Son cientu y doce

2008 / 01 / 22 - Personal

Dacuando faciendo llimpieza o esbillando ente la parva papeles que van quedando atrás, aparecen coses qu’escaecieras siquiera que teníes. Asina, d’ente los disquetes d’un ordenador vieyu del tiempu nel que los ordenadores llevaben disquetera (que fue l’otru día pero da la sensación que fuera muncho más allá), alcontré l’archivu de les grabaciones en directo del espectáculu Nel Camín.

Nesti espectáculu –del que faigo referencia nel apartáu d’espectáculos de la páxina web- intervinieron como cantadores Liliana Castañón, Anabel Santiago, Urbano Prieto y Alberto Varillas; y como músicos el propiu Alberto, Michael Lee Wolfe, Manuel Cordero y Xaime Arias, que corriera al cargu de los arreglos musicales.

Nel Camín consistía nun repertoriu de cantares relacionaos col pasu del Camín de Santiagu n’Asturies. Dellos, como “Amores que pasen”, quedaron nel repertoriu d’Anabel Santiago pal so últimu CD, Desnuda. D’otros, como “Son cientu y doce”, nun se fizo más con ellos.

D’ehí que, por más que la grabación seya deplorable, pague la pena sentir esta vaquerada llibre. Canta Anabel Santiago.