A cuentu d'un premiu de sardana

2009 / 04 / 24 - Les Noticies

Pola banda de gaites formada mayoritariamente por guajes fíos d’amigos y conocios tuyos que toquen cai alantre la “Alborada del paxarín” na mañana de les fiestes, pol grupu de baille de neños del que conoces a cásique tolos padres y que fai un son d’arriba debaxo de la ventana de la to casa’l dia grande de les fiestes, polos cantadores de tonada de la nueva y la vieya xeneración que se suben xuntos al escenariu a repitir les milenta vueltes de “Ayer me dixo to madre”, pol acordionista qu’acompaña a una neña al violín y repasen un pasudoble qu’aprendieran de boca de nun saben quién a base d’insistir y d’insistir, pol ochote de voces mayores que lleven tola vida interpretando esa habanera que ye hasta tal estremu parte de la memoria collectiva de la xente que los siente que los acompañen como si fueran en xunto un descomanáu orfeón, pola parexa de gaiteru y tamboriteru que dan pasu a la consagración na misa mayor coles notes de la “Marcha Real” que se lleva tocando tola vida hasta que dalgún hiperasturianista la quixo cambiar pola cancionina de chigre convertida en himnu nacional, pola bandina de críos de la escuela de música tradicional del to pueblu que se xuntaron pa tocar nel Concursu y Muestra de Folclor Ciudá d’Uviéu y qu’agora recueyen les mieles del éxitu nel kiosku de la música de la plaza del pueblu faciendo la sesión vermú, pola intérprete anónima que se sube como espontanea al escenariu a intentar que’l públicu reconoza’l cantar que tá cantando… por toos ellos, el to Ayuntamientu, como parte de la serie d’alcuerdos xenéricos firmaos qu’abarquen tola música que s’interpreta nes fiestes, paga’l canon correspondiente a la SGAE.

Y, nel fondo, tolos citaos entenderíen que se-yos cobrara como banda gaites, como grupu baille, como cantador de tonada, como acordionista y violinista, como ochote, como gaiteru y tamboriteru, como bandina o como intérprete anónima, si de dalguna forma se viera qu’esi dineru revertía na propia música de la que toos ellos se nutren: la música asturiana.

Sé qu’esti ye un argumentu populista. Pero ye’l más simple que se m’ocurre pa que los populistes que gobiernen la SGAE d’Asturies puean enteder la sangría que tan propiciando nes arques municipales y l’abosutu abandonu nel que siguen manteniendo a la música asturiana. Porque, si hai dalgo dafecho indefendible ye que col fechu de dar añalmente’l Premiu a la Meyor Canción n’Asturianu s’entiende que yá tan pagos los tres mil miembros de formaciones corales, los más de diez mil instrumentistes, los cerca de tres mil bailladores en formaciones de baille y los cerca de mil cantadores de tonada, por citar namás a los que s’averen a la música d’una manera más activa y continuada.

Claro que ye un argumentu populista. Pero ye l’únicu que me sirve pola so cenciellez pa poder acusar de cómplicidá a los conceyales de festexos, a lo alcaldes que firmen les actes de les Xuntes Locales de Gobiernu qu’aprueben les fiestes de cada conceyiu y a los responsables de la Conseyería de Cultura que permiten esta sangría continua.

Nun necesito argumentar sobre’l derechu del canon de los bares pola música que suena, nin sobre’l canon nos CD’s vírxenes qu’obligatoriamente tengo qu’emplear nel trabayu, nin sobre nengún de los otros aspectos de la vida cotidiana sobre los que los dirixentes de la SGAE fueron quién a estender el so afán recaudatoriu. Y nun necesito argumentar porque yo tamién soi autor y como autor m’encanta qu’una sociedá como ésta defienda los mios derechos hasta estremos indefendibles. Como autor sé que, gracies a ello, cuento con unos privilexos: pero tampoco más qu’otros collectivos, como la guardia civil, los empleaos de RENFE o los médicos de la SS.

Pero, más allá del fechu de que me sienta más o menos bien defendíu como autor, sigo ensin entender como trabayador de la cultura y como ciudadanu d’esta tierra (vuelvo, como se pue comprobar, al argumentu populista) que la música tradicional tea suxeta al mesmu canon que la música pop y –esto ye lo más sangrante-, ensin que se dea nenguna contraprestación por ello, ensin qu’esti dineru nun revierta de dalguna manera na nuestra música.

Tengo más exemplos. Acaba de salir el númberu 1000 del Sello Autor. Depués d’ocho años de vida, lleguen al númberu 1000 col discu Raíces y Alas, de Carmen Linares. Prestaríame qu’entrárais na páxina web, tuviérais la santa moral de mirar los 1000 títulos y buscárais a los autores asturianos publicaos. Depués de que lo faigáis, si topáis a dalgún, mandáime un corréu. Ye que yo nun fui quién a ello.

¿Más exemplos? Claro. Acaben de da-y al músicu y compositor Jaume Cristau’l premiu de Sardanes 2008, dotáu con 3000 € pola obra “Pau, més Garreta”. El nome del premiu fala por él mesmu: Premiu SGAE de Sardanes 2008. ¿Ye mester que vuelva al argumentu populista y faiga una pregunta retórica d’eses que tol mundu conoz la respuesta porque va implícita nella?

¿Tovía más exemplos? A magullu. La SGAE de Galicia acaba d’axuntase coles bandes de gaites de la tierra pa reivindicar el so llabor y esplica-yos los sos derechos. Durante l’alcuentru animóse a los gaiteros a rexistrar el so trabayu pa facilitar el llabor de repartu de los ingresos que por derechos-yos pertenecen. Como representantes de la SGAE acudieron a la cita’l gaiteru y conseyeru José Ángel Hevia y el director de la entidá nel Noroeste, Javier Vidal. Ensin comentarios.

Estos exemplos y tolos más que se quieran tienlos a mano cualquier sociu de la SGAE –como yo mesmu, insisto- y lléguente a casa nuna de les munches publicaciones qu’a lo llargo del añu te cuenten coma van les cuentes y lo muncho que se fai coles perres de los contribuyentes. En concreto los datos apuntaos aparecen na revista Notas del mes de marzu de 2009.