L'añu de "Let it be"
2009 / 09 / 25 - Les Noticies
En septiembre de 1970 malapenes llegaba a sonar otra cosa nel tocadiscos de la sala Paláu de Mieres que’l single “Get back” de los Beatles. Tiempu alantre acabó diciéndose que “Let it be” fuera’l más grande de los éxitos del últimu de los sos discos editaos. Seguramente ye cierto. Pero, dixeran lo que dixeran los comentaristas radiofónicos y los periodistas musicales na prensa, “Get back” fue la banda sonora d’aquel tiempu pa una xeneración que gustaba de sentise diferente a partir de sentir la música que llevaba años faciendo diferentes a les xeneraciones moces de mediu mundu.
Pero, nun yera cierto. “Get back” yera la música d’un ghetto. Que medraba colos años. Pero que, nel Mieres, na Asturies y na España d’aquel tiempu, nun dexaba de siguir siendo un ghetto. El 27 de septiembre d’aquel añu, na fiesta de Los Mártires nel Valle de Cuna, yá sonaba como himno semioficial “La romería” de Víctor Manuel y tovía, anque los tiempos llevaben a velo desaparecer, siguía siendo cierto aquello de que diben subiendo los mozos colos corderos al llombu…
Pero, tamién, aquel 27 de septiembre, el cantar que diba camín de convertise na verdadera banda sonora del tiempu yera “Carmina”. Tamién de Víctor Manuel. Acabante de sacar en single. Una de les que los años terminó por facela tan popular qu’acabó formando parte, xunto a “Dicen que va a poner un ferrocarril a Mieres”, “Santa Bárbara bendita” o “Borrachu m’acosté anueche, borrachu me llevanté”, del cancioneru popular alcohólicu d’esta tierra y de bien d’otres Tovía agora mesmo, cuando nengún guaje de menos de 18 años sabe entonar cuatro notes siguíes de “Get back”, pue sentíselos pela “empinada cuesta que va camín de la ermita” cantar a gritu peláu lo de “nun me llores más Carmina qu’esto pronto acabará” (que nun saben de quién ye, pero que cuiden que forma parte del repertoriu de tolo que se pue cantar depués de facer tola cuesta repostando sidra dulce).
Aquel día yo subiera con mio madre al alborecer. A la primer misa de la mañana na ermita. Mio padre quedara porque aquella mesma tarde nel Teatru Campoamor recibíen un homenaxe Cuchichi y Miranda. Yera domingu. Día de fiesta grande, non solo en Mieres. P’asistir al Campoamor diba selmanes que nun había entraes. Presentábalo l’actor José Suárez. Y, comentábase, de fontes bien informaes, que diben cantar los dos. Lo que depués resultó ser cierto. Cuchichi tenía ochenta años. Miranda, enforma más mozu pero peor de salú, tenía setenta y tres. Cumplíense ventiocho años de la disolución del grupu al que-y dieran sonadía, Los Cuatro Ases de la Canción Asturiana. Pero, por más del tiempu trescurríu, la xente sentía verdadera señaldá d’aquel grupu y siguía teniendo verdaderu apreciu a sentir cantar “Soi asturianín”, a Cuchichi, y “Les cuatro Poles”, a Miranda.
Esta mesma selmana na que tamos les páxines salmón de los diarios falaben de la espectacular cayida de les ventes de discos nel primer semestre de 2009. Hasta’l puntu de que la industria rebaxa a 30 mil el númberu de copies que se tienen de vender d’un CD pa da-y un Discu d’Oru. Asina les coses, nun ye d’estrañar qu’esa mesma industria invente lo imposible pa vender lo que seya: la última xugada de márketing a la qu’asistimos ye la enésima remasterización de les canciones de los Beatles. Según tamién les páxines salmón d’esti mesmu domingu, la franxa de mercáu a la que va dedicada una remasterización d’esti tipu ye la de compradores de más de cincuenta años. Tamién, esti mesmu domingu, nel top manta de la Plaza del Mercáu de Mieres topábase a tres eurinos tolos Beatles que quixeres y más. Nun sé si nes copies remasterizaes. Pero, tampoco diba dar muncho más.
Pa la industria tá bien que los Beatles vendan agora lo que nun vendieron nin de broma nel momentu. Pero, tampoco nos puen mentir los expertos en marketing y los comentaristas a sueldu nes radiofórmules qu’aquella fuera la música que sonaba de verdá nos nuestros años setenta. Y vengo de senti-ylo esta mesma selmana a ún de los más reputaos equí n’Asturies. Una mentira que cuido, de tanto repitila, acabó creyéndola. Y agora pretende, col meyor propósitu del mundu, que comulguemos con esa rueda de molín.
Claro que’l pop que representaron y siguen representando los Beatles, ye la banda sonora del nuestru tiempu. Pero, por más que-yos duelga a los responsables d’esa industria que se funde y d’eses radiofórmules que pierden oyentes, aquel añu 1970, n’Asturies, vendiéronse más singles de la colección de tonada editada pola Asociación Amigos del Bable que de Let it be. Aquel 27 de septiembre de 1970 quedó más xente a la puerta del Teatru Campoamor esperando poder entrar al homenaxe a Cuchichi y Miranda que los qu’asistieran cinco años enantes a la Plaza Monumental de Toros de Barcelona a ver a los Beatles (qu’agora aparez nes enciclopedias del rock bizarru español como la gran cita musical del sieglu y que nosotros, gracies a qu’ente los presentes taba ún de Mieres, sabemos que yeren más bien pocos).
El día enantes del 27 de septiembre d’esti añu celébrase nel Auditoriu Teodoro Cuesta de Mieres el XXIII Memorial Silvino Argüelles. L’añu pasáu retresmitiéralu la TPA. El share amosó que’l programa superara la media de cincuenta mil espectadores, con momentos de setenta mil. Cifres que, fuera de bromes, pa sí quixera de ventes la editora que saca la remasterización de los Beatles.
Un últimu apunte. Sigo falando d’un mercáu como Asturies. España cuenta con cerca de 50 millones d’habitantes. Asturias con 1. Trátase d’una cenciella regla de tres. Si hai que vender 30000 copies n’España pa obtener un Discu d’Oru, n’Asturies consiguiríase vendiendo 600 copies. Y tamién sabemos que ye complicao vender 600 copies n’Asturies pa un grupu de rock. Pero, esa cifra supérenla tolos cantadores de tonada que saquen discu. Por mui malos que sean. Pola contra, les cifres de los buenos dan, siguiendo esa regla de tres, pa Discu de Platinu.