El triunfu de Vicente Díaz

2008 / 01 / 18 - Les Noticies

Con motivu d’una serie de conferencies nel British Forum for Ethnomusicology sobre los cantos tradicionales llibres que perviven n’Europa unvio les grabaciones en MP3 de los últimos concursos y delles de les nueves esperiencies (que yá s’alcuentren asgaya documentaes en You Tube) presentaes nel reciente programa de la TPA Gran Gala de la Música Asturiana.

El nomamientu reciente de ciertos cantos como Patrimoniu Inmaterial de la Humanidá pola UNESCO revitalizó’l debate sobre’l valor d’estos xéneros llibres. Poco o nada relacionaos ente ellos, malapenes estudiaos, en dellos casos fízose por convertilos na verdadera seña d’identidá d’un pueblu, véase’l casu del Kalevala o de les Voces Búlgares.

Dende va unos años los ideólogos y productores de la word music tiren d’esos cantos pa dir surtiendo al mercáu de nuevos soníos. El mundu de la publicidá necesítalos pa los proyectos novedosos ya imptactantes. L’ámbitu de los documentales empléalos hasta l’agotamientu como banda sonora de paraísos etereos.

Va unos años, dientro de les Xornaes Internacionales de Montaña de Mieres, pregunté a Joe Simpson el por qué del empléu de música rumana de flautes –metanes d’un maremagnum rítmicu creáu nun estudiu de grabación- na proyección del so documental sobre l’accidente que sufriera na cordelera de los Andes.

La respuesta fue clara:

-Ye una música que me suena a andina.

Ye cierto. Escuches los discos d’años atrás del grupu sueco-finlandés Hedningarna y el reciente de les asturianes Dulcamara y entiendes dafechamente que dientro del mesmu grupu de persones dalguién lu vincule a la música beréber, otru a la turcomana y un terceru a la música Café del Mar de les nueches ardientes de Corfú.

Lo que nun ye nin vuelo nin malo. Tamos falando de mercáu y un productu que quiera vendese en mercáu tien que ser a adaptase a los estándares de mercáu. L’estándar de mazana golden, verde y relluciente, qu’afayo nel mio puestu del mercáu correspuéndese cola mazana, tamién golden, tamién verde y relluciente, del mercáu cubiertu de Damasco.

Con too, nesti mercáu cubiertu, na boca que da a la mezquita de Fátima, un fruteru viende –al delláu mesmu de les mazanes golden- otra pequeñina, tipo reineta, que xugaba a la vista cola paleta de los marrones. Una mazanina única, propia de les pumaraes d’una pequeña vallada que desciende hacia Israel al pie de los Altos del Golán.

Esa otra mazana, por una estraña circunstancia del destinu -o, a lo meyor, simplemente pa que valiera pa sirvime de parábola-, costaba dalgo menos de la mitá que la golden. Yera comprensible: pal que nun tien más que’l vezu nel paladar de la falta de sabor de la golden, l’acidez de la otra, el mesmu tastu a tierra, l’aspereza del granu ente los dientes, llévate a nun ser a apreciala.

Nel añu 1981 Vicente Díaz saca “Fiesta en la aldea”, del que viende yá d’aquélla más de trenta mil copies –nada s´de de les que lleva vendíes dende entós p’acá-. Naquel entós ye un conocíu cantador de tonada tradicional, bien tralláu y premiáu nos diferentes concursos de tonada del tiempu y cuenta con dos disco de tonada grabaos nos años 1977 y 1978.

La so apuesta por un tipu mui concretu d’instrumentación y l’averamientu de la so música a los estándares de la música más popular del momentu valiéron-y una montonera de crítiques, asina como’l más grande de los desprecios por parte de lo que consideraron qu’aquello yera un subproductu comercial y que la música asturiana yera otra cosa.

Vicente Díaz, dende la perspectiva del so éxitu de mercáu, poco más podía facer que riíse de los sos detractores. Tovía, alredor de trenta años más tarde, lo sigue faciendo. Naquellos primeros años ochenta nos qu’empezaron a conocelu como “l’enllenapraos” yá funcionaben o taben a puntu de facelo bona parte de los músicos y cantantes que pueblen el nuestru pequeñín universu sonoru.

Toa nueva propuesta apuesta por un nuevu mercáu qu’incorpore’l vieyu. Ye una máxima xeneral del márquetin de productu. La música de Vicente Díaz marca un camín que bien d’otros siguieron, en xeneral con enforma menor fortuna. Bona parte del so erru radicó en nun apostar pol so propiu mercáuy facelo por propuestes de músiques universales que yeren cada vez más ayenes al so públicu cautivu: el propiu de la so tierra.

Pregúnto-y al tenderu de Damasco d’ónde son orixinaries les mazanes golden que viende. Dizme:

-De la mesma pumarada qu’este otres.

Y señálame les otres pequeñes que na mio ignorancia definía yá como productos propios por escelencia de la tierra.

La mazana golden recreada por Vicente Díaz na so música parte de la propia tierra, pero incorpora l’apariencia d’una modernidá que la faiga más asumiblepol mercáu y, asina, máspopular. Esti mesmu esquema, con mayor y menor fortuna, síguese reproduciendo.

Les canciones de Vicente Díaz suénennos a casete de los tenderetes de Tetuán. Como agora nos suenen les de Dulcamara o les del Tutu Studio 07. Como enantes nos sonaron tantes otres.

Nun creo que se trate del triunfu de la razón. Pero, cuido que se trata del triunfu de Vicente Díaz. La propia declaración como Patrimoniu Inmaterial de la Humanidá y los trabayos específicos comolos del British Forum for Ethnomusicology intenta non solo preservar estos cantos sinon consiguir que sigan teniendo vida propia y que nun terminen en convertise en cantos anacrónicos.

Un exemplu: el flamenco nun pudo acoyese a la declaración de Patrimoniu. Intentólo’l gobiernu d’Andalucía. La razón espuesta pola UNESCO yera la mesma que pa l’asturianada o’l fado: inda tienen tal vitalidá que, pel momentu, entiéndese que nun se trata de un patrimoniu en peligru de desaparición.

Por ello, como cantos vivos, puen siguir sirviendo de campu d’esperimentación. El flamenco pue con too, dende Camela a la Niña de los Peines, dende Kiko Veneno a Antonio Mairena. L’asturianada tamién.