Música pa pasalo bien

2009 / 05 / 01 - Les Noticies

En 1079, el soberanu de Lleón y Castilla, Alfonso VI, encárga-y Rodrigo Díaz la embaxada ante los príncipes de les taifes de Sevilla y Córdoba pa cobrar los tributos debíos polos dos al monarca. Acabante d’aportar cola so mesnada a la corte sevillana del rei poeta al-Mutamid, recibiéronse noticies de que’l rei de Granada, tamién tributariu del monarca castellanu, disponíase a atacar Sevilla. Vistes les banderes granadines frente a la ciudá, apreciábense les insignies cristianes d’altos dignatarios de la mesma corte castellana.

Al enfrentamientu ente les tropes de Rodrigo Díaz, defendiendo al monarca sevillanu, y les del conde García Ordóñez, como avanzáu del granadinu, conozselu como batalla de Cabra y fala d’ella’l Cantar del Mio Cid. Como bien sabe tou aquel que tuvo de lleer el poema a lo llargo del bachiller, Rodrigo Díaz tornó triunfante a Sevilla, onde fue aclamáu pola multitú y agasayáu pol príncipe poeta, y de siguío a Burgos, onde tuvo l’aquel de poder pasa-yos pol morru a tolos condes castellanos de más grande rangu que portaba con él cuatro altos pendones arrebataos en batalla d’otros tantos cuatro altos dignatarios.

Ye nel momentu nel que’l poeta biógrafu se desentiende de la hestoria real y fai entrar al personxe nel mitu. Lo cierto ye que Rodrigo Díaz torna a la mísera Castilla fascináu pola belleza, la inmensidá de les mezquites, la grandeza de los palacios, l’encantu de los poetes. Momentu nel que decide que, aquélla, Castilla, yá nun ye la so tierra. Que, ensin dexar por ello de ser castellanu, la tierra yera más grande.

Evidentemente, esta ye la hestoria de tolos díes. Mesmo, la hestoria de la música d’anguañu y de siempre. Pero, más que nada, una hestoria de músicos, de xente que sal fuera y sabe que la so forma de facer música ye quién a enfrentase cola manera de facer músca de cualquier otra parte del mundu y que regresa p’acabar dándose cuenta qu’aquella patria querida de la que partiera ya nun yera la so tierra. Porque la patria de la música siempre ye enforma más grande y más llibre que la patria de la tierra.

Sentilo dicir con otres palabres al músicu Alejandro Lafuente, Lafu, cuando la presentación del CD Amor, amante (Ámbitu, 2006). Preguntába-ylo yo nun programa de radio. Poníamos de fondo un más que conocíu cantar folk d’un tamién más que reputáu grupu folk, qu’él versionara xunto a la voz de la so compañera, Rebeca Velasco.

-Como se trata de versiones de canciones tradicionales folk, ¿podría dicise que vosotros facéis de daguna forma folk tamién?

-Si l’arreglu del cantar fuera repititivu, si l’esquema fuera’l de sota, caballu y rei, si los músicos nun supieran tocar más que cuatro acordes y si’l cantante nun cantara un pimientu, entós podría dicise que tamos faciendo folk. Por eso garramos cantares que veníen de la tradición asturiana y de la tradición moderna peñerada pol folk, pa da-yos una vuelta nel tema armónicu, con buenos músicos y una buena voz. Pa facer dalgo diferente. Pa facer música.

Enantes viniera’l trabayu Ea, ea, ea. Añaes tradicionales asturianes (Ámbitu, 2005), con una visión tan ayena de la música tradicional asturiana que se convirtió en tou un llibru d’estilu. Tovía nesti momentu, la versión de la “Añada amorosa” de Diamantina Rodríguez, na voz de Rebeca Velasco y el contrabaxu de David Casillas, sigue dando llecciones de bon gustu y meyor facer. Como’l siguiente tema, “Durmir, durmidera”, na voz de Juanjo Abad y la guitarra de Marco Martínez.

Un xuegu de voces, les de Rebeca Velasco y Juanjo Abad, que volveríen a facer un exerciciu de sobeya prestosa na versión de “Ayer vite na fonte”, en Amor, amante.

Depués de bien de tiempu y bien d’otres grabaciones –de les que tengo hasta xoyes del tiempu de grupos como Tráficu y Mamá Iguana-, vienen de sacar un discu con cantares orixinales del propiu Alejandro Lafuente. Cola collaboración d’una montononera d’amigos y una producción y edición enforma artesanales –por más que depués suene sobradamente profesional-, Nun pido más ye’l títulu d’esti trabayu.

Nada que ver cola música que se tá faciendo anguañu y menos equí n’Asturies, Alejandro y Rebeca apuesten por facer lo que-yos presta cola xente que-yos presta. Un discu ensin más concesión que la de pasalo bien cada vuelten que reinterpreten esos cantares. Un discu d’amigos, p’amigos, ente amigos. Pero, amás, un discu de xente que sabe lo que fai y, hasta qu’estremu, que vive d’ello. Y, nestos tiempos, vivir de la música ye un privilexu.

D’ehí qu’esti discu seya tamién un privilexu: el productu de xente privilexao. Nun sabría dicir lo que tien de pop, lo que tien d’ochenteru, lo que tien de jazz o de bossa, lo que tien de música asturiana. Asina ye la música. De toos. Pero ellos sábenlo y faen nesti discu un exerciciu sobeyosu d’ello.