La vieya escuela

2009 / 05 / 29 - Les Noticies

Préstame falar de les nueves propuestes de la tonada anovada. Más que nada poque sigue esistiendo una llinea trazada. Dalgo que podría llamase la tonada de siempre. Como tamién, al usu d’esta tierra, la vieya escuela. Xente que nos cien años, que tan cumpliéndose nestos años, de música grabada n’Asturies, vien faciendo lo mesmo qu’aprendieron de los sos mayores, de los sos maestros, de los que los precedieron.

Asina, vien de salir al mercáu’l CD En el roncón traigo Asturias, de Manuel García, “Manolo’l Barberu”, acompañáu pola gaita d’Alfonso Fernández, “Alfonsolo Les Regueres”. Un CD nel que, amás d’una esbilla de tonaes de tola vida, aparecen pieces de gaita y tambor, nes qu’esti últimu instrumentu tócalu l’hermanu del gaiteru, “Moisés Les Regueres”. Un grabación fecha con un mínimu de medios na ilesia románica de Santiago d’Arlós (que queda más que presente na reververación natural del soníu grabáu).

Y más nada d’información. Na tamién llinea trazada per otros trabayos que se vienen faciendo n’Asturies, el CD nun paga a la SGAE, trabaya sobre un repertoriu tradicional popular (por más que d’elles pieces son d’autor conocíu, que nun se cita en nengún momentu) y nun consta nengún productor del trabayu. Entendiéndose con ello que la producción cuerre al cargu del propiu autor.

L’abaratamientu de les grabaciones y de la edición del CD permite la edición de trabayos discográficos d’estes característiques. Nel casu d’Asturies, el presente añu, esta edición va ser grande. Nun se vende gran cosa. Lo que funciona ye’l conciertu directu y, con él, la venta directa. Na tienda y nel kiosku del mercáu malapenes vende Vicente Díaz. Y poco. L’últimu CD d’él llegó al top manta al mes de sacalu. Vese que nun ye un productu que controlen muncho. Nin la policía nin los topmanteros. La policía porque cada día pasa más del tema. Los topmanteros porque trabayen sobre un mercá residual que nun controlen. De controlalu yá taría na primer selmana.

Agora, el top manta asturianu, queda a la espera del nuevu trabayu de La Cirigüeña. Espérase pa les prósimes selmanes. Musicalmente nun valdrá pa nada, como tolos anteriores. Pero, como productu comercial pa pasar el ratu, ye tremendu: como se tien demostrao colos que lu precedieron. Un productu fechu cásique esclusivamente pa la venta en kiosku de mercáu, yá que depués en directu va en play-back. Un formatu nel que yá tan trabayando otros grandes autores asturianos, dada la simpleza d’usu y el recorte de gastos.

Manolo’l Barberu atrévese con tonaes clásiques, como “Aquellos bueyes” o “Viva la xente minera” y sal airosu del pasu pola maestría que da l’escenariu a xente como él que lleva bien d’años triándolos. Ensin nengún hestorial de grandes premios, la so presencia en concursos vien siendo continuada. Tien gustu a la hora d’afrontar los temes y sabe saca-y provechu a una voz xusta.

Nun sabría dicivos a onde tendríeis de dir pa mercar el CD. Como contaba, tien de ser un productu sacáu con vistes al directu más directu. Esta mesma mañana na qu’escribo l’artículu vengo de visitar el mercáu dominical de Mieres y tovía nun aportó a los puestos de venta. Lo que ye un bon indicador de la falta de distribución. La evnta en superficies comerciales ye ridícula y en tiendes especializaes mínima. Subsisten dellos puestos de los mercaos dominicales (Mieres, Llangréu, Grau, Cangues, Uviéu…), por mor de l’accesibilidá: el productu tá más a la vista qu’en nenguna otra parte. Y, tamién importante, el productu siéntese: la megafonía funciona a tope. El productu, bien de veces, entra pela oreya enantes que pela vista.