu humanu que prolifera nos ámbitos musicales-. Tase delantre d’un concursu de cantu y un xuráu tien de tar integráu por xente esperto en cantu. Tase delantre d’un concursu de canción asturiana, coles sos especiales característiques músico-vocales, y nel xuráu tien d’haber xente que conoza técnicamente’l xéneru más identificativu de la música asturiana.

L’apuesta del Concursu Cuenca del Caudal pasa por ampliar esti Xuráu d’espertos, que nesta edición tuvo integráu por Rebeca Velasco, Alberto Varillas, Xaime Arias y Diamantina Rodríguez.

A Rebeca Velasco conocémosla de los sos trabayos discográficos xunto a Alejandro Lafuente, “Lafu”, ente los que destaquen “Ea, ea, ea. Añaes asturianes”, del añu 2005, que lleva tres ediciones, y “Amor amante. Música sele asturiana”, del 2006. Ye tamién l’actual directora de la Escuela de Música de Gráu y directora de la Coral de Gráu y de la Coral Dafne d’Uviéu, amás del Coru Xente Mozo, col que grabara va unos años un impresionante CD de cantares infantiles asturianos.

Los trabayos discográficos d’Alberto Varillas –de manera especial les grabaciones como gaiteru acompañante- nun m’entraríen nesti artículu; pero abasta señalar como exemplu’l “Día de Fiesta en Asturias”, del añu 1994, nel que la gaita sonó en xunto cola Orquesta Sinfónica del Principáu d’Asturies y convirtiéndose con ello nel so gaiteru oficial. Como tamién los Cd “Patrimoniu”, del añu 1998, xunto a l’Asturiana Mining Company, “Tradición”, cola Orquestina Ástura, del añu 2000, y “Torner”, del añu 2006, una amuesa de cantares del más famosu delos nuestros cancioneros, al delláu de la xente d’Ástura y d’Anabel Santiago.

L’apartáu discográficu de Xaime Arias percuerre la doble vertiente de los grupos de jazz y l’acompañamientu a cantadores de tonada como Vital Noval, Liliana Castañón, Anabel Santiago o los Hermanos Valle Roso. Ye superior de piano pol Conservatoriu d’A Coruña y superior de Llinguaxe Musical pol Conservatoriu d’Uviéu, amás de Premiu d’Ensayo “Fuertes Acevedo” como coautor del llibru “L’Asturianada”.

Y, como non, Diamantina Rodríguez, la voz femenina por escelencia de los últimos cincuenta años, qu’apostó dende les primeres grabaciones de los años sesenta del sieglu pasáu pola renovación de la tonada y que dexó grabaos dellos delos discos claves pa entender el xéneru, como’l tituláu “Diamantina Rodríguez canta a Torner”.

Esta renovación tan radical de lo que ye un Xuráu d’un Concursu de Tonada tuvo una acoyida escepcional ente los propios cantadores, d’avezu molestos cola especial tendencia al capillismu dientro dela tonada y los escesos de valorar, por encima de cualuquier otru criteriu, la perfecta imitación al modelu que dexara un cantador de los denominaos clásicos d’una tonada –hasta l’estremu de salir al escenariu y presentar les tonaes diciendo coses como “Carretera de Colloto”, por La Busdonga-.

Lo que nun ye, sinon, el segundu de los grandes cambios que s’alvierte nel Concursu Cuenca del Caudal: l’apuesta decidida polos cantadores. L’apuesta por valorar la so voz y les sos característiques individuales.Una apuesta que da seguridá a les voces grandes y qu’anima a zafase del pesu de la imitación a los imitadores natos. Posiblemente enxamás naide llegue a cantar el “Ave María” de Schubert como María Callas, pero toa aficionada y profesional del cantu guarda l’enfotu de superala. Ye un exemplu pareyu al que podríamos facer con “Arboleda bien plantada”. El patrón dexáralu trazáu Diamantina. La mesma Diamantina incita a les nueves xeneraciones a superar esi modelu, a que cada una faiga’l so propiu patrón.

Asina les coses, na edición d’esti añu, la númberu XI, presentáronse más de mediu centenar de voces, de les que pasaron venti, diez masculines y diez femenines, a les semifinales. Los diez homes fueron: Andrés Cueli, José García “Che de Cabaños”, José Antonio González “Cantu la Vara”, Julio Mallada, Juan José Martínez, Celestino Rozada, José Manuel Robledo “Lolo’l de Cabranes”, Rogelio Suárez, Ismael Tomás y Jorge Tuya. Les diez muyeres: Pilar Barreñada, Liliana Castañón, Lorena Corripio, Rosi Fernández, María José García, Laudelina Hortal, Begoña Rodríguez Aranguren, María Sánchez “La Pastorina del Cares”, Anabel Saniago y Marisa Valle.

La primera semifinal, la masculina, tuvo llugar el sábadu 12 de xineru y nella escoyóse a les cinco voces qu’aportaríen a la final. Dalgo que tamién volvió ocurrir na semifinal femenina del sábadu siguiente.

La final fue una apoteósis de públicu y d’entrega de los cantadores, siendo especialmente riñida la masculina, como pue comprobase na escasa distancia de puntuación ente los tres primeros clasificaos. Les puntuaciones del Xuráu son públiques y sirven d’indicador. El máximu posible a obtener yeren 60 puntos.

El resultáu del apartáu femenín fue’l siguiente: Primera, Marisa Valle Roso, 55 puntos. Segunda: Anabel Santiago, 50,5 puntos. Tercera: Lorena Corripio, 43,5 puntos. Cuarta: María Sánchez, 42 puntos. Y quinta: Laudelina Hortal, 31 puntos.

El resultáu de la final masculina quedó asina: Primeru: Jorge Tuya, 50,5 puntos. Segundu: Rogelio Suárez, 50 puntos. Terceru: Juan José Martínez, 49,5 puntos. Cuartu: Andrés Cueli, 46 puntos. Y quintu: Ismael Tomás, 41, 5 puntos.

La entrega de premios, metanes una espicha, faise nelpueblu de Returbiu. Pal que quiera dir: sábadu 9 de febreru a partir deles siete de la tarde.