Danzái, danzái, malditos
2008 / 01 / 25 - Les Noticies
Nel mesmu día, xueves 17 de xineru, recupero pela mañana la versión íntegra de 1981 de la entrevista a Carmen Vigil –que fuera directora de la Sección Femenina de Mieres-, xinto col padre Jose Manuel Feito –actual párrocu de Santo Domingu de Miranda que publicara “Del Folklore de Somiedo” nel añu 1956-, falo sobre l’orixen de l’asturianada pela tarde nel salón d’actos del Corte Inglés d’Avilés organizao pela xente del Grupu de Escontra’l Raigañu y veo pela nueche’l DVD de Vezos Astures “El baille na tradición asturiana”, dirixíu por Ramón Lluis Bande.
Comentábame Carmen Vigil: “En Mieres tovía se baillaba nesos años de manera natural” –taba falándome de finales de los años cuarenta cuando ella regresa de Berlín-. “Más que nada a la gaita: la jota, el saltón y la muñeira. Pero tamos falando de xente mui mayor, polo qu’a la hora d’aprender esto a les nueves xeneraciones planteámonos como principal obxetivu fixar la tradición”.
Sorpréndierame’l términu: “Fixar la tradición”. Cola vehemencia de los pocos años aporfié que la tradición yera dalgo vivo, en continua evolución, y si se fixaba perdería esi carácter. “Tábamos nun momentu únicu: de nun quedar fixada, desaparecía”, díxome bien segura. “Al quedar fixaos, por exemplu, los pasos de la jota, abríase más que nunca un trabayu impresionante, el de crear nueves jotes a partir de los pasos qu’identifiquen el carácter de jota”.
Pregúnto-y al padre Feito polos cantares vaqueiros d’aquellos años cincuenta nes brañes de Somiedo que’l frecuentaba como cura. Fáigo-y llegar un comentariu cultu enforma estendíu –l’últimu d’ellos llégame de boca de Xuan Bello- acerca de la falsificación xeneralizada del folclor musical de los vaqueiros.
Nun me diz nada que nun sepa por mio mesmu. Les brañes de mio casa dan contra Somiedo y el folclor musical de xaldos y vaqueiros ye’l mesmu. De la mesma manera que l’asturianada fue la visión culta de la tonada asturiana, la “vaqueirada” fue la visión romántica –polo que tamién culta- del folclor musical de la tierra de brañes.
Nel turnu d’intervenciones del públicu tres de la charla nel salón d’actos del Corte Inglés, pregúntame Marisa Luque sobre la falta de reconocimientu actual del trabayu de los grupos de recuperación etnomusicolóxica. Un trabayu que, en bona parte de los casos, cumple los venticinco años y que sirvió de base pal folk de los últimos años, que tuvo nel orixen del boom de la gaita y que respuende en bona midida a l’apuesta de renovación actual de l’asturianada. Y, con too, los grupos de baille siguen siendo los parientes probes del folclor.
La respuesta ye complexa. Los cantadores de tonada sufren cada quince/venti años un relevu xeneracional y la so apuesta moderna pola innovación sienta les bases nel más estrictu conocimientu y respetu de la tonada clásica. Los gaiteros partieron de los patrones musicales afitaos polos clásicos colos que tovía-yos tocó compartir escenarios y enseñances –Remis, Galán, Veriña, Castañón, Silvino...- y atreviéronse con too col soinstrumentu nes manes y unos conocimientosmusicales que-yos ampliaron los horizontes y les posibilidaes de facer coses nueves. Los grupos de folk garraron la música tradicional pa facer d’ella un pandeiru y toos celebraron y celebramos cada nueva innovación, cada nuevu arreglu, cada nuevu cantar... como que yeran parte de nosotros mesmos.
¿Y los grupos de baille? ¿Ónde quedaron toos estos años los trabayos, les esperances y los sueños de los componentes d’estos grupos? ¿Ónde, demientres vieron como-y poníen una cai a Anabel Santiago n‘Uviéu, demientres sintieron a Mariluz Cristobal cantando “Busindre Reel” tres de la gaita d’Hevia y d’un maremagnum rítmicu, demientres decenes de conceyos creaben escueles de música tradicional que nun incorporaben el baille y demientres toos baillaben a blincos “Na caleya” de La Bandina?
Siento a la nueche en casa delantre de la pantalla a ver el DVD de Vezos Astures. Grabáranlu nel teatru de la Casa de Cultura “Teodoro Cuesta” de Mieres y, por ello, tocóme velos en directo. Más allá de los propios bailles y dances, tratábase d’un productu de la factoría “Bande” y por ello la puesta n’escena rompía en bona midida colos estereotipos a los que nos tienen avezaos los grupos de baille: la lluz cenital, el fondu negru, la ropa blanco, los ritmos milimetraos, l’aire ascético.
Cuido que se trata d’un trabayu necesariu y que la posibilidá que-y brinda, per un llau, la TPA de dilvulgalu al traviés de “Pieces” y, per otru, el propiu percorríu comercial del soporte DVD, puen facer qu’esti productu influya de bona manera nos trabayos posteriores d’otros grupos de baille (d’igual manera que la influencia del DVD “Pasamentu” se vien dexando sentir nos montaxes escénicos d’otres formaciones dende va unos años).
Cuido tamién que, del importante grupu de persones con conocimientos sobre estructures y pasos, tien de surdir la capacidá de crear dalgo nuevo. Por más qu’esta posibilidá a bien de xente-y siga sonando a sacrilexu. Un pasu necesariu que vimos dar nel ámbitu del flamenco y de la danza irlandesa, y del que tamos asistiendo a los primeros avances en Galicia y nel País Vascu. Un pasu obligáu que nos fadrá ver, nun futuru que nun tien de tar mui allá, a un gaiteru componiendo un saltón nuevu, que tendrá d’arreglar pa un grupu de folk con espíritu nuevu y nel que veremos baillar los pasos de siempre d’un nuevu saltón. Y que siguiremos reconociendo como saltón, por más que seya dafechamente nuevu, pol so ritmu, pola so melodía y polos sos pasos.
Diz Yolanda Cerra nel folletu del DVD –nel mesmu castellanu nel que me falaba Carmen Vigil y que yo, con espíritu irreverente, traduzo-: “Esta obra, ensin dulda, va contribuyir a crear un estándar”. Palabres idéntiques a les que me dicía venticinco años atrás la citada Carmen Vigil.
Regreso xunto al padre Feito, con alma de pecador, a sentir al grupu Madreselva cantar unes vaqueiraes. Nada que ver coles de Somiedo orixinales. Y, en verdá, poques coses hai nelles que nun les recuerden.
Danzái, dánzái... hasta que vos llamen malditos y renieguen de vosotros los que ven la danza y el baille como un estándar inmutable. Son los mesmos que criticaron les vaqueiraes de Madreselva, el pericote de Manolo Quirós, los cantarinos de Vicente Díaz, les balaes de Llan de Cubel, el garrotín d’Hevia, los colchones etéreos baxo la voz de Mariluz Cristobal y los arreglos orquestales de Ramón Prada.
Un DVD como ésti anima a atrevese con too. Quiciás pola desnudez cola qu’amuesen los bailles. La frescura que da desaposiase d’una carga tan pesada como’l traxe estandarizáu d’un sieglu XIX, idealizáu y señaldosu, falsu y recurrente.