Ελευθερία Αρβανιτάκη

2009 / 05 / 22 - Les Noticies

Dende va años el productor musical tien un pesu impresionanrte sobre’l productu musical final. La hestoria de la producción musical ye paralela a la hestoria del pop. El pop non sedría talu ensin la capacidá pa xenerar millones de beneficios al traviés de les ventes. D’ehí que la figura de la persona que respalda económicamente un productu acabara siendo una de les partes principales del productu. Con una influencia más grande cuanto más pop fuera’l productu.

Esti domingu pasáu tuviera nel teatru de la Laboral Elefteria Arvanitaki p’amosanos una vez más que, los caminos del pop, como los del Señor del catecismu de cuando neños, son inescrutables. Nesta ocasión trayendo na mano y na voz el so últimu trabayu discográficu producíu por Javier Limón: el productor estrella de la música del mundu con cierta denominación d’orixen.

Conozo a Elefteria dende’l discu Las piedras y los cuchillos, del añu 1994, que mercara n’Atenas en versión orixinal y del que namás año más tarde m’enteré del so títulu n’español por una edición qu’equí se fizo. Dalgo que tamién m’ocurriera col míu preferíu, Canciones para los meses, del 1996.

A la salida del conciertu xixonés, xente que la conocía dende bien de trabayos anteriores, salía hasta ciertu puntu desfraudada. El nuevu soníu del so nuevu trabayu. Un directu qu’apuesta descaradamente por esi pop internacional de raigañu étnicu que define de bona manera la Casa Limón. Una manera de sonar que, más allá del bouzouki bien tocáu y de bien d’otres cuerdes del llugar, acaba sonando a rumba –les más de les veces- y esi ritmu binariu machacón al qu’acaben recurriendo más de tres cuartos de los intérpretes de países particpantes n’Eurovisión y que nun dexa de ser un pasudoble arrocanrroláu (si se me permite’l palabru).

Con too, conociendo la trayectoria de los últimos quince años d’Elefteria Arvanitaki, tien de convenise qu’esa búsqueda d’una sonoridá pop averada a la sonorida balcánica yá-y vien de tiempu. El que, en paralelo a la so trayectoria, siga la d’Alkistis Protopsalti, sabe de que toi falando. Esta búsqueda d’un determináu soníu pop averáu a los soníos de la so tierra ye nella una seña d’identidá y en tola nueva fornada de nueves voces. Dalgo a lo qu’ayuda’l contar con una bona cantera de compositores y de grandes lletristes colos que vienen trabayando dende antiguo. Una evidencia que, nel casu d’Alkistis, sintióse dafecho nel enorme éxitu de “Lava” del CD San Ifaisteio pou ksipna, del añu 1997.

D’ehí que la música producida pola factoría Limón acabe sonando a esa música que suena bien y que podría ser de cualaquier parte del mundu, onde se crucen bonos músicos con meyores voces, dende que se metieran na so casa-estudiu a repasar hores y hores de grabación de Diego el Cigala, que depués nun valieran pa munchu yá que dende ellí planteáranse otres nueves. Nel fondo, dende ellí, dende aquella grabación pa la productora 18 Chulos, empezaría a cambiar la música española –y de bien de llugares alredor d’España.

Por más que’l soníu de la factoría –y de toes aquelles que, como ella, crean soníos na mesma onda- seya unificador, el nivel de producción ye tan ricu que nestos momentos la diferencia ente un trabayu producíu nún d’esos llugares y el restu ye inmensu. La meyor de les prebes pue alvertise sintiendo el CD gratuitu qu’acompaña esti mes l’especial décimu aniversariu de la revista Interfolk. Nel recopilatoriu aparecen bandes de tolos requexos de la península y de les españes esteriores que s’escuenden baxo los nomes d’Al-Ándalus y Sefarad. La diferencia de producción ente xente como Kepa Junquera y Aljibe o ente Javier Paxariño y Llan de Cubel, tamién ye grande. Pero, por más grande que seya, la separación ente estos productos y los de factoríes como la Casa Limón ye tan descomanadamente inmensa qu’acaba siendo la diferencia ente’l pop y el folk. Entendiendo por folk esa música vieya que suena a vieyo y entendiendo por pop –nesti casu un ciertu pop con denominación d’orixen- la música popular propia d’esti tiempu y d’esti llugar.

Elefteria Arvanitaki salió al escenariu cola puesta d’escena qu’aveza. Tampoco tien tanta variación, más allá de les lluces y unos rexistros técnicos de xoníu impecables, frutu d’una apuesta pola producción del directo tamién manifiesta. Una Elefteria que percorrió bona parte del so repertoriu de siempre, pa defender el nuevu trabayu al delláu de Javier Limón como un nuevu camín que tien ganes de triar.

Había músicos y cantantes ente’l públicu. Tanto en Xixón como al día siguiente en Madrid. Eché a faltar productores. En Madrid, al menos, taba Javier Limón.

La mio opinión personal: siempre me presten los conciertos d’Elefteria. Tengo hasta ún grabáu en DVD que nun dexo de poner una y otra vuelta. Cuidando: ¿sedría esto posible dalguna vez con una voz asturiana? Pregunta retórica asgaya. Una manera de que cada ún tenga una respuesta pa ella. Una manera tamién d’equivocase.