Cursu d'asturianada. Tercera llección

2009 / 05 / 08 - Les Noticies

A primeros de sieglu XX la tonada asturiana sigue arrequexada na romería y, nes zones más industrializaes, en chigre. Nos cafés conciertos capitalinos, dientro del programa xeneral de varietés, tolo más podría vese una actuación del Gaiteru Llibardón –siempre de regresu de dalguna gran xira por Europa o Llatinoamérica- o d’Antonio Pozo, El Mochuelo, un cantaor flamenco con un enorme éxitu n’Uviéu que lu llevó a incorporar al so repertoriu tonaes asturianes, como “De Santander a Xixón”.

A la burguesía uviéina, xixonesa o avilesina muévele, más que nada, la zarzuela. La ópera va garrando, pasu ente pasu, el so llugar, pero l’espíritu elitista que la envuelve conviértela nun espectáculu bien costosu y mui minoritariu. Pola contra, cola disculpa de siguir siendo música culta –pero mui española-, la zarzuela ye enforma más llixera pa un públicu poco entendíu de música.

Una anécdota de va dos selmanes ye enforma esplicativu pa comprender aquel tiempu y aquella sociedá de primeros del sieglu pasáu nuna ciudá de provincia periférica. Llego al aeropuertu de Santander a buscar a la mio fía mayor. Al tiempu qu’ella, sal tamién un músicu de la orquesta que conozo. Ye d’un país del este, pero lleva yá tanto tiempu n’Uviéu que sabe facer bromes n’asturianu barriubaxeru. Regresa porque tien de tocar esa mesma tarde una zarzuela. La cosa parez apurada, pero véselu tranquilu. Más bien: véselu con esa pose que te da’l cuerpu cuando dalgo nun tien remediu.

-¿Tan espantoso ye? –pregunto.

Ponme cara de resignación cristiana.

-Pero, ¿nun tienes dalgo qu’ensayar? –sigo preguntando.

Abrió los güeyos, como’l que se sorprende.

-Ye una zarzuela –afirma seguru de que, cuando me diz que ye una zarzuela, yo yá nun necesito entender más.

-¿Qué toca esta vez? –sigo preguntando, más que nada por dar conversación.

-Lo peor de lo peor, atendiendo al sitiu del que soi.

Mírolu ententes.

-¡Nun me jodas que tá programada “Katiuska”! –esclamo.

-¡Nun te jodo! –aporfia él, recalcando esi soníu de jota (que nun tien nada que ver col de la h aspirada que por nun se qué estraña manía quieren obliganos a escribilu pa sustituir la jota que suena en palabres tan asturianes de les cuenques como guaje o majiru).

“Katiuska” amás d’una zarzuela ye una tomadura de pelo de Pablo Sorozábal, un músicu escepcional que compuso obres sinfóniques impresionantes, como un Capricho español o una Suite vasca. Obres éstes que nun gozaron de gran éxitu nel so tiempu (década de los venti), lo que llevó al compositor a tener que componer zarzueles pa poder comer. Frutu d’esta vulgarización del so saber musical ye Katiuska, que tuvo un enorme éxitu dede’l momentu mesmu de la so estrena.

Esta xoven Katiuska, güérfana pola maldá de los soviéticos y namorada d’un comisariu políticu del partíu comunista, ye la venganza d’un gran músicu contra un públicu analfabertu musical, del que s’acaba riendo na so cara gracies al éxitu.

Entiéndese asina que, músicos profesionales de la talla del que m’alcuentro nel aeropuertu de Santander y viaxa comigo hasta Uviéu, tomen con resignación de funcionariu la crueldá de tener de tocar una pieza que, alvierten dende la primera a la última nota, fue compuesta pa reíse del públicu. Pero, eso enxamás lo alvierte un políticu que programa zarzuela: sabe que va contar col favor del mesmu públicu analfabetu musical delantre del que triunfó la pieza na so estrena y del que va siguir triunfando’l día de la so enésima representación nel Teatru Campoamor.

