Amieva, Ponga, Los Beyos
2009 / 06 / 12 - Les Noticies
Cola disculpa de la celebración del XVIII Certame de Quesu Los Beyos, esti domingu pasáu nel pueblu de Santillán, averé tamién a la entrega de premios del Concursu de Canción Asturiana, ún de los más escaecíos polos medios de comunicación y ún de los que más méritos tien no que refier a organiación y a siguimientu per parte del públicu.
A 12 € el de vaca y a 14 € el de cabra. Asina taben los quesos. La disculpa tamién yera asistir al fin de la guerra pola denominación del quesu Los Beyos. Una guerra política na que quixeron meter a los artesanos/industriales queseros y na que namás se metió, como siempre acaba ocurriendo nestos casos, al que quixo metese. Santillán significaba nesta edición un principiu d’alcuerdu de fin de les hostilidaes. 15 productores de quesu Los Beyos tuvieron presentes. D’Amieva y de Ponga. Dexando constancia que’l quesu ye patrimoniu d’una tierra más qu’un simple topónimu. Dalgo asina como la xirandiya de Sebarga namás la pudieran baillar los d’esi pueblu.
Alegría doble cuando supe que ganara’l certame la quesería La Collada del pueblu d’Amieva, de la casa na que viviera ventiocho años atrás, de la xente de la qu’aprendí ente tantes otres la citada xirandiya de Sebarga: “Nun vi vega más hermosa / que la Vega de Sebarga / onde tán los mio amores / los mios amores del alma. / ¡Ai, qué castillu! / ¡Ai, qué muralla! / ¡Ai, qué castillu / prenda del alma!”.
Con ellos, colos ganadores del Certame, asistí a la entrega de premios del Concursu d’Amieva, nuna ceremonia na qu’obraron de maestros de ceremonies Julio César Baragaño, presidente d’AICA (Asociación d’Intérpretes de Canción Asturiana), Fernando Ruiz, coordinador del concursu de Xixón, y Narciso Fernández, responsable del concursu d’Amieva y miembru del xuráu del concursu de Mieres.
Celestino Rozada resultó ganador d’esta edición, siguíu de Jorge Tuya. Marisa Valle fue la ganadora femenina, siguida d’Anabel Santiago. Resultando, igualmente ganadaora del apartáu de nueves tonaes, Marisa Valle acompañada del gaiteru Pablo Carrera, que tamién l’acompaña nun par de temes del so últimu CD, Un pasu más (Ámbitu, 2008).
La gran cita del oriente asturianu contó con más de mediu centenar d’espectadores. Tres de la entrega de premios -llarga y cansina con suelen ser tolos actos d’estes característiques-, llegó’l turnu d’actuación de les voces ganadores. Celestino Rozada, munchu más seguru d’él mesmu sintiéndose ganador, llució una voz esplédida. Marisa Valle, maxistral una vez más, cola tranquilidá que la caracteriza, dexó clares les sos posibilidaes.
Un bastiáu tremendu quixo desllucir la fiesta. Hasta’l propiu presentador, baxo la carpa y enriba l’escenariu, nun les tenía toes con él. Llegó un momentu nel que’l ruíu del agua contra la llona de la carpa mataba la so voz presentando. Pero l’agua nun fue quien a poder coles voces de los ganadores que, en nada, ficieron escaecer al públicu asistente la fuerza de la lluvia.
La pervivencia nel tiempu d’un Certame con ésti d’Amieva ye un verdaderu milagru, nel que tien bien d’importancia la figura de Narciso Fernández. Un trabayu impresionante pa sacar alantre un concursu que, como indicaba más arriba, nun suel contar con munchu apoyu en cuantu a siguimientu per parte de los medios de comunicación. Pero que, pola contra, sigue teniéndolu de los cientos d’espectadores que, selmana tres de selmana, a lo llargo de la primavera, continúen averándose sábadu a sábadu al escenariu de la Casa de Cultura de Precendi y enllenado’l so Salón d’Actos, como agora esti domingu la carpa de Santillán, nel actu de la entrega de premios.
El siguimientu de concursos como los d’Uviéu, Xixón o Mieres, evidencien el centralismu manifiestu de la información. D’ehí que reseñe la especial importancia d’un Certame como’l d’Amieva. Yá tá en marcha la prósima edición. Nesta ocasión pasaron pol escenariu noventa voces diferentes. Pa la que vien pretenden llegar a les cien. Un númberu impresionante si se piensa que, nos otros concursos citaos, la media de participantes nos apartaos de tonada ronda’l mediu centenar. Una evidencia más de lo que significa Amieva dientro del ámbitu de la tonada.