Tiempu y llugar, Sergio Rodríguez y María Sánchez

2008 / 01 / 04 - Les Noticies

Ye mester partir de los conceptos de tiempu y espaciu como magnitudes físiques pa ser a entendelos en música. Más que nada sí quiero ser quien a falar de grabaciones como “Tutu Studiu 07”, de Sergio Rodríguez, o como “Aires de Peñamellera”, de María Sánchez Blanco.

Cuando’l Gaiteru Llibardón aporta a París a finales del sieglu XIX col so repertoriu de cantares y sones de gaita tradicionales failo como representante d’un llugar mui determináu –Asturies-. Y París conviértese nel llugar nel que converxen les músiques de munchos más llugares y que, a partir del alcuentru, van compartir tamién un tiempu común. Los llugares diben siguir siendo los llugares, pero’l tiempu comenzaba a ser trestocáu.

Seis años depués de la Exposición Universal de París, en 1906, dende Brant Rock Station, en Massachusetts, Reginald Fessenden tresmite la primer radiodifusión de la hestoria: el cantar “O Holy Night” y una llectura de la Biblia. Malapenes quince años más tarde, el 27 d’agostu de 1920, dende l’azotea del Teatru Coliseo de Buenos Aires entamaba la primer programación en radio cola tresmisión del “Pasifal” de Wagner.

Tres o cuatro años más tarde yá taben funcionando n’España les emisiones de Radio Barcelona y Radio Ibérica de Madrid. Les primeres emisiones de Radio Asturias fueron en nada, en 1925. Con too, nestos venticinco años que van dende la Exposición de París y l’empiezu de les emisiones de Radio Asturies, otra gran revolución venía teniendo llugar nel ámbitu de la música: la de la reproducción sonora. De mano al traviés de los cilindros de cera y, en nada, col asentamientu del formatu discu.

El Gaiteru Llibardón graba en discu na primer década del sieglu XX y firma un importante contratu pa la difusión de la so obra per tol mundu. Enantes qu’él, otros músicos grabaran pieces asturianes en cilindros de cera. L’exitu de Llibardón y de cantadores como Antonio Pozo, el Mochuelo, con temes asturianos, a los que se sumaron los primeros éxitos de La Busgonga, El Maragatu y Los Cuatro Ases, convirtieron la so música na música del tiempu más que na del llugar.

Al tango arxentinu pasára-y lo mesmo naquellos primeros años del nuevu sieglu. Carlos Gardel fuera la figura indiscutible. El tango sonaba nos bailles de salón d’Uviéu y Xixón como lo fadría nos mesmos de Buenos Aires. El tango dexara de ser la música d’un llugar pa pasar a ser la d’un tiempu.

Y el que fala del tango failo del fado, del flamenco, del son, del blues, de la napoletana... músiques toes elles qu’a lollargo d’aquellos años fueron poco a poco dexando de ser músiques d’un llugar pa pasar a ser músiques d’un tiempu.

En nada, sicasí, el so tiempu fue pasándo-yos. Agora llamámoslo moda. Pero siguimos falando de tiempu. Y el tango regresó al so llugar, como lo ficieron el bolero, la chanson y el son. Delles veces pa regresar, pa volver a ser la música d’otru tiempu n’otru tiempu más alantre. El tango volvió tener el so momentu a finales de los cincuenta y, dacuando, agora que los medios de difusión tolo permiten, regresa triunfal.

L’asturianada, mesmo, tuvo aquel tiempu gloriosu de primeros de sieglu XX y volvió a tener dellos momentos, a escala más reducida, a finales de los cincuenta. El tiempu del Gaiteru Llibardón, a la so manera, volvió regresar col descomanáu éxitu d’Hevia a primeros d’esti mesmu sieglu.

Agora mesmo, en cualquier parte del mundu, ta dándose la confluencia de les dos músiques, la del tiempu y la del llugar. La música del tiempu ye Shakira, pero tamién quier selo “Tutu Studio 07”. La música del llugar sigue siendo la de María Sánchez Blanco.

El conceptu de word music surde cuando’l mercáu descubre l’enorme potencial que tienen determinaes músiques de llugar y fai por convertiles en músiques de tiempu. Dalgo que namás unes poques consiguen. Les otres queden como músiques del tiempu nun llugar. Arrequexaes: fálten-yos les armes necesaries pa combatir nel mercáu. Pása-yos el tiempu y pásense. Asina nos suenen como d’otru tiempu aquellos arreglos orquestales d’El Presi, aquelles sonoridaes folk-rock de Nuberu o aquelles otres pop de la Orquestina Son les Poles. Y, en cambio, siguen sonando al llugar les grabaciones de Cuchichi, les de Diamantina o mesmo la citada de “Aires de Peñamellera”.

Los actuales medios de comunicación y difusión faennos compatibles tiempu y llugar. Nun esiste nenguna grabación comercial –y tovía nun les empleó naide de la word music que me suene- les isopolifoníes albaneses declaraes Patrimoniu Inmaterial de la Humanidá. Pero, en cualquier momentu dende cualquier ordenador por mediu d’un programa de descarga d’archivos sonoros pues facete con una grabación estupenda.

Van siguir siendo músiques de llugar, pero nun cabe dulda que’l tiempu cada vuelta se nos ta faciendo más y más común. Sergio Rodríguez emplea de manera intelixente llugar y tiempu. María Sánchez namás el llugar y cola sobeya propia d’esta forma de cantar. Por más que dambes coincidan equí y agora, pa entendeles tien de tenese bien presente dambos conceptos: tiempu y llugar.