Pel Camín de Santiagu
2009 / 09 / 18 - Les Noticies
L’añu que vien vuelve a ser santu. Santiagu cai en domingu. Como la villa de Mieres tien de nome oficial Mieres del Camín, tengo de tener siempre presente esti fechu relacionáu col Camín de Santiagu. Si esti añu la ruta ente Lleón y Uviéu tá enforma llena de peregrinos, nun quiero nin pensar lo que va ser el que vien. Cuido que va tar a atacada. Lo que parecía ser una moda pasaxera a primeros de los noventa, nun dexa de siguir medrando camín del 2010.
Falara con Doc, un músicu del grupu portugués Quadrilha, pa trabayar unos temes relacionaos col Camín de Santiago en Portugal. Pero la mala salú de Doc nun lu permitió llegar hasta esti añu y quedé nes manes colos cantares asturianos d’aquel proyectu. Cantáranlos nel 2005 –tamién añu santu- xente como Liliana Castañón, Urbano Prieto, Anabel Santiago y Berto Varillas. Pero, lo qu’apuntaba ser un proyectu que trespasara les nuestres, cuido que va quedar en suspensu.
Bona parte de les idees surdieron falando demientres de fondo sentíamos, a mediaos de los noventa, el discu Santiago, de los Chieftains. Una grata sorpresa en Portugal. Una verdadera revolución en Portugal. Nun sabría qué dicir n’Asturies. Xuacu Amieva participaba nél. Al delláu de músicos d’un nivel internacional tan impresionante como’l d’él. Pero, yá pasaron tantos años, que nun pueo recordar cuánta xente se diera cuenta d’ello.
Con amigos de Galicia sentimos el tema ocho del discu. Tovía agora mesmo “Guadalupe” sigue siendo un tema impresionante. Conocíu por tol mundu, non solo en Galicia. Pero bien poco interpretáu pola xente del mundu del folk. Dalgo que tamién ocurría col míu preferíu del discu: “Galleguita”. Un cantar que namás conocía de les nueches de vinho verde en Nazaret y de les de Ribeiro malo en Santiago. Tovía, agora mesmo que sigo sintiendo la grabación de la qu’escribo l’artículu, continúa siendo’l míu preferíu, al delláu del directo que montaron nel tema “Dublín in Vigo”, que sigue sonando a aquelles nueches de vinho y viño.
Cuidé d’aquella que la revolución qu’aquel Santiago de los Chieftains representaba en Galicia diba tener repercusión inmediata na música que díbamos sentir depués. Y, de dalguna manera, qu’esta revolución diba aportar a Asturias. Nin pasó en Galicia, más allá de lo que significó nestos años la obra de Carlos Núñez. Nin aportó a Asturies, por más que se quixera pensar lo contrario a partir del éxitu de pocos años depués d’Hevia.
“Galleguita” ye un bon exemplu d’un tema que los Chieftains convierten en magníficu cuando nengún grupu folk gallegu de cierta relevancia s’atreviera con él. Y siguen ensin facelo. Quiciás agora cola disculpa de que sedría imposible ameyoralu. Lo que ye falso. Siempre ye posible dar una visión propia d’un tema propiu.
Lo que, falando con Doc tiempu alantre y con amigos comunes gallegos, llevóme a pensar nesi folclor musical secretu qu’añera nos nuestros corazones pero que los nuestros grupos folk nun son quién a afrontar. Cantares que tol mundu conoz pero que, por ser quicios dafechamente populares, nun llamen l’atención más que de la xente que los siente dende fuera, ayenos a la nuestra tradición.
De les nueches sidreres d’Asturies en collaboración con estos amigos fui intentando sacar alantre la mio pequeña antología d’esi repertoriu al que nun-y damos nenguna importancia. Pero que la tien. Más que nada porque ye’l que primero llama l’atención poderosamente a la xente que lu siente ensin nengún prexuiciu, dende fuera. La xente pal qu’esi tema nun ye más que dalgo dafecho popular, ensín nenguna otra connotación adicional.
Cuido que, si los Chieftains volvieran a percorrer musicalmente esi Camín de Santiagu y ficieran los caminos llaterales, nes nueches sidreres de Mieres del Camín toparíen un repertorio magníficu pa incluir nesa segunda parte necesaria. Dellos de los cantares namás que son de Mieres, del Mieres de tola vida, verdaderos himnos de les nueches d’esta tierra. Pero, bien d’otros, pertenecen al repertoriu común de tolos asturianos. Cuando non de tolos borrachos d’esti mundu. A la manera de “Galleguita”. Que cuido tien de ser más de cualaquier parte que de Galicia. Como esi cantar miudiño qu’incorporen dientro de “Dublín in Vigo” y que toos tuvimos la suerte de cantar dalguna vez.
Contaba Paddy Moloney naquel 1996 que’l so pelegrinaxe polos caminos de Santiagu lleváranlu a Cuba, otres islles del Caribe, México y California. Pero, “desgraciadamente, per agora, el tiempu y los horarios detuvieron los nuestros viaxes. Argentina, Brasil y Venezuela van tener d’aguardar otru momentu, otru proyectu, otra xornada de regresu a Santiagu”. Namás espero que, ente los países que-yos resten y les islles del Caribe que-yos falten, s’afaye esta Asturies del sur. Porque, nestos últimos casique catorce años que medien dende la publicación de “Santiago”, naide aparó nesa “Galleguita”, nesa “Guadalupe” o nesi “Miudiño” que nosotros tamién tenemos.