El síndrome burnout
2009 / 06 / 05 - Les Noticies
Llevamos años conociendo la dolencia. Agora tien nome propiu en psicoloxía y tratamientu. Na nuestra terminoloxía popular, tan válida o más que la oficial, decíamos del amigu o del compañeru que sufría la dolencia que “nun podía col alma” o, nos casos más agudos, que “tronara”. A lo llargo d’estos últimos años, pola influencia del inglés, algamó’l llinguaxe cotidianu la locución alverbial “tar quemáu”. Agora, el que más o’l que menos, conoz el términu científicu inglés pa definilo: “burn-out”, o directamente “burnout” (pronúnciese “burnáu”, que suena más asturianu y recuerda dafecho lo de “quemáu”).
Nun ye dalgo d’agora. Agora cenciellamente tiénse-y puesto nome. En psicoloxía mesmo nun dexa de ser una variante más de la depresión. Llevo tiempu viéndolo en músicos. Enantes lo viera n’escritores. La llingua asturiana y tolo que l’arrodia ye un tarrén propiciu pa ello. A bien d’escritores nun-yos acaba pagando l’esfuerzu d’escribir una novela pal escasu reconocimientu social y de llectores que se consigue con ello. Esti sobresfuerzu va perdiéndose colos años. Anque nun sea xeneralizable. Pero, más que menos, toos tenemos un conocíu que dexó d’escribir víctima de la incomprensión del mundu y del esfuerzu titánicu d’esta llucha na que siempre toca cumplir el papel d’espartanu nes Termópiles (“y los perses van terminar pasando”, que dicía nun poema C.P. Cavafis).
El campu de la música asturiana ye tan asemeyáu al de la lliteratura asturiana que yera normal que tamién se produxeran situaciones idéntiques. Como nel casu anterior danse dos resultaos: el del qu’abandona y, más común, el del que se refuxa nél mesmu como coraza contra la incomprensión. L’abandonu ye una solución radical, pero de dalguna forma esti propiu radicalismu lleva’l xermen de la curación. El que ruempe col pasáu tien más fácil organizar un nuevu futuru. El que se refuxa dientro d’él acaba interiorizando la creciente hostilidá del mundu. La inversa de la conseña de los Tres Mosqueteros: “Toos contra ún y ún contra toos”.
Bien de los discos de los que nun falo nesta sección son productu directu d’esti sentimientu de tar quemáu. Un mecanismu de defensa que lleva al músicu a cuidar que fai música pa él mesmu. Los baxos costes de producción ayuden a ello. El malditismu, la glorificación del malditu como sinónimu del artista por escelencia. Un rasgu definitoriu del poeta (que ye tan buenu según él y según el círculu de los sos íntimos y de los críticos especializaos). Y que, nel músicu cuerre pelos mesmos senderos.
La desaparición esti añu d’un programa de subvenciones como yera l’Axenda Musical de la Conseyería de Cultura en collaboración colos Ayuntamientos, la propia crisis xeneralizada que recorta los gastos de los escasos centros que programaben música por cuenta d’ellos y el mesmu fechu de que la bona parte de lan música creada n’Asturies nun conecta col so públicu natural, profundiza hasta estremos desconocíos esta sensación de “quemazu”. L’abandonu alministrativu, la falta d’un circuitu y l’ausencia d’un públicu.
Va escases feches publicóse’l Llibru Blancu de les Industries Culturales del Principáu d’Asturies. Nel apartáu de la música, el llibru tá más blancu qu’en nenguna otra parte. Una fueya pa falar de la música grabada, fueya y media pa facelo de la música en directo y poco más d’otra fueya pa falar de la clásica. Si se llee’l conteníu d’eses escases fueyes vese que la empresa encargada de desarrollar esti trabayu nun tuvo nengún interés en constatar como taba n’Asturies la música grabada, los directos y la música clásica. Quiciás por desconocimientu (da la sensación en tou momentu que la xente que lo fai fala en xénerico y non en concreto, como si nun punxera los pies na tierra que tría), quiciás por desidia (el qu’encarga’l trabayu nun tien nenguna gana de topar cola verdadera problemática que s’ecuende detrás del impresionante númberu de xente que mueve alredor la música n’Asturies).
Tamién, per otra parte, el síndrome burnout se detecta en sentíu inversu al espresáu hasta esti momentu: cuando nun refier al reconocimientu del públicu hacia’l músicu, sinon cuando’l volume de trabayu ye tan grande qu’esti propiu volume mata la vida propia del músicu. Cuando’l músicu nun afaya alredor otra vida que la propia que deriva d’ello. Y, d’esto, tamién Asturies tien bien d’exemplos: músicos que dan clases, que toquen en dalguna de les orquestes, que participen en grupos de cámara, que tienen banda propia y que tovía cuando puen particpen en bolos alimenticios (la BBC: bodes, bautizos y comuniones). Músicos que, pola escasa reglamentación y profesionalización llaboral del sector, acaben siendo esplotaos del so propiu arte.
Alredor de la música muévese un mundu enteru. Mui relacionáu cola identidá artística d’un país. Pero tamién cola economía. Un estudiu en profundidá de cómo se mueve esti sector económicu ye dafechamente necesario: anque namás sea porque nél yá trabaya más xente qe n’HUNOSA. Anque namás sea porque, del abandonu de lo propio, tamién se desprende esti síndrome de burnout xeneralizáu qu’abarca a Asturies entero como comunidá.