Esta burguesía de primeros de sieglu qu’adora y enllena les representaciones de zarzuela ostenta la so asistencia a elles como una seña d’identidá del so carácter burgués. P’acabar, colos años, siendo una seña d’identidá del mesmu Uviéu –lo que, polo contrario de lo que los sos dirixentes y asistentes cuiden, fala bastante negativamente de la so cultura musical.

Contra esta burguesía cerrada en banda como tribu, los compositores clásicos del tiempu componen obres que recuperen la sonoridá de la tierra a la que pertenecen. Pablo Sorozabal fízolo asina cola so Suite vasca y, n’Asturies, compositores como Baldomero Fernández o Martínez Torner, ficiérenlo cola música asturiana y, de manera mui especial, cola tonada.

Esta música popular, interpretada al piano y cantada por delles de les voces más representatives del tiempu, acaba convirtiéndose na asturianada, el xéneru más identificativu de la música asturiana. Un xéneru que va acabar ganando’l favor del públicu gracies a la so difusión pola radio y a la proliferación de concursos y de nueves voces que van repitir hasta’l cansanciu aquellos temes que convirtieron en clásicos les voces del Gaiteru Llibardón, María la Pita, El Maragatu, Cuchichi, Botón, Claverol, Quin el Pescador, Santos Bandera, La Busdonga, Miranda, El Polenchu de Grau, Xuacu’l de Sama, Pepe’l Pantuxu de Sama, Lauro, El Panaderu, Juanín de Mieres…

Pa la ridiculamente pequeña y ridiculamente culta burguesía asturiana, estos compositores tamién compusieron zarzueles que gozaron nel so tiempu de gran predicamentu. Pero, por ser montaxes costosos y d’escasa posibilidá de repercusión esterior –la zarzuela ye un xéneru españob y, como talu, La del manojo de rosas, tamién de Pablo Sorozabal, triunfa siempre sobre Katiuska- nun se representen malapenes nada. Les obres sinfóniques de Baldomero Fernández o les zarzueles de Martínez Torner son tan perifériques como la popia provincia y difícil van triunfar demientres la burguesía que consume esti tipu d’obres tea más interesao no ayeno –por mui malo que seya- que no propio –por más que puea ser igual de malo.

D’ehí que, l’asturianada, como xeneru a mediu camín ente la música culta y la canción tradicional, ye un verdaderu milagru. Fue quién a ñacer metanes del analfabetismu musical de la burguesía asturiana y sigue siendo quién a pervivir ante l’analfabetismu musical de la burguesia actual, heriede de la de siempre.

Que naide entienda como un insultu tachar d’analfabeta a la nuestra burguesía pol fechu d’asistir a la zarzuela. Cada país tien la burguesía que-y ye propia. Y ésta ye la nuestra, dende va más de cien años. La zarzuela, como xéneru menor, ye perfectamente válidu pa esti tipu de públicu. Ye la so música por escelencia.

Pero, más que nada, si nun te gusta nada la zarzuela recuerda tamién que, a los músicos, a los buenos músicos, tampoco. Pero, de dalgo se tien de vivir. Dende esta perspectiva tamién son fáciles d’entender los titulares de la prensa diaria del día siguiente que falaben del enorme éxitu de la representación. Tamién los periodistes, como los músicos, tienen de vivir de dalgo. Habrálos que nun fueron nin siquiera al Teatru Campoamor y falaron maravíes de la resentación y habrálos, como non, que nun-yos prestó nada, y tamién falaron bien d’ella.

La suerte d’escribir nun llugar como ésti, Les Noticies, ye la de nun tener de rendir más pleitesía que la qu’a mio mesmu m’imponga. Lo que tamién ye triste: constata esa ausencia d’una burguesía asturiana interesada no propio. Más de cien años que llevamos ensin ella